Isaias 18 - Samarenyo Meaning-Based Bible (1984)

Kakastigohon han Dyos an Sudan

¹ Ha unhan han mga salog han Sudan may usa nga tuna diin hinbabatian an palapaka hin mga pako.

² Tikang hito nga tuna may-ada mga sinugo nga ginpadara tikang ha iraya han Nilo nga sakay hin mga sakayan nga hinimo hin mga tangbo. Uli ngadto han iyo tuna, maglaksi nga mga magsarangyaw! Ibalik niyo an mensahe ngadto han iyo tuna nga nagkakabahinbahin tungod hin mga salog, ngadto han iyo makusog ngan gamhanan nga nasod, ngadto han iyo higtaas ngan maghamis in panit nga mga tawo nga nahahadlokan ha bug-os nga kalibutan.

³ Pamati, kamo ngatanan nga nag-uokoy dinhe ha tuna! Pangitaa in usa nga sinyal nga bandera nga pag-iisahon didto han mga sampaw han bukid! Pamatia an pagtunog han trompeta!

⁴ Nagsiring ha akon an Ginoo, “Matamod ako tikang ha langit hin hinayhinay sugad han pagporma han tun-og dida han mapaso nga mga kagab-ihon ha panahon han kat-ani, sugad kamalinaw han pagsirak han adlaw kon naudtohan.

⁵ Ha diri pa pangunguhaon an mga ubas, kon magkataktak na an mga bukad ngan mahinog na an mga ubas, pagbubungkagon han kaaway an mga Sudanhon hin sugad hin matarom nga kutsilyo nga masayonay makautod hin mga sanga hin usa nga ubas.

⁶ Babayaan nga waray mga tabon an patay nga mga lawas han ira mga sondalo para han katamsihan ngan han ihalas nga kamanampan. Ha panahon han kathuraw kakaonon hira han mga tamsi ngan ha panahon han kat-uran kakaonon hira han kamanampan.”

⁷ Maabot in panahon nga makarawat an Ginoo nga Labi Kamakagarahum hin mga halad tikang hini nga tuna nga nagkabahinbahin tungod hin mga salog, hini nga makusog ngan gamhanan nga nasod, hini nga higtaas ngan maghamis in panit nga mga tawo nga nahahadlokan ha bug-os nga kalibutan. Maabot hira ngadto han Bukid Sion diin ginsisingba an Ginoo nga Labi Kamakagarahum.