Hageo 2 - Samarenyo Meaning-Based Bible (1984)

Matahom an Bag-o nga Templo

¹ Dida han ika-21 nga adlaw han ikapito nga bulan hito ngahaw nga tuig, naghimangraw na liwat an Ginoo pinaagi kan manaragna Hageo.

² Ginsiring niya hi Hageo nga maghimangraw hiya kanda Sorobabel nga gobernador han Juda, Josue nga Labaw nga Padi, ngan han mga tawo, hin pagsiring ha ira,

³ “May-ada ba usa ha iyo nga nahinumdom pa kon ano an kamatahom han Templo hadto anay? Ano na man ini yana ha iyo pagkita? Daw sugad hin waray la ini.

⁴ Kundi yana ayaw la kamo kahulop. Pagtrabaho la kamo kay kaupod ako niyo.

⁵ Han paggawas niyo ha Ehipto, nagsaad ako nga dayuday maupod ako ha iyo. Kaupod pa gihapon ako niyo, sanglit ayaw kamo kahadlok.

⁶ “Diri maiha, pagbabay-ogon ko an langit ug tuna, an kamad-an ug dagat.

⁷ Pupukanon ko an ngatanan nga kanasoran, ngan pagdadad-on ko nganhi an mga manggad hini, ngan mapupuno hin manggad an Templo.

⁸ Akon an ngatanan nga salapi ug bulawan han kalibutan.

⁹ Malabaw kamatahom an bag-o nga Templo kay han daan, ngan didto tatagan ko an akon mga tawo hin kauswagan ug kalinaw.” An Ginoo nga Labi Kamakagarahum an nagyakan.

Nagpakiana han Kapadian an Manaragna

¹⁰ Dida han ika-24 nga adlaw han ikasiyam nga bulan han ikaduha ka tuig nga emperador hi Dario, naghimangraw na liwat an Ginoo nga Labi Kamakagarahum kan manaragna Hageo.

¹¹ Nagsiring hiya, “Pangaroi an kapadian hin baton hini nga pakiana:

¹² Pananglit in usa ka tawo kumuha hin iginhalad nga karne tikang hin halad nga tinubod ngan dad-on ini nga pinutos han iya panapton nga hilawig, kon an iya panapton kasaghiran hin tinapay, linuto nga pagkaon, bino, lana hin olibo, o bisan ano nga pagkaon, mababaraan ba liwat ini nga pagkaon?” Han pagpakianhi han kapadian, binmaton hira, “Diri.”

¹³ Niyan nagpakiana hi Hageo, “Pananglit mahugawan in usa ka tawo kay kinmamkam hiya hin patay nga lawas, kon unina kumamkam hiya han bisan ano hini nga mga pagkaon, magmamahugaw ba liwat ini nga mga pagkaon?” Binmaton an kapadian, “Oo.”

¹⁴ Niyan nagsiring hi Hageo, “Nasiring an Ginoo nga ini ngahaw nga butang mahihimo ipahinungod han mga tawo hini nga nasod ngan han ngatanan nira nga mga abot; sanglit mahugaw an ngatanan nga ira ihinahalad dida han altar.”

Iginsaad han Ginoo an Iya Pagpakaupay

¹⁵ Nasiring an Ginoo, “Diri ba kamo nakita han nahinabo ha iyo? Han waray pa kamo magtikang hin pagtindog na liwat han Templo,

¹⁶ napakadto kamo hin tinambak nga pagkaon upod an paglaom nga makakaagi kamo hin napulo ka bakid, kundi lima la an iyo nakuha. Napakadto kamo hin pag-ipis hin 50 ka galon nga bino tikang hin barel, kundi 20 la an iyo naipis.

¹⁷ Ginpadara ko in nakakasunog nga mga hangin ngan in mga bato nga yelo hin pagdaot han ngatanan nga gintanom niyo, kundi waray gud gihapon kamo magbasol.

¹⁸ Ika-24 nga adlaw yana han ikasiyam nga bulan, an adlaw han kahuman han patukoranan han Templo. Kitaa niyo kon ano an mahinanabo tikang yana.

¹⁹ Bisan kon waray na nahisalin nga mga trigo ngan waray pa mamunga an mga ubas, an mga igos, an mga granada, ngan an mga olibo, kundi tikang yana pagpapakaupayon ko kamo.”

Nagsaad kan Sorobabel an Ginoo

²⁰ Dida hito manta nga adlaw nga ika-24 han bulan, iginhatag han Ginoo kan Hageo in ikaduha nga mensahe

²¹ para kan Sorobabel nga gobernador han Juda: “Pagbabay-ogon ko na an langit ug tuna,

²² ngan pupukanon ko an mga ginhadian ngan tataposon ko an ira mga gahom. Babalintongon ko an mga karuwahe ngan an mga paramaneho hini; magkakamatay an mga kabayo ngan magpapaunay-unay an mga nasakay hini.

²³ Dida hito nga adlaw kukuhaon ko ikaw, Sorobabel, nga akon surugoon, ngan tutudlokon ko ikaw hin paghadi ha akon ngaran. Ikaw amo an akon ginpili.” An Ginoo nga Labi Kamakagarahum an nagyakan.