Genesis 9 - Samarenyo Meaning-Based Bible (1984)

May Ginsaaran an Dyos kan Noe

¹ Ginbendisyonan han Dyos hi Noe ngan an iya mga anak nga kalalaken-an ngan ginsiring niya, “Magdamo unta an iyo mga anak, basi makaluob an iyo mga tulin han bug-os nga tuna.

² Mahahadlok ha iyo an ngatanan nga kamanampan, katamsihan, ug kaisdaan. Itinutubyan ko ini ngatanan ha ubos han iyo gahom.

³ Yana iyo na makakaon ini nga mga mananap sugad man an mga utanon; ihinahatag ko ini ngatanan para hin pagkaon niyo.

⁴ Kinahanglan diri niyo pagkaonon an karne nga dugoan pa; igindidiri ko ini kay aada han dugo an kinabuhi.

⁵ Kakastigohon an bisan hin-o nga magpatay hin tawo. Pagpapatayon an bisan ano nga mananap nga magpatay hin tawo.

⁶ Ginhimo an tawo nga sugad han Dyos, sanglit pagpapatayon man han iya igkasi-tawo an bisan hin-o nga magpatay hin tawo.

⁷ “Kinahanglan magkamay-ada kamo damo nga mga anak, basi makaluob an iyo mga tulin han bug-os nga tuna.”

⁸ Nagsiring an Dyos kan Noe ngan han iya mga anak nga kalalaken-an,

⁹ “Ginhihimo ko yana an akon ginsaaran ha iyo ngan ha iyo mga tulin,

¹⁰ ngan ha ngatanan nga buhi nga mga binuhat—ha ngatanan nga katamsihan ngan ngatanan nga kamanampan—ha ngatanan nga ginmawas tikang han arka upod ha iyo.

¹¹ Ginhihimo ko ha iyo an akon ginsaaran pinaagi hini nga mga pulong: nagsasaad ako nga diri ko na gud pagpupuohon pinaagi hin lunop an ngatanan nga buhi nga mga binuhat; diri na gud pagbubungkagon an tuna pinaagi hin lunop.

¹² Sugad nga tigaman han akon dayon nga ginsaaran nga akon ginhihimo ha iyo ngan ha ngatanan nga buhi nga mga binuhat,

¹³ ibinubutang ko an akon balangaw didto han mga dampog. Magigin tigaman ini han akon ginsaaran nga akon ginhimo han kalibutan.

¹⁴ Ha kada pagtitirok hin mga dampog ha langit, ngan nagpapakita an balangaw,

¹⁵ mahinunumdoman ko an akon saad ngada ha iyo ngan ngadto han ngatanan nga kamanampan, nga diri ko na gud pagpupuohon pinaagi hin lunop an ngatanan nga buhi nga mga binuhat.

¹⁶ Kon magpakita an balangaw didto han mga dampog, hikikit-an ko ini ngan mahinunumdom ako han dayon nga ginsaaran nakon ngan han ngatanan nga buhi nga mga binuhat ha bawbaw han tuna.

¹⁷ Amo ito an tigaman han saad nga akon ginhihimo ngadto han ngatanan nga buhi nga mga binuhat.”

Nagtagna hi Noe hiunong han Iya mga Anak nga Kalalaken-an

¹⁸ An mga anak nga kalalaken-an ni Noe nga nagkagawas han arka amo hira Sem, Ham, ug Jafet. (Amo hi Ham an amay ni Canaan.)

¹⁹ Ini nga tulo nga mga anak nga kalalaken-an ni Noe amo an ginikanan han ngatanan nga mga tawo ha tuna.

²⁰ Hi Noe nga usa nga parauma, amo an syahan nga tawo nga nag-uma hin urubasan.

²¹ Katapos niya pag-inom han bino, nahubog hiya, naglubas han iya panapton, ngan hinmigda nga hubo didto han iya tulda.

²² Han pakakita ni Ham nga amay ni Canaan, nga hubo an iya amay, ginmawas hiya ngan ginsumatan niya an iya duha nga kabugtoan nga kalalaken-an.

²³ Niyan kinmuha hira Sem ug Jafet hin hilawig nga panapton ngan ginbitad ini nga inunat dida han ira mga sugbong. Nagtipaisol hira hin paglakat ngadto han tulda ngan gintahoban nira an ira amay nga nalingiw hira basi diri hira kumita ha iya nga hubo.

²⁴ Han kahawhawi na kan Noe ngan han paghibaro niya han ginbuhat ha iya han iya puto nga lalake,

²⁵ nagsiring hiya, “Higabaan unta hi Canaan! Maooripon hiya han iya kabugtoan nga kalalaken-an.

²⁶ Pagdayawon an Ginoo nga Dyos ni Sem! Magigin oripon ni Sem hi Canaan.

²⁷ Pagpadamoon unta han Dyos hi Jafet! Mag-ukoy unta an iya mga tulin upod han mga tawo ni Sem! Magigin oripon ni Jafet hi Canaan.”

²⁸ Katapos han lunop, nabuhi pa hi Noe hin 350 ka tuig,

²⁹ ngan namatay hiya ha panuigon nga 950.