Genesis 6 - Samarenyo Meaning-Based Bible (1984)

Nagbuhat hin Maraot gud an Tawo

¹ Hadto nga panahon nagdamo na an mga tawo ha bug-os nga kalibutan, ngan may-ada nira mga anak nga kababayen-an.

² Hinkit-an hin pira nga mga langitnon nga binuhat nga maghusay ini nga kababayen-an, sanglit pinangasawa nira an ira naruyagan.

³ Niyan nagsiring an Ginoo, “Diri ako matugot nga mabuhi hin kadayonan an mga tawo kay may-ada nira kamatayon. Tikang yana diri na hira mabubuhi kapin hin 120 ka tuig.”

⁴ Hadto nga mga adlaw, ngan bisan ha orhe na, may-ada mga higante dinhe ha tuna, nga mga tulin hin kababayen-an nga sugad ha aton ngan hin mga langitnon nga mga binuhat. Amo hira an mga gamhanan ngan bantogan nga kalalaken-an hadto nga kadaan nga panahon.

⁵ Han pakasabot han Ginoo nga uraura na hin kamagraot an ngatanan nga mga tawo ha tuna, ngan dayuday mangil-ad an ira mga panhunahuna,

⁶ nagbasol hiya nga iya ginhimo hira ngan iginbutang hira dinhe han tuna. Dako gud an iya pagbasol,

⁷ sanglit nakasiring hiya, “Pagpupuohon ko ini nga mga tawo nga akon gintuha, pati an kamanampan, ngan an katamsihan, kay nagbabasol ako nga ginhimo ko hira.”

⁸ Kundi hi Noe nakalipay han Ginoo.

Ginsugo han Dyos hi Noe

^9-10 Amo ini an susumaton mahitungod kan Noe. May-ada hiya tulo nga mga anak nga kalalaken-an: hira Sem, Ham, ug Jafet. Matadong nga tawo hi Noe ha atubangan han Dyos ngan maupay gud nga tawo hadto nga panahon. Nag-ukoy hiya hin kinabuhi nga nakalipay han Dyos,

¹¹ kundi magraot gud an ngatanan nga iba nga mga tawo ha atubangan han Dyos, ngan nakaluob na an ira kamaraot ha ngatanan nga dapit.

¹² Kinmita an Dyos han kalibutan ngan hinsabotan niya nga maraot gud ini, kay diri na matadong an kinabuhi han ngatanan nga mga tawo.

¹³ Nagsiring an Dyos kan Noe, “Karuyag ko na gud pagpuo han ngatanan nga mga tawo. Pagpupuohon ko hira, kay puno na an kalibutan han ira magraot nga mga binuhatan.

¹⁴ Paghimo hin arka para ha imo ngahaw tikang hin pinili nga kahoy; himoi ini hin mga kwarto, ngan buliha ini hin alkitran ha sulod ngan ha gawas.

¹⁵ Himoa ini nga 133 ka metros an kahilaba, 22 ka metros an kahiluag, ngan 13 ka metros an kahitaas.

¹⁶ Himoi hin atop an arka, ngan lat-angi hin 44 ka sentimetros tikang han atop ngada han mga ligid han arka. Himoa ini nga tulo ka andana, ngan butangi hin porta dida han kagiliran hini.

¹⁷ Magpapadara ako hin lunop dinhe han tuna basi mapuo an ngatanan nga buhi nga mga binuhat. Magkakamatay an ngatanan dinhe ha tuna,

¹⁸ kundi maghihimo ako ha imo hin ginsabotan. Sulod ikaw ngadto han arka upod an imo asawa, an imo mga anak nga kalalaken-an, ngan an ira kaasaw-an.

^19-20 Pagdara upod ha imo ngadto han arka hin lalaki ngan hin babayi han ngatanan nga magkalainlain nga mga mananap, ngan han ngatanan nga magkalainlain nga tamsi, basi diri hira mapuo.

²¹ Pagdara han ngatanan nga magkalainlain nga pagkaon para ha imo ngan para ha ira.”

²² Ginbuhat ni Noe an ngatanan nga iginsugo han Dyos.