Genesis 46 - Samarenyo Meaning-Based Bible (1984)

Kinmadto ha Ehipto hi Jacob ngan an Iya Panimalay

¹ Namutos ni Jacob han ngatanan nga iya mga hiagi ngan kinmadto hiya ha Berseba, diin naghalad hiya hin mga halad nga tinubod ngadto han Dyos ni Isaac nga iya amay.

² Naghimangraw ha iya an Dyos dida hin usa nga panan-awon ha gab-i ngan nagtawag, “Jacob, Jacob!” Binmaton hiya, “Oo, aadi ako.”

³ “Amo ako an Dyos nga Dyos han imo amay,” nagsiring an Dyos. “Ayaw kahadlok hin pagkadto ha Ehipto; didto hihimoon ko nga dako nga nasod an imo mga tulin.

⁴ Maupod ako ha imo ngadto ha Ehipto ngan igbabalik ko an imo mga tulin nganhi hini nga tuna. Aada ha imo kagiliran hi Jose kon mamatay ka.”

⁵ Ginmikan hi Jacob tikang ha Berseba. Ginpasakay han iya mga anak hiya, an ira kabataan, ngan an ira kaasaw-an dida han mga karomata nga ginpadara han hadi han Ehipto.

⁶ Gindara nira an ira mga hayop ngan an mga hiagi nga naangkon nira didto ha Canaan, ngan kinmadto hira ha Ehipto. Ginpaupod ni Jacob an ngatanan niya nga mga tulin:

⁷ an iya mga anak nga kalalaken-an ngan mga apo nga kalalaken-an, ngan an iya mga anak nga kababayen-an ngan mga apo nga kababayen-an.

⁸ Amo ini an mga kaapi han panimalay ni Jacob nga inmupod ha iya ngadto ha Ehipto: an gimamagurangi nga anak ni Jacob nga hi Ruben,

⁹ ngan an mga anak nga kalalaken-an ni Ruben: hira Hanoc, Falu, Hesron, ug Carmi.

¹⁰ Hi Simeon ngan an iya mga anak: hira Jemuel, Jamin, Ohad, Jaquin, Zohar, ug Saul nga anak hin babaye nga Canaanhon.

¹¹ Hi Levi ngan an iya mga anak: hira Gerson, Coat, ug Merari.

¹² Hi Juda ngan an iya mga anak: hira Sela, Peres, ug Sera (namatay didto ha Canaan an iba nga mga anak ni Juda nga hira Er ug Onan). Hira Hesron ug Hamul nga mga anak ni Peres.

¹³ Hi Isacar ngan an iya mga anak: hira Tola, Pua, Jasub, ug Simron.

¹⁴ Hi Zabulon ngan an iya mga anak: hira Sered, Elon, ug Jaleel.

¹⁵ Amo ini an mga anak nga kalalaken-an nga igin-anak nira Lea ug Jacob didto ha Mesopotamia, labot kan Dina nga iya anak nga babaye. Naabot hin 33 ngatanan nga mga tulin nira Jacob ug Lea.

¹⁶ Hi Gad ngan an iya mga anak: hira Sifeon, Hagi, Suni, Ezbon, Eri, Arod, ug Areli.

¹⁷ Hi Aser ngan an iya mga anak: hira Jimna, Isva, Isvi, Beria, ug hi Sera nga ira bugto nga babaye. Hira Heber ug Malkiel nga mga anak ni Beria.

¹⁸ Amo ini nga 16 an mga tulin nira Jacob ug Zilpa nga oripon nga babaye nga iginhatag ni Laban kan Lea nga iya anak.

¹⁹ Nag-anak hira Raquel ug Jacob hin duha nga lalake: hira Jose ug Benjamin.

²⁰ May duha nga mga anak nga kalalaken-an hi Jose didto ha Ehipto: hira Manases ug Efraim, pinaagi kan Asenat nga anak ni Potifera nga padi didto ha Heliopolis.

²¹ Hira Bela, Bequer, Asbel, Gera, Naaman, Ehi, Ros, Mupim, Hupim, ug Ard nga mga anak ni Benjamin.

²² Amo ini nga 14 an mga tulin nira Jacob ug Raquel.

²³ Hi Dan ngan hi Husim nga iya anak.

²⁴ Hi Neftali ngan an iya mga anak: hira Jazeel, Guni, Jezer, ug Silem.

²⁵ Amo ini nga pito an mga tulin nira Jacob ug Bilha nga oripon nga babaye nga iginhatag ni Laban kan Raquel nga iya anak.

²⁶ Sesenta y seis ka tawo ngatanan an mga tulin ni Jacob nga kinmadto ha Ehipto, waray labot han kaasaw-an han iya mga anak.

²⁷ Natawo kan Jose didto ha Ehipto in duha nga mga anak nga kalalaken-an, ngan naabot hin 70 ka tawo ngatanan han panimalay ni Jacob an kinmadto ha Ehipto.

Inmabot ha Ehipto hi Jacob ngan an Iya Panimalay

²⁸ Ginpauna ni Jacob hi Juda hin paghangyo kan Jose nga tapoon hira didto ha Gosen. Han pag-abot la nira,

²⁹ sinmakay hi Jose han iya karwahe ngan kinmadto ha Gosen hin pagtapo han iya tatay. Han pagkatapo nira, hinangkopan ni Jose an iya tatay ngan nagtinangis hiya hin maiha.

³⁰ Nagsiring hi Jacob kan Jose, “Andam na ako hin kamatay, yana nga hinkit-an ko na ikaw ngan maaram na ako nga buhi ka pa ngay-an.”

³¹ Niyan nagsiring hi Jose ha iya kabugtoan ngan ha iba nga mga kaapi han panimalay han iya amay, “Kinahanglan kumadto ako ngan pagsumatan ko an hadi nga inmabot na ha akon an akon kabugtoan ngan an ngatanan nga mga kaapi han panimalay han akon amay nga nag-ukoy didto ha Canaan.

³² Susumatan ko hiya nga mga magmarangno kamo hin mga karnero ngan nagmamangno kamo hin mga hayop, ngan iyo gindara an iyo mga panon hin mga karnero ngan mga baka ngan an ngatanan nga mga hiagi ug manggad.

³³ Kon tawgon kamo han hadi ngan magpakiana kon ano an iyo pagpakabuhi,

³⁴ sumati hiya hin tinuod nga magmarangno kamo hin mga hayop ha bug-os niyo nga kinabuhi, sugad han ginbuhat han iyo kaapoy-apoyan. Dida hini nga paagi pauokyon kamo niya didto han katunaan han Gosen.” Ginsiring ini ni Jose kay diri gud karuyag an mga Ehiptohanon hin mga magmarangno hin mga karnero.