Genesis 8 - Samarenyo Meaning-Based Bible (1984)

Natapos an Lunop

¹ Waray mahingalimot an Dyos kan Noe ngan han ngatanan nga kamanampan nga kaupod niya didto han arka. Ginpahuyop niya in usa nga hangin ngan nagtikang hin paghubas an tubig.

² Ginsadhan an mga burabod han katubigan ha kahiladman han tuna ngan an mga ganghaan han uran didto ha langit. Inmukoy an uran,

³ ngan naghinayhinay hin paghubas an tubig sulod hin 150 ka adlaw.

⁴ Dida han ika 17 nga adlaw han ikapito nga bulan nahisangya an arka didto hin usa nga bukid didto han kabukiran han Ararat.

⁵ Nagpadayon hin paghubas an tubig, ngan dida han syahan nga adlaw han ika 10 nga bulan pinmakita an mga pungkay han kabukiran.

⁶ Katapos hin 40 ka adlaw ginbuksan ni Noe in usa nga bintana

⁷ ngan ginpagawas in usa nga uwak. Waray ini bumalik, kundi naglinupadlupad la ini tubtob han paghubas na gud han tubig.

⁸ Hito ngahaw nga takna ginpagawas ni Noe in usa nga sarapati hin pagkita kon hinmubas na an tubig,

⁹ kundi tungod nga natatahoban pa han tubig an tuna, waray makaagi an sarapati hin iya sadang kahugdonan. Binmalik ini ngadto han arka ngan kinaptan ini ni Noe ngan isinulod ngahaw ini han arka.

¹⁰ Naghulat hiya hin pito pa ka adlaw ngan ginpagawas na liwat an sarapati.

¹¹ Binmalik ini ha iya han pagkagab-i nga nakakabanga hin lapyo pa nga dahon hin olibo. Sanglit nakasabot hi Noe nga hinmubas na an tubig.

¹² Niyan naghulat hiya hin pito pa ka adlaw ngan ginpagawas na liwat niya an sarapati; hini nga takna, waray na ini bumalik.

¹³ Han 601 na an panuigon ni Noe, dida han syahan nga adlaw han syahan nga bulan, hinmubas na gud an tubig. Kinuha ni Noe an tahob han arka, tinman-aw hiya ha palibot ngan hinkit-an niya nga nagtitikamara na an tuna.

¹⁴ Dida han ika 27 nga adlaw han ikaduha nga bulan, mamara na gud an tuna.

¹⁵ Nagsiring an Dyos kan Noe,

¹⁶ “Gawas na han arka upod an imo asawa, an imo mga anak, ngan an ira kaasaw-an.

¹⁷ Pagawsa an ngatanan nga katamsihan ngan kamanampan, basi magdamo ngan magsarang ini ha bug-os nga tuna.”

¹⁸ Sanglit ginmawas han arka hi Noe upod an iya asawa, an iya mga anak, ngan an ira kaasaw-an.

¹⁹ Nagkagawas han arka an ngatanan nga kamanampan ug katamsihan nga burunyog dida han tagsa nira nga panon.

Naghalad hi Noe

²⁰ Nagtindog hi Noe hin usa nga altar ngadto han Ginoo. Kinmuha hiya hin usa han tagsa nga mananap ug tamsi nga malinis para hin paghalad ngan gintubod ini hin bug-os dida han altar.

²¹ Hinamotan an Ginoo han alimyon han halad, ngan nagsiring hiya ha iya ngahaw, “Diri ko na gud tutunglohon an tuna tungod han binubuhat han tawo; maaram ako nga tikang pa han iya pagkabata maraot na an iya mga panhunahuna. Diri ko na gud pagpupuohon an ngatanan nga buhi nga mga binuhat sugad han akon ginbuhat yana.

²² Samtang aada pa an kalibutan, magkakamay-ada panahon hin pagtanom ngan panahon hin pag-ani. Dayuday magkakamay-ada kathagkot ngan katsirak, kathuraw ngan kat-uran, kaadlawon ngan kagab-ihon.”