Hageo 1 - Samarenyo Meaning-Based Bible (1984)

Nagsugo an Ginoo hin Pagtindog na Liwat han Templo

¹ Dida han ikaduha ka tuig nga emperador hi Dario han Persia han syahan nga adlaw han ikaunom nga bulan, naghimangraw an Ginoo pinaagi kan manaragna Hageo. Ini nga mensahe para han gobernador han Juda nga hi Sorobabel nga anak ni Salatiel, ngan para han Labaw nga Padi nga hi Josue nga anak ni Josadac.

² Nagsiring kan Hageo an Ginoo nga Labi Kamakagarahum, “Ini nga mga tawo nasiring nga diri amo ini an igo nga panahon hin pagtindog na liwat han Templo.”

³ Sanglit iginhatag han Ginoo ini nga mensahe ngadto han mga tawo pinaagi kan manaragna Hageo:

⁴ “Mga tawo ko, kay ano nga nag-iinukoy man kamo dida hin magtahom nga mga balay samtang ruba an akon Templo?

⁵ Diri ba kamo nakita han nahinanabo ha iyo?

⁶ Damo an iyo ginpugas, kundi gutiay gudla an iyo naani. May niyo pagkaon, kundi diri igo basi mabusog kamo. May niyo bino nga irimnon, kundi diri igo basi lumaksi kamo! May niyo panapton, kundi diri igo basi pasoan kamo. Ngan para han magburudlay diri igo an suhol hin pagbuhi ha iya.

⁷ Diri ba kamo nakakakita kay ano nga nahinabo ini?

⁸ Yana sagka kamo ngadto han kapungtoran, pamulod kamo hin mga kahoy, ngan tindoga na liwat niyo an Templo; niyan malilipay ako ngan pagsisingbahon ako niyo sugad han angay nga pagsingba ha akon.

⁹ “Naglaom kamo hin damo nga mga aranihon, kundi nahimo ini nga gutiay la. Ngan han pagdad-a na niyo han inani ngadto ha iyo balay, ginpalid ko ini. Kay ano nga ginbuhat ko ito? Kay guba an akon Templo, samtang an tagsatagsa ha iyo nalilibang hin pagbuhat han iya kalugaringon nga balay.

¹⁰ Sanglit waray uran, ngan waray naturok.

¹¹ May-ada huraw dida han tuna—dida han kapungtoran, han kaumhan nga iyo ginpugasan, han mga urubasan, ngan han mga tanaman hin olibo—dida han tagsa nga abot han tuna, han mga tawo ngan mga mananap, ngan han ngatanan nga gintanom niyo.”

Ginsugot han mga Tawo an Sugo han Ginoo

¹² Niyan gintuman nira Sorobabel ug Josue ngan han ngatanan nga mga tawo nga binmalik tikang ha pagkabihag didto ha Babilonia an ginpabuhat ha ira han Ginoo nga ira Dyos. Nahadlok hira ngan ginsugot nira hi manaragna Hageo nga magsarangyaw han Ginoo.

¹³ Niyan ginhatag ni Hageo an mensahe han Ginoo ngadto han mga tawo: “Maupod ako ha iyo—amo ito an akon saad.”

¹⁴ Gin-aghat han Ginoo an ngatanan hin pagtrabaho han Templo: hi Sorobabel nga gobernador han Juda; hi Josue nga Labaw nga Padi, ngan an ngatanan nga mga tawo nga binmalik tikang ha pagkabihag. Nagtikang hira pagtrabaho han Templo han Ginoo nga Labi Kamakagarahum, nga ira Dyos,

¹⁵ dida han ika-24 nga adlaw han ikaunom nga bulan han ikaduha ka tuig nga emperador hi Dario.