Genesis 5 - Samarenyo Meaning-Based Bible (1984)

Amo Ini an mga Tulin ni Adan

¹ Amo ini an lista han mga tulin ni Adan. (Han pagtuhaa han Dyos han mga tawo, iya ginhimo hira nga ladawan han Dyos.

² Iya gintuha hira nga lalake ug babaye, ginbendisyonan hira, ngan ginngaranan hira nga “Tawo”.)

³ Han 130 na an panuigon ni Adan, nagkamay-ada hiya usa nga anak nga lalake nga supo gud ha iya, ngan iya ginngaranan nga Set.

⁴ Kahuman katawo ni Set, nabuhi pa hi Adan hin 800 ka tuig. May-ada pa hiya iba nga mga anak,

⁵ ngan namatay hiya ha panuigon nga 930.

⁶ Han 105 na hi Set, nagkamay-ada hiya anak nga lalake nga hi Enos,

⁷ ngan nabuhi pa hi Set hin 807 ka tuig. May-ada pa hiya iba nga mga anak,

⁸ ngan namatay hiya ha panuigon nga 912.

⁹ Han 90 na hi Enos, nagkamay-ada hiya anak nga lalake nga hi Kenan,

¹⁰ ngan nabuhi pa hi Enos hin 815 ka tuig. May-ada pa hiya iba nga mga anak,

¹¹ ngan namatay hiya ha panuigon nga 905.

¹² Han 70 na hi Kenan, nagkamay-ada hiya anak nga lalake nga hi Mahalalel,

¹³ ngan nabuhi pa hi Kenan hin 840 ka tuig. May-ada pa hiya iba nga mga anak,

¹⁴ ngan namatay hiya ha panuigon nga 910.

¹⁵ Han 65 na hi Mahalalel, nagkamay-ada hiya anak nga lalake nga hi Jared,

¹⁶ ngan nabuhi pa hi Mahalalel hin 830 ka tuig. May-ada pa hiya iba nga mga anak,

¹⁷ ngan namatay hiya ha panuigon nga 895.

¹⁸ Han 162 na hi Jared, nagkamay-ada hiya anak nga lalake nga hi Enoc,

¹⁹ ngan nabuhi pa hi Jared hin 800 ka tuig. May-ada pa hiya iba nga mga anak,

²⁰ ngan namatay hiya ha panuigon nga 962.

²¹ Han 65 na hi Enoc, nagkamay-ada hiya anak nga lalake nga hi Matusalem.

²² Kahuman katawo ni Matusalem, hi Enoc nag-ataman han Dyos sulod hin 300 ka tuig, ngan nagkamay-ada hiya iba pa nga mga anak.

²³ Nakaabot hiya hin panuigon nga 365.

²⁴ Nag-ataman hiya han Dyos ha bug-os niya nga kinabuhi ngan katapos waray na hikit-i hiya, kay ginkuha hiya han Dyos.

²⁵ Han 187 na hi Matusalem, nagkamay-ada hiya anak nga lalake nga hi Lamec,

²⁶ ngan nabuhi pa hi Matusalem hin 782 ka tuig. May-ada pa hiya iba nga mga anak,

²⁷ ngan namatay hiya ha panuigon nga 969.

²⁸ Han 182 na hi Lamec, nagkamay-ada hiya anak nga lalake,

²⁹ ngan nagsiring hiya, “Tikang han tuna nga gintunglo han Ginoo, ini nga bata amo an makakahatag hin pahalibway han ngatanan naton nga magkuri nga mga buruhaton”; sanglit iya ginngaranan ini nga bata nga Noe.

³⁰ Nabuhi pa hi Lamec hin 595 ka tuig. May-ada pa hiya iba nga mga anak,

³¹ ngan namatay hiya ha panuigon nga 777.

³² Han pag-abot ni Noe hin panuigon nga 500, nagkamay-ada hiya tulo nga mga anak nga kalalaken-an: hira Sem, Ham, ug Jafet.