Genesis 33 - Samarenyo Meaning-Based Bible (1984)

Iginkakita hi Jacob kan Esau

¹ Hinkit-an ni Jacob hi Esau nga tiarabot upod an iya 400 nga mga tawo, sanglit ginbahinbahin niya an iya mga anak kanda Lea, Raquel, ngan han duha nga mga aruasawa.

² Ginpauna niya an mga aruasawa ngan an ira mga anak; sunod hi Lea ngan an iya mga anak, ngan ha orhe na hira Raquel ug Jose.

³ Nag-una ha ira hi Jacob ngan hinmapa hiya ha tuna hin makapito han tikaharani na hiya han iya bugto.

⁴ Kundi dinmalagan hi Esau hin pagtapo ha iya, ginggakos, ngan ginhadkan hiya. Nagtangis hira nga duha.

⁵ Han pagtan-aw ni Esau ngan han paghikit-i niya han kababayen-an ngan han kabataan, pinmakiana hiya, “Hin-o ini nga mga tawo nga upod mo?” Binmaton hi Jacob, “Amo ini, Mano an mga anak nga iginhatag ha akon han Dyos tungod han iya kamaupay.”

⁶ Niyan dinmaop an mga aruasawa upod an ira mga anak ngan yinmukbo hira.

⁷ Niyan dinmaop hi Lea ngan an iya mga anak, ngan ha kataposan dinmaop hira Jose ug Raquel ngan yinmukbo liwat hira.

⁸ Pinmakiana hi Esau, “Ano man adto nga una nga hugpo nga akon iginkatapo? Ano man an karuyag sidngon hadto?” Binmaton hi Jacob, “Akon adto hatag nga pahalipay ha imo.”

⁹ Kundi nagsiring hi Esau, “Bugto ko, igo na kadamo an akon hiagi; tipigi na la an imo.”

¹⁰ Nagsiring hi Jacob, “Ayaw gad, kon nakapahalipay man ako ha imo, karawta gad an akon regalo. Para ha akon, an pakakita han imo bayhon, sugad hin pakakita han bayhon han Dyos, yana nga nakigsangkay ka na ha akon.

¹¹ Karawta gad ini nga regalo nga akon gindara para ha imo; nagmaloloy-on ha akon an Dyos ngan gintagan ako han ngatanan nga akon kinahanglan.” Nagpadayon hi Jacob hin paghangyo ha iya tubtob nga kinarawat ni Esau an iya mga regalo.

¹² Nagsiring hi Esau, “Pag-andam kita ngan pagkalakat. Mag-uuna ako ha imo.”

¹³ Binmaton hi Jacob, “Maaram ka man nga magluya pa an kabataan, ngan kinahanglan pag-alagyamon ko an mga karnero ug mga baka upod an ira mga nati. Mapatay an bug-os nga panon kon pagpugson hin paglakat hin bisan usa la ka adlaw.

¹⁴ Pag-una na la ha akon ngan masunod ako hin hinayhinay, ngan aalagdon ko sugad han mahihimo han mga baka ngan han kabataan tubtob nga hiabtan ko ikaw didto ha Edom.”

¹⁵ Nagsiring hi Esau, “Niyan tugoti ako nga igbilin ko ha imo in pira han akon mga tawo.” Kundi binmaton hi Jacob, “Diri na ito kinahanglan, kay karuyag ko la nga malipay ka ha akon.”

¹⁶ Sanglit hito nga adlaw ginmikan hi Esau hin pagbalik ngadto ha Edom.

¹⁷ Kundi kinmadto hi Jacob ha Sucot diin nagbalay hiya para ha iya ngahaw ngan naghimo hin mga sirongan para han iya mga baka. Sanglit ginngaranan nga Sucot an dapit.

¹⁸ Han iya pagbalik tikang ha Mesopotamia, inmabot hi Jacob hin waray ano man nga nahinabo ngadto han syudad han Siquem, didto ha tuna han Canaan, ngan nagkampo hiya didto hin usa nga uma nga hirani han syudad.

¹⁹ Ginpalit niya adto nga bahin han uma hin 100 ka bug-os nga salapi tikang han mga tulin ni Hamor nga amay ni Siquem.

²⁰ Nagtindog hiya hin usa nga altar didto ngan ginngaranan ini nga El, an Dyos han Israel.