Isaias 1 - Samarenyo Meaning-Based Bible (1984)

¹ Aanhi hini nga basahan an mga mensahe mahitungod han Juda ug Jerusalem nga iginpadayag han Dyos kan Isaias nga anak ni Amoz, ha panahon nga mga hadi han Juda hira Oseas, Jotam, Acas ug Ezequias.

Ginsaway han Dyos an Iya mga Tawo

² Nagsiring an Ginoo, “Tuna ug langit, pamatii an akon igyayakan! Sinmupil ha akon an mga anak nga akon ginmangnoan.

³ Maupay pa an baka kay nakilala han iya agaron ngan an asno nakilala han pasungan nga gintutubongan ha iya han agaron kundi an akon mga tawo, an Israel, diri maaram ngan diri nasabot.”

⁴ Maghihikaraot ka, ikaw nga makasasala nga nasod, kamo nga maghugaw ngan magraot nga mga tawo! Binubug-atan kamo han iyo mga sala! Ginsikway niyo an Ginoo nga baraan nga Dyos han Israel, ngan tinmalikod kamo ha iya.

⁵ Kay ano nga nagpapadayon kamo hin pagsupil? Karuyag ba niyo nga kastigohon pa kamo? Israel, luob na hin kasamdan an imo ulo, ngan masakiton an imo kasingkasing ug hunahuna.

⁶ Waray gud maupay nga bahin han imo lawas tikang ha alimpoporo ngadto ha rapadapa han imo tiil. Luob ka hin mga pilas, mga kaduntan, ngan mga kasamdan nga waray paglinisi, pagbutka ngan pagtambala.

⁷ Ginpuo an imo nasod ngan gin-ugtang an imo mga syudad. Ha imo atubangan ginrikupo hin mga lumalangyaw an imo tuna ngan ginpanruba an ngatanan nga mga butang.

⁸ An Jerusalem la an nahisalin, usa nga syudad nga ginsulong—nga waray panalipod sugad hin payag hin magmarangno hin urubasan, o hin sirongan didto hin uma hin mga pipino.

⁹ Kon waray itugot han Ginoo nga Labi Kamakagarahum nga mabuhi in pira nga mga tawo, napupukan gud an bug-os nga Jerusalem, sugad han Sodoma ug Gomora.

¹⁰ Mga tawo han Jerusalem, an iyo mga punoan ngan an iyo mga tawo sugad hadton mga taga Sodoma ug Gomora. Pamatii an igyayakan ha iyo han Ginoo. Pamatii an igtututdo ha iyo han aton Dyos.

¹¹ Nasiring hiya, “Naghuhunahuna ba kamo nga naruruyag ako hini ngatanan nga mga halad nga iyo gintutubod para ha akon? Sinusumhan na ako han mga karnero nga iyo gintutubod nga mga halad, ngan han mga tambok han iyo mag-upay nga mga hayop. Inuuyaman na ako han dugo han mga todo nga baka, mga karnero, ngan mga kanding.

¹² Hin-o ba an naghangyo ha iyo nga dad-on ha akon ini ngatanan kon makanhi kamo hin pagsingba ha akon? Hin-o an naghangyo ha iyo hini nga pagpasipara dinhe han akon Templo?

¹³ Waray la gamit an pagdara han iyo mga halad. Ikinangangalas ko an baho han insyenso nga iyo gintutubod. Diri na ako nakakailob han iyo mga Pyesta han Subang nga Bulan, han iyo mga Adlaw nga Iparahuway, ngan han iyo siringbahon nga katirok, nahugawan ini ngatanan han iyo mga sala.

¹⁴ Napupungot ako han iyo mga Pyesta han Subang nga Bulan ngan baraan nga mga adlaw; paras-anon ini nga ginugul-an na ako hin pagdinara.

¹⁵ “Kon bayawon niyo an iyo mga kamot ha pag-ampo, diri ako magkikita ha iyo. Magkadiano kadamo an iyo pag-ampo, diri ako mamamati, kay puros dugo an iyo mga kamot.

¹⁶ Paglinis kamo. Paukya na ini ngatanan nga magraot nga akon nakikita nga iyo ginbubuhat. Tinuod, ukoy na kamo hin pagbuhat hin maraot,

¹⁷ ngan pag-aram kamo hin pagbuhat hin maupay. Tinguhaa nga pagbuhaton an katadongan—buligi an mga gintatalumpigos, tagi han ira mga katungod an mga ilo, ngan panalipdi an mga balo nga kababayen-an.”

¹⁸ Nasiring an Ginoo, “Yana pagtuhay kita. Nadum-itan kamo hin pula tungod hin sala, kundi huhugasan ko kamo basi kamo magmalinis sugad hin gapas. Bisan kon an iyo mga dum-it lubos hin kapula, magmamabusag gud kamo sugad hin lubos kabusag nga barahibo hin karnero.

¹⁹ Kon magsugot la kamo ha akon, makaon kamo han mag-upay nga mga abot han tuna.

²⁰ Kundi kon umato kamo ha akon, magkakamatay kamo. Ako nga Ginoo an nagyakan.”

Ginsusnan an Makasasala nga Syudad

²¹ An syudad nga matinumanon hadto anay sugad na yana hin babaye nga maraot in dungog. Han una nga panahon puno ini hin magtadong nga mga tawo, kundi yana mga parapamatay nala an nahisasalen.

²² Jerusalem, sugad ka hin salapi hadto anay, kundi yana waray ka na pulos; sugad ka hin manamit nga bino, kundi yana tubig ka na la.

²³ Mga magsinupilon an imo mga pangulo ngan kasangkayan hira hin mga kawatan; dayuday nakarawat hira hin mga regalo ngan mga hukip. Diri gud nira pinananalipdan an mga ilo didto ha hukmanan, o pinamamatian an mga balo nga kababayen-an kon magsusumbong hira didto ha hukmanan.

²⁴ Sanglit pamatii yana an igyayakan han Ginoo nga Labi Kamakagarahum, an gamhanan nga Dyos han Israel; “Bubulson ko kamo nga akon mga kaaway, ngan diri na kamo makakasamok ha akon.

²⁵ Magios ako kontra ha iyo. Pagpupurogon ko kamo sugad han pagpurog hin metal, ngan kukuhaon ko an ngatanan nga iyo mga hugaw.

²⁶ Tatagan ko kamo yana hin mga pangulo ngan mga magsaragdon nga sugad hadton mga una nga panahon. Niyan tatawgon an Jerusalem nga matadong ngan matinumanon nga syudad.”

²⁷ Tungod nga matadong an Ginoo, tatalwason niya an Jerusalem ngan an ngatanan didto nga magbabasol.

²⁸ Kundi dudugmokon niya an ngatanan nga makakasala ngan masupil ha iya, pamamatayon niya an ngatanan nga masalikway ha iya.

²⁹ Magbabasol kamo nga nagsingba hin mga kahoy ngan nag-ataman hin baraan nga mga tanaman.

³⁰ Malalaya kamo sugad hin tikamaratay nga tuog, sugad hin tanaman nga diri natutubigan.

³¹ Sugad nga nasusuritan in mga uhot pinaagi hin sispas, mabubungkag man an gamhanan nga mga tawo pinaagi han ira kalugaringon nga magraot nga mga buhat, ngan waray bisan hin-o nga makakapugong han ira pagkabungkag.