Isaias 19 - Samarenyo Meaning-Based Bible (1984)

Kakastigohon han Dyos an Ehipto

¹ Mensahe ini mahitungod han Ehipto. Tikadto ha Ehipto an Ginoo nga malaksi an kasakay dida hin usa nga dampog. Nangungurog ha iya atubangan an mga diyosdiyos nga Ehiptohanon, ngan nawawad-an han ira kaisog an mga tawo han Ehipto.

² Nasiring an Ginoo, “May-ada aruaraway han mga tawo. Itutugot ko nga magkaaway didto ha Ehipto an bugto kontra hin bugto ngan amyaw kontra hin amyaw. Mag-aaruaraway an magkontra nga mga syudad ngan mag-aaruaraway hin pag-angkon hin gahom an magkontra nga mga hadi.

³ Papakyason ko an mga larang han mga Ehiptohanon ngan kukuhaon ko an ira kadasig. Makikibulig hira han ira mga diyosdiyos ngan mapakiana hira han ira mga espiritista ngan maaro hira hin sagdon han mga espiritu han patay.

⁴ Itutubyan ko an mga Ehiptohanon ngadto hin manlulupig, ngadto hin mabangis nga hadi nga maghahadi ha ira. Ako nga Ginoo nga Labi Kamakagarahum an nagyakan.”

⁵ Mahubas an tubig didto han Nilo ngan hinayhinay magmamara an salog.

⁶ Magbabaho an mga inaagian han salog samtang nga hinayhinay an pagmara hini. Magkakalalaya an mga tangbo ngan mga bariis,

⁷ ngan an mga tanom dida han mga pangpang han Nilo mauuga ngan igpapalid.

⁸ Maghaharoy ngan magtatangis an ngatanan nga mga mangirisda dida han Nilo; waray na gamit an ira mga kawil ngan an ira mga pukot.

⁹ Magtuturaw adton mga parahimo hin lino nga mga panapton;

¹⁰ magmamabidoon ngan waray paglaom an mga parahablon ngan batid nga mga trabahador.

¹¹ Mga lurong an mga pangulo han syudad han Zoan! Nahatag hin tinuyaw nga sagdon an labi ka makinaadmananon nga mga tawo han Ehipto! Inuunan-o nira hin pagpasipara hin pagsumat han hadi nga mga sumurunod hira han kadaan nga mga mag-aram ngan kahadian?

¹² Hadi han Ehipto, hain na man adton imo listo nga mga parasagdon? Bangin makagsumat hira ha imo kon ano an mga larang han Ginoo nga Labi Kamakagarahum para han Ehipto.

¹³ Mga lurong an mga pangulo han Zoan ug Menfis. Hira unta an magpapangulo han nasod, kundi ira la lugod ginlipatlipat hira.

¹⁴ Itinugot han Ginoo nga maghatag hira hin nakakagupong nga sagdon. Tungod hini sayop la ngatanan an ginbubuhat han Ehipto ngan nagpaparingpading sugad hin hubog nga nababakinas ha iya kalugaringon nga suka.

¹⁵ Didto ha Ehipto waray riko o pobre, importante o diri kinikilala nga tawo nga makakabulig.

Magsisingba han Ginoo an Ehipto

¹⁶ Maabot in panahon nga an mga tawo han Ehipto masusugad hin kababayen-an ka awdanon. Mangungurog hira hin kahadlok kon hikit-an nira nga andam na an kamot han Ginoo nga Labi Kamakagarahum hin pagkastigo ha ira.

¹⁷ Mahahadlok hin duro han Juda an mga tawo han Ehipto kon manunumdom hira han ira dadangatan nga igin-andam han Ginoo nga Labi Kamakagarahum para ha ira.

¹⁸ Kon umabot na ito nga panahon, an pinulongan nga Hebreo amo an gagamiton didto hin lima nga mga syudad nga Ehiptohanon. Magsusumpa didto an mga tawo ha ngaran han Ginoo nga Labi Kamakagarahum. Tatawgon nga “Syudad han Adlaw” in usa han mga syudad.

¹⁹ Kon umabot na ito nga panahon, may-ada altar ngadto han Ginoo didto han tuna han Ehipto ngan hin harigi nga bato nga iginhalad ngadto na iya didto han pag-ultan han Ehipto.

²⁰ Mahihimo nga mga tigaman ini nga an Ginoo nga Labi Kamakagarahum nag-uokoy ha Ehipto. Kon pagtalumpigoson an mga tawo didto ngan magtawag hira hin pakibulig han Ginoo, magpapadara hiya hin tawo nga magtatalwas ha ira.

²¹ Magpapakilala an Ginoo ngadto han mga Ehiptohanon ngan makilala ngan magsisingba hira ha iya, ngan magdadara hira ngadto ha iya hin mga halad nga tutuboron ngan mga halad. Magsasaad hira ha iya ngan pagtutumanon nira an ira iginsaad.

²² Kakastigohon han Ginoo an mga Ehiptohanon, kundi iya liwat tatambalon hira. Mabalik hira ngadto ha iya ngan pamamatian niya an ira mga pag-ampo ngan tatambalon hira.

²³ Kon umabot na ito nga panahon, may-ada na hiluag nga dalan tikang ha Ehipto ngadto ha Asiria. Mapakadto ha Asiria an mga Ehiptohanon ngan ngadto ha Ehipto an mga Asiriahanon, ngan mag-urosa hin pagsingba an mga tawo hini nga duha nga mga nasod.

²⁴ Kon umabot na ito nga panahon, matupong an Israel han Ehipto ug Asiria, ngan ini nga tulo nga mga nasod mahihimo nga bendisyon ngadto han bug-os nga kalibutan.

²⁵ Pagbebendisyonan hira han Ginoo nga Labi Kamakagarahum ngan masiring, “Pagbebendisyonan ko ikaw, Ehipto nga akon mga tawo; ikaw, Asiria nga binuhat han akon mga kamot; ngan ikaw, Israel nga akon pinili nga mga tawo.”