Genesis 7 - Samarenyo Meaning-Based Bible (1984)

Inmabot an Lunop

¹ Nagsiring an Ginoo kan Noe, “Sulod ngadto han arka upod an imo bug-os nga panimalay. Hinkit-an ko nga ikaw gudla dinhe ha bug-os nga kalibutan an matadong nga tawo.

² Pagdara hin pito ka padis han tagsa nga mananap nga malinis para hin paghalad kundi usa la ka padis han tagsa nga mananap nga mahugaw.

³ Pagdara liwat hin pito ka padis han tagsa nga tamsi. Buhata ini basi mabuhi an tagsa nga mananap ug tamsi ngan diri hira mapuo dinhe han tuna.

⁴ Kahuman hin pito ka adlaw tikang yana, pauuranon ko hin waray hunong sulod hin 40 ka adlaw ug gab-i, basi mapuo an ngatanan nga buhi nga mga binuhat nga akon ginhimo.”

⁵ Ngan gintuman ni Noe an ngatanan nga iginsugo han Dyos.

⁶ Unom ka gatos na an panuigon ni Noe han paglunopi han tuna.

⁷ Sinmulod ngadto han arka hi Noe ngan an iya asawa ngan an iya mga anak nga kalalaken-an ngan an ira kaasaw-an basi diri hira mamatay han lunop.

^8-9 Sinmulod ngadto han arka sumala han iginsugo han Dyos in lalaki ngan babayi han tagsa nga mananap ug tamsi, magin malinis ini o diri.

¹⁰ Paglabay hin pito ka adlaw, inmabot an lunop.

¹¹ Han 600 na an panuigon ni Noe, dida han ika-17 nga adlaw han ikaduha nga bulan, binmukal pag-awas an ngatanan nga mga burabod han dako nga katubigan ha kahiladman han tuna, nabuksan ha langit an ngatanan nga mga ganghaan han uran,

¹² ngan inmuranos ha tuna sulod hin 40 ka adlaw ug gab-i.

¹³ Hito ngahaw nga adlaw, sinmulod ngadto han arka hi Noe ngan an iya asawa upod an tulo nira nga mga anak, hira Sem, Ham, ug Jafet ngan an ira kaasaw-an.

¹⁴ Upod ha ira sinmulod an tagsa nga mananap, ihayop ngan ihalas, dagko ngan gudti, ngan an tagsa nga tamsi.

¹⁵ Inmupod kan Noe ngadto han arka in usa nga lalaki ngan usa nga babayi han tagsa nga buhi nga binuhat,

¹⁶ sumala han iginsugo han Dyos. Ngan ginsadhan han Ginoo an porta han arka.

¹⁷ Nagpadayon an lunop sulod hin kwarenta ka adlaw, ngan hinmilarom an tubig hin pagpalutaw han sakayan.

¹⁸ Nagtikahilarom an tubig, ngan igin-anod-anod an sakayan ha bawbaw han tubig.

¹⁹ Hinmilarom gud an tubig ngan linmapwas han labi ka higtaas nga kabukiran.

²⁰ Nagpadayon hin pagtubo an tubig tubtob nga inmabot ini hin mga pito ka metros an kahilarom ha bawbaw han pungkay han kabukiran.

²¹ Nagkamatay an tagsa nga buhi nga binuhat ha tuna—an tagsa nga tamsi, tagsa nga mananap, ngan tagsa nga tawo.

²² Nagkamatay an ngatanan nga buhi dinhe ha tuna.

²³ Ginpuo han Ginoo an ngatanan nga buhi nga mga binuhat dinhe han tuna—an mga tawo, kamanampan, ngan katamsihan. Hi Noe ngan adton mga kaupod la niya didto han arka an nahisalin nga buhi.

²⁴ Waray magtikang hin paghubas an tubig sulod hin 150 ka adlaw.