Isaias 13 - Samarenyo Meaning-Based Bible (1984)

Kakastigohon han Dyos an Babilonia

¹ Mensahe ini hiunong han Babilonia nga kinarawat ni Isaias nga anak ni Amoz tikang sa Dyos.

² Isaha an bandera ha pag-awayan didto ha bawbaw hin mahawan nga pungtod! Goliat ngadto han mga sondalo ngan alsaha an imo kamot sugad nga sinyal para ha ira hin pagsulong han mga ganghaan han natataporan nga syudad.

³ Gintawag han Ginoo an iya mag-isog ngan magsinarigon nga mga sondalo nga makiaway hira para han Ginoo ngan pagkastigohon hira adton nasisinahan niya.

⁴ Pamatii an aringasa didto han kabukiran—an danaguhob hin dako nga hugpo hin mga tawo, an aringasa hin nagtititirok nga mga nasod nga mga ginhadian. An Ginoo han mga Kasondalohan nag-aandam han iya kasondalohan para hin away.

⁵ Naabot hira tikang hin higrayo nga mga nasod didto han mga sidsid han tuna. Ha iya kasina naabot an Ginoo hin pagpuo han bug-os nga nasod.

⁶ Goliat tungod hin kasakit! Hirani na an adlaw han Ginoo, maabot na an adlaw nga pupuohon han Labi Kamakagarahum an nasod.

⁷ Manluluyloy an mabanlod nga mga kamot, ngan magtatalaw an ngatanan.

⁸ Mahahadlok hin duro hira ngatanan ngan aabotan hira hin kasakit, sugad hin babaye nga tipag-aranak. Maggigipasirusiplat hira upod in kahadlok, ngan manluluspad an ira mga bayhon tungod hin kaawod.

⁹ Maabot an adlaw han Ginoo—ito nga mapintas nga adlaw han iya makalilisang nga kasina ngan kapungot. Mahihimo nga kamingawan an tuna, ngan pupuohon an tagsa nga makasasala.

¹⁰ Diri na masiga an tagsa nga bitoon ngan an tagsa nga hugpo hin kabiton-an, magmamasirom an adlaw ha iya pagsirang, ngan diri mahatag hin kapawa an bulan.

¹¹ Nasiring an Ginoo, “Dadad-an ko hin karat-an an tuna ngan pagkakastigohon ko an ngatanan nga mga magraot tungod han ira mga sala. Pagpapaubson ko an ngatanan nga mapinahitas-on ngan kakastigohon ko an mga magraogdaog ngan magbangis.

¹² Adton mga mahisasalin nga buhi makuri hiagian sugad hin tunay nga bulawan.

¹³ Hito nga adlaw kon magpakita na ako nga Ginoo nga Labi Kamakagarahum han akon kapungot, makurog an kalangitan, ngan mababay-og an tuna tikang han iya hinmumutangan.

¹⁴ “An mga lumalangyaw nga nag-uokoy didto ha Babilonia mapalagiw ngadto han ira kalugaringon nga mga tuna ngan magsasarang sugad hin bugsok nga nalikay han mga parapanakop, sugad hin mga karnero nga waray paramangno.

¹⁵ Bubun-on an bisan hin-o nga hidakpan basi mamatay.

¹⁶ Ha ira atubangan, ipanrarambo ha tuna an ira mga minasus-an, paninikasan an ira kabablayan, ngan panlulugoson an ira mga asawa.”

¹⁷ Nasiring an Ginoo, “Gin-aaghat ko an mga Mediahanon hin pagsulong han Babilonia. Para ha ira waray la an salapi ngan diri hira nasusulay hin bulawan.

¹⁸ Pamamatayon nira pinaagi han ira mga pana an batan-on nga kalalaken-an. Diri hira mapakita hin kalooy han mga minasus-an ngan hin pagpaid han kabataan.

¹⁹ Labi hin kamatahom an Babilonia han ngatanan nga ginhadian; amo hiya an parayaw han iya mga tawo. Kundi ako nga Ginoo an magpupukan han Babilonia sugad han akon ginbuhat han Sodoma ug Gomora!

²⁰ Waray na gud mag-uokoy didto. Waray na gud maglalakaton nga taga-Arabia nga magtitindog han iya tulda didto; ngan waray na magmarangno nga magpapasabsab han iya panon didto.

²¹ Magigin dapit ini nga urokyan hin mga mananap ha kamingawan, ngan saralagan hin mga bukaw. Mag-uokoy didto an mga duong, ngan mag-aaruambak dida han mga nagkaruruba an ihalas nga mga kanding.

²² Mag-aaningal ha mga torre ngan ha mga palasyo an mga uwang han ihalas nga kaayaman ngan mga lubo. Inmabot na an panahon han Babilonia! Matatapos na an iya mga adlaw.”