Habacuc 2 - Samarenyo Meaning-Based Bible (1984)

Binmaton kan Habacuc an Ginoo

¹ Masaka ako han akon lantawan ngan maghuhulat ako kon ano an igsusumat ha akon han Ginoo ngan kon ano an iya igbabaton han akon sumbong.

² Ini an ibinaton ha akon han Ginoo: “Isurat hin klaro dida hin mga papan nga susuratan an akon igpapadayag ha imo, basi mabasa ini ha usa la ka pagsiplat.

³ Isurat ini, kay diri pa ini panahon nga matutuman ini. Kundi diri maiha maabot na an panahon ngan matutuman na an akon igpapakita ha imo. Daw mahinay an iya pag-abot, kundi hulata la ini; maabot gud ini ngan diri na maglalangan.

⁴ Ngan amo ini an mensahe: ‘Waray mabubuhi hadton mga magraot, kundi mabubuhi adton mga magtadong, kay mga magtinumanon hira sa Dyos.’”

Maghihikaraot an mga Diri Magtadong

⁵ Malimbong an manggad. Mapahitas-on ngan diri murayaw an halot nga mga tawo—sugad han kamatayon diri gud hira natunga. Sanglit ginsusunodsunod nira hin pagsulong han mga nasod para ha ira ngahaw.

⁶ An mga hindakpan nga mga tawo mag-uuyan-uyan hadton mga nagbihag ha ira ngan magdudumot hira. Masiring hira, “Kinukuha niyo an diri iyo, kundi maghihikaraot kamo! Tubtob san-o an iyo pagpinangusog nga magriko kamo pinaagi hin pagpirit niyo nga makabayad an mga nakautang ha iyo?”

⁷ Kundi ha diri pa niyo hinbabaroan ini, kamo nga nakabihag han iba makakautang man ngan mapipirit kamo hin pagbayad hin patubo. Maabot in mga kaaway ngan mangungurog kamo hin kahadlok. Paninikasan kamo nira!

⁸ Pinanikasan niyo an mga tawo hin damo nga mga nasod, kundi yana paninikasan kamo hadton mga nanhisalin nga buhi, tungod han mga panmatay nga iyo ginbuhat ngan tungod han iyo panlupig han mga tawo han kalibutan ngan han mga syudad hini.

⁹ Maghihikaraot kamo! Ginpariko niyo an iyo panimalay pinaagi han iyo nakuha dida hin panlupig, ngan gintalinguha niyo hin pagtalwas ha karat-an ug kataragman an iyo kalugaringon nga urokyan.

¹⁰ Kundi nakahatag an iyo magraot nga mga larang hin kaarawdan ngada han iyo panimalay; pinaagi hin pagbungkag niyo hin damo nga mga nasod, gindara niyo an iyo la ngahaw pagkapukan.

¹¹ Nagoliat kontra ha iyo bisan an mga bato han mga pader, ngan nag-aaningal an goliat ha mga baybayan han atop.

¹² Maghihikaraot kamo! Gintindog niyo in usa nga syudad pinaagi hin pagtalapas, ngan ginparig-on ini pinaagi hin panmatay.

¹³ Linmuya an mga nasod nga iyo ginsakop hin waray la pulos nga pagginuol, ngan naugtang la ha kalayo an ngatanan nga ira gintindog. Ginbuhat ini han Ginoo nga Labi Kamakagarahum.

¹⁴ Kundi maluluob an tuna han hibaro han himaya han Ginoo sugad nga puno hin tubig an kadagatan.

¹⁵ Maghihikaraot kamo! Ha iyo kapungot gintamay ngan ginpakaalohan niyo an iyo mga kahigrani; ginpariigdiig niyo hira nga daw sugad hin mga hubog hira.

¹⁶ Mapuputos man kamo hin kaawod, diri hin kadungganan. Mainom kamo ngan magririigdiig man liwat. Paiimnon kamo han Ginoo han iyo kalugaringon nga kopa hin kastigo, ngan mahihimo nga kaarawdan an iyo kadungganan.

¹⁷ Pinanmulod niyo an mga kagurangan han Libano; yana kamo naman an pagpupudlon. Pinanmatay niyo an kamanampan hini; yana paghahadlokon kamo hin kamanampan. Mahinanabo ini tungod han panmatay nga iyo nabuhat ngan tungod han iyo panlupig han mga tawo han kalibutan ngan han mga syudad hini.

¹⁸ Ano an gamit hin diyosdiyos? Butang la ini nga ginhimo hin tawo, ngan waray gud ini iginsusumat ha iyo kon diri mga buwa la. Ano nga kaupayan an nahihimo hini para han maghirimo hini nga nasarig man hiya hini—usa la nga diyos nga diri ngani nakakayakan!

¹⁹ Maghihikaraot kamo! Nasiring kamo ngada hin usa ka tipak nga kahoy, “Pagmata!” o ngada hin usa ka bug-os nga bato, “Bangon!” Makakagpadayag ba ngada ha imo hin bisan ano in usa nga diyosdiyos? Bangin pinutos ini hin salapi ug bulawan, kundi waray gud ini kinabuhi.

²⁰ Aada an Ginoo han iya baraan nga Templo; pamingawa ha iya atubangan an ngatanan dinhe ha tuna.