Genesis 3 - Samarenyo Meaning-Based Bible (1984)

Waray Magsugot an Tawo

¹ Niyan an halas amo gud an labi ka listo han ngatanan nga mananap nga ginhimo han Ginoo nga Dyos. Ginpakianhan han halas an babaye, “Tinuod ba nga gindid-an kamo han Dyos hin pagkaon hin bunga tikang hin bisan ano nga kahoy dinhe han tanaman?”

² Binmaton an babaye, “Makakakaon kami han bunga hin bisan ano nga kahoy dinhe han tanaman,

³ labot han kahoy nga aada ha butnga han tanaman. Gindid-an kami han Dyos hin pagkaon han bunga hito nga kahoy, o bisan pagkamkam hito; kon amon ini pagbuhaton, mapatay kami.”

⁴ Binmaton an halas, “Buwa ito; diri kamo mapatay.

⁵ Ginsiring ito han Dyos kay maaram hiya nga kon kumaon kamo han bunga, masusugad kamo han Dyos, ngan makakasabot kamo han maupay ngan han maraot.”

⁶ Kinmita an babaye han kamatahom han kahoy ngan han kamarasa kaonon han bunga hini, ngan nakahunahuna hiya nga maupay gud an may-ada kinaadman. Sanglit kinmuha hiya hin pira ka bug-os nga bunga ngan kinmaon hiya. Niyan gintagan niya an iya bana ngan kinmaon liwat hiya hini.

⁷ Han pakakaon gudla nira hini, nahibaro hira ngan nakasabot nga mga hubo hira; sanglit naghimo hira hin tapis hin mga dahon hin igos basi katabonan an ira lawas.

⁸ Hito ngahaw nga kulopay hinbatian nira an Ginoo nga Dyos nga naglalakat dida han tanaman, ngan tinmago hira ha iya dida han kakahoyan.

⁹ Kundi gintawag han Ginoo nga Dyos an lalake, “Hain ka?”

¹⁰ Binmaton hiya, “Hinbatian ko ikaw dinhe han tanaman; nahadlok ako ngan tinmago ako ha imo, kay hubo ako.”

¹¹ “Hin-o an nagsumat ha imo nga hubo ka?” nagpakiana an Dyos. “Kinmaon ka ba han bunga nga igindiri ko ha imo?”

¹² Binmaton an lalake, “Gintagan ako han babaye nga imo iginbutang dinhe nga kaupod nakon, ngan kinmaon ako.”

¹³ Ginpakianhan han Ginoo nga Dyos an babaye, “Kay ano nga ginbuhat mo ini?” Binmaton hiya, “Ginlimbongan ako han halas hin pagkaon hini.”

Naghukom an Dyos

¹⁴ Niyan ginsiring han Ginoo nga Dyos an halas, “Tungod hini pagsisirotan ko ikaw; han ngatanan nga kamanampan ikaw la mag-aantos hini nga gaba: tikang yana ha imo tiyan magdadanas ka ngan tapotapo an imo kakaonon samtang buhi ka pa.

¹⁵ Hihimoon ko nga magkaaway kamo—hi ikaw ngan han babaye; dayuday magkaaway an iya ngan an imo mga tulin. An iya mga tulin amo an madugmok han imo ulo, ngan pagtutukbon man nimo an iya tikod.”

¹⁶ Ngan nagsiring hiya ngadto han babaye, “Dudugangan ko an imo kakurian dida ha imo pagburod ngan an imo kasakitan dida ha imo pag-anak. Bisan pa ngani hini, mahigugma ka la gihapon han imo bana, ngan hiya magpapangulo ha imo.”

¹⁷ Ngan nagsiring hiya ngadto han lalake, “Namati ka han imo asawa ngan kinmaon ka han bunga nga igindiri ko ha imo. Tungod han imo ginbuhat, higagabaan an tuna. Magkakabudlay ka hin duro ha bug-os mo nga kinabuhi hin pagpabunga hini hin igo nga pagkaon para ha imo.

¹⁸ Maturok ha tuna in katungkan ngan kasapinitan, ngan an imo kakaonon amo an mga tanom ha kapatagan.

¹⁹ Igbabalhas ka gud ngan gugul-a ka hin tinuod hin pagpabunga han tuna hin pagkaon ngada han pagbalik mo ngadto han tuna nga ginhimo ha imo. Ginhimo ka tikang hin tuna, ngan mabalik ka liwat hin ka tuna.”

²⁰ Ginngaranan ni Adan an iya asawa nga Eva kay amo hiya an iroy han ngatanan nga mga tawo.

²¹ Ngan naghimo an Ginoo nga Dyos hin mga panapton nga anit hin mananap para kan Adan ngan han iya asawa, ngan iya ginbadoan hira.

Ginpaiwas Tikang han Tanaman hira Adan ug Eva

²² Niyan nagsiring an Ginoo nga Dyos, “Yana nahimo na an tawo nga sugad ha aton ngan nasabot na han maupay ngan han maraot. Kinahanglan diri hiya pagtugotan hin pagkaon hin bunga tikang han kahoy nga nahatag hin kinabuhi, ngan mabuhi hin kadayonan.”

²³ Sanglit ginpaiwas hiya han Ginoo nga Dyos tikang han Tanaman han Eden ngan ginpapag-uma hiya han tuna nga ginhimo ha iya.

²⁴ Niyan ginbutangan niya didto han sinirangan nga dapit han tanaman hin buhi nga mga binuhat, ngan hin usa nga nag-iidlap nga espada nga waray hunong hin pagbinirik. Ginbuhat ini basi waray makahirani nga bisan hin-o han kahoy nga nahatag hin kinabuhi.