Habacuc 3 - Samarenyo Meaning-Based Bible (1984)

Nag-ampo hi Habacuc

¹ Pag-ampo ini ni Habacuc nga manaragna:

² O Ginoo, hinbatian ko an imo ginbuhat, ngan nahahadlok gud ako. Buhata na liwat yana nga mga panahon an dagko nga mga binuhatan nga imo ginbuhat hadto. Kalooyi kami bisan kon nasisina ka.

³ Maabot na liwat an Dyos tikang ha Edumea; maabot an baraan nga Dyos tikang han kapungtoran han Paran. Naluluob an kalangitan han iya himaya, ngan puno an tuna hin pagdayaw ha iya.

⁴ Makanhi hiya nga may kasilaw sugad hin kikidlat; naidlap in kapawa tikang han iya kamot, diin natatago an iya gahom.

⁵ Iya ginpapauna ha iya in sakit, ngan ginsusugo an kamatayon hin pagsunod ha iya.

⁶ Kon nahunong hiya, nababay-og an tuna; ha pagsiplat niya, nangungurog an mga nasod. Nawawakay an dayon nga kabukiran; nauunlod an waray kataposan nga kapungtoran, an kapungtoran nga iya ginlaktan hadto nga mga katuigan.

⁷ Hinkit-an ko an kahadlok han mga tawo han Cusan, ngan an pangurog han mga tawo han Madian.

⁸ An mga salog ba an nakapasina ha imo, O Ginoo? An dagat ba an nakapapungot ha imo? Sinmakay ka ha mga dampog; an maitom nga dampog amo an imo karuwahe han pagpadag-a mo han imo mga tawo.

⁹ Nag-andam ka hin paggamit han imo bawog, andam pagpalatos han imo mga pana. Ginbuka han imo kikidlat an tuna.

¹⁰ Nangurog an kabukiran han pakakita ha imo; binmuhos in tubig tikang ha kalangitan. Hinmaganas an katubigan ha ilarom han tuna, ngan hinmigtaas an mga balod.

¹¹ Han pag-idlap han imo maglaksi nga mga pana ngan han pagsilaw han imo mainggat nga bangkaw, hinmunong an adlaw ngan an bulan.

¹² Ginlatas mo an tuna ha imo kasina; gintamaktamakan mo an mga nasod ha imo kapungot.

¹³ Ginmawas ka hin pagtalwas han imo mga tawo, pagtalwas han imo pinili nga hadi. Ginpukan mo an pangulo han mga magraogdaog ngan ginpuo mo an iya mga sakop.

¹⁴ Gintahos han imo mga pana an kapitan han iya kasondalohan han pagsulong ha amon sugad hin alipuros basi magsarang kami, nga nalilipay sugad hadton mga nagraraogdaog hin sekreto han mga kablas.

¹⁵ Ginpatamaktamakan mo an dagat han imo kakabayohan, ngan nagbubura an mabalod nga katubigan.

¹⁶ Hinbabatian ko ini ngatanan ngan nangungurog ako; nangungurog hin kahadlok an akon mga im-im. Nahiraraptay an akon lawas, ngan nahipapakdol an akon mga tiil. Mahulat ako hin hilom han tiarabot nga panahon nga pagkakastigohon han Dyos adton mga nasulong ha amon.

¹⁷ Bisan kon waray mamunga an mga igos, ngan waray mamunga an mga ubas, bisan nakakawang an mga abot han olibo, ngan waray nahahatag nga aranihon an kaumhan, bisan nagkakamatay an ngatanan nga mga karnero ngan nawawaray sulod an mga toril hin kabakahan,

¹⁸ magmamalipayon ngan magrarayhak la gihapon ako, kay an Ginoo nga Dyos amo an akon magtaralwas.

¹⁹ Nahatag ha akon hin kusog an Ginoo nga Dyos. Ginpapalaksi niya an akon mga tiil sugad hin kanan bugsok ngan ginpapalakat ako nga waray kataragman dida han kabukiran.