Isaias 12 - Samarenyo Meaning-Based Bible (1984)

Nagkanta hin Pagpapasalamat

¹ Maabot in adlaw nga magkakanta in mga tawo, “O Ginoo, nagpapasalamat ako ha imo! Nasina ka ha akon, kundi yana ginlipay mo ako ngan diri ka na nasisina.

² An Dyos an akon magtaralwas; masarig ako ha iya ngan diri ako mahahadlok. Nahatag ha akon hin gahom ug kusog an Ginoo; hiya an akon magtaralwas.

³ Sugad nga nakakalipay han mga inuuhaw an matugnaw nga tubig, nalilipay man an mga tawo han Dyos kon talwason niya hira.”

⁴ Maabot in adlaw nga magkakanta in mga tawo, “Pagpasalamat han Ginoo! Tawga hiya hin pagbulig ha imo! Sumati han iya ginbuhat an ngatanan nga kanasoran! Sumati hira han iya pagkagamhanan!

⁵ Pagkanta ngadto han Ginoo tungod han makaaramdok nga mga butang nga iya ginbuhat. Igsumat ini ha bug-os nga kalibutan.

⁶ Pagoliata ngan pakantaha an ngatanan nga nag-uokoy didto ha Sion! Gamhanan an baraan nga Dyos han Israel, ngan nag-uokoy hiya tampo han iya mga tawo.”