Isaias 24 - Samarenyo Meaning-Based Bible (1984)

Kakastigohon han Ginoo an Tuna

¹ Pupuohon han Ginoo an tuna ngan babayaan ini nga waray umurokoy. Papanason niya an bawbaw han tuna ngan igpapasarang niya an mga umurokoy.

² Pareho an dadangatan han ngatanan—an kapadian ngan an mga tawo, nga oripon ngan mga agaron, mga mamaralit ngan mga magbaraligya, mga parapautang ngan mga umurutang, mga riko ngan mga pobre.

³ Mapupuo ngan maruruba gud an tuna. An Ginoo an nagyakan ngan matutuman gud ini.

⁴ Magmamara ngan malalaya an tuna; manluluya an bug-os nga kalibutan; magdudunot an tuna ug langit.

⁵ Ginhugawan han mga tawo an tuna pinaagi hin pagsupak han mga balaod han Dyos ngan pagtalapas han dayon nga ginsaaran nga iya ginhimo.

⁶ Sanglit ginpanhimaraot han Dyos an tuna. Nagbabayad an mga tawo hini tungod han ira ginbuhat. Pipirapira na la an nahisasalin nga buhi.

⁷ Nalalaya an mga ubas, ngan nagtitikahubas an bino. Mabidoon na an ngatanan nga hadto anay malipayon,

⁸ ngan inmukoy na an malipayon nga tokar han ira mga arpa ngan mga gimbal.

⁹ Waray na malipayon nga pagkanta dida han mga irignom hin bino; waray na karuyag tumilaw han rasa hini.

¹⁰ Masamok an ngatanan didto han syudad ngan nagsasada an mga tawo didto han ira mga balay basi magawas hira han kataragman.

¹¹ Naggoliat an mga tawo dida han kakalsadahan kay waray na man bino. Naanaw na ha kadayonan an kalipay; nawara na ini dinhe ha tuna.

¹² Ruba na an syudad, ngan narumpag na an mga ganghaan.

¹³ Amo ini an mahinanabo didto han tagsa nga nasod ha bug-os nga kalibutan. Sugad ini kon tubas na an pag-ani, ngan kon pinannguha na an mga olibo tikang han tagsa nga kahoy ngan gintimod na hin panmuro an mga ubas.

¹⁴ Magkakanta tungod hin kalipay adton mga mahisasalin nga buhi. Magsasangyaw han pagkaharangdon han Dyos adton aadto ha Katundan,

¹⁵ ngan magdadayaw ha iya adton aadto ha Sinirangan. Magdadayaw han Ginoo nga Dyos han Israel an mga tawo nga nag-uokoy didto ha mga baybayon.

¹⁶ Tikang didto han gihihigrayoi nga mga dapit han kalibutan hibabatian ta in mga kanta hin pagdayaw han Israel, an matadong nga nasod. Kundi waray na ako paglaom! Nagtitikaluya na ako. Nagpapadayon hin panlingo an mga maglingo, ngan nagtitikaraot la an ira paglingo.

¹⁷ Pamatii ako niyo, kamo ngatanan! May-ada mga magpakaharadlok, mga luong, ngan mga bitik nga naghuhulat ha iyo.

¹⁸ Mahuhulog ngadto hin luong an bisan hin-o nga naglilikay han makaharadlok, ngan mabibitik an naglilikay han luong. Mabunok tikang ha langit, ngan mababay-og an mga patukoranan han tuna.

¹⁹ Maguak, magutak, ngan magkakabubuka an tuna.

²⁰ Magririigdiig an tuna sugad hin hubog, mag-aabog-abog sugad hin nga gintitiupay hin bagyo. Binubug-atan an kalibutan tungod han mga sala; mahirurugmok ini ngan diri na gud makakabangon.

²¹ Maabot in panahon nga pagkakastigohon han Ginoo an mga kagamhanan ha igbaw, ngan an mga punoan han tuna.

²² Pagtitirokon han Dyos han kahadian sugad hin mga priso dida hin usa nga luong. Iya pagpriprisohon hira ngada han pag-abot han panahon han pagkastigo ha ira.

²³ Magsisirom an bulan ngan diri na masiga an adlaw, kay maghahadi an Ginoo nga Labi Kamakagarahum. Maghahadi hiya didto ha Jerusalem, didto ha Bukid Sion, ngan hikikit-an han mga pangulo han mga tawo an kapawa han iya gahom.