Ginpadayag 6 - Samarenyo Meaning-Based Bible (1984)

An mga Silyo

¹ Ngan hinkit-an ko an Kordero nga nagbubuong han syahan han pito nga mga silyo, ngan akon hinbatian an usa han upat nga buhi nga mga binuhat nga nagsiring ha dako nga tingog sugad hin kanan dalugdog, “Pakadi!”

² Kinmita ako hin busag nga kabayo. An nasakay han kabayo nagdadara hin pana ngan gintagan hin korona. Linmakat hiya sugad hin usa nga nagubat basi makadaog.

³ Ngan ginbuong han Kordero an ikaduha nga silyo, ngan nagsiring an ikaduha nga buhi nga binuhat, “Pakadi!”

⁴ Lain nga kabayo nga pula in ginmawas. An nasakay hini nga kabayo tinagan hin gahom hin pakig-away dinhe ha tuna, basi an mga tawo magpaunay-unay hin pagpatay. Gintagan hiya hin dako nga espada.

⁵ Niyan gibuong han Kordero an ikatulo nga silyo, ngan hinbatian ko an ikatulo nga buhi nga binuhat nga nasiring, “Pakadi!” Sinmiplat ako ngan hinkit-an ko in maitom nga kabayo. An nasakay hini nga kabayo nagdadara hin timbangan.

⁶ Hinbatian ko in tingog tikang han upat nga buhi nga mga binuhat nga nagsiring, “Usa ka litro nga trigo ngan tulo ka litro nga sebada an mapapalit han usa ka adlaw nga suhol han nagtrabaho. Kundi ayaw pagpasipad-i hin pagkarag han lana hin mga olibo ug han bino han mga ubas!”

⁷ Ngan ginbuong liwat han Kordero an ikaupat nga silyo, ngan hinbatian ko an ikaupat nga buhi nga binuhat nga nasiring, “Pakadi!”

⁸ Tinman-aw ako, ngan hinkit-an ko in mahinayon ug duason nga kabayo. An nasakay hini nga kabayo ginngaranan “Kamatayon” ngan nasunod duok ha iya luyo an Hades. Ihinatag ha ira an ikaupat nga bahin han tuna basi patayon nira an mga tawo pinaagi hin araway, gutom, sakit, ngan mga ihalas nga kamanampan.

⁹ Niyan ginbuong an Kordero an ikalima nga silyo ngan hinkit-an ko ha ubos han altar an mga kalag hadton mga pinanmatay tungod kay iginpasangyaw nira an pulong han Dyos ngan nagmatinumanon hira han ira pagsaksi.

¹⁰ Naggoliat hira ha dako nga tingog, “Ginoo nga Labi Kamakagarahum, baraan ngan matuod! Maiha pa ba an imo paghukom ngan pagsirot han mga tawo dinhe ha tuna, tungod han pagpataya nira ha amon?”

¹¹ An kada usa ha ira tinagan hin busag nga hilaba nga bado ngan gintugon hira hin pagpahuway la anay, tubtob nga maigo na an kadamoon han ira igkasi surugoon ngan kabugtoan nga pamamatayon sugad ha ira.

¹² Ngan hinkit-an ko nga ginbuong han Kordero an ikaunom nga silyo. Linminog hin makusog ngan nagmadulom an adlaw sugad hin dugnit nga maitom, ngan an bulan nagmapula sugad hin dugo.

¹³ Nagkahuglog ha tuna an mga bitoon ha langit, sugad hin hilaw pa nga mga igos nga nagkakahuglog kon binabay-og hin makusog nga hangin.

¹⁴ Nawara an langit sugad hin linukot nga basahan, ngan an tagsa nga bukid ug puro nagkababalhin tikang han ira hinmumutangan.

¹⁵ Nanago ha mga lungib ngan mga pangpang han kabukiran an mga hadi han tuna, an mga punoan, an mga pangulo han kasondalohan, an mga salapian ngan mga gamhanan, ngan an ngatanan nga iba nga mga tawo, oripon ug talwas.

¹⁶ Ginsiring nira an kabukiran ngan kababtoan, “Tak-opi ngan tagoa kami tikang han mga mata han nalingkod han trono, ngan tikang han kapungot han Kordero!

¹⁷ An makalilisang nga adlaw han ira kapungot aanhi na, ngan hin-o in makakailob hini?”