Genesis 15 - Samarenyo Meaning-Based Bible (1984)

May Ginsaaran kan Abram an Dyos

¹ Katapos hini nagkamay-ada panan-awon hi Abram, ngan hinbatian niya an Ginoo nga nagyayakan ha iya, “Ayaw kahadlok, Abram. Pananalipdan ko ikaw ha kataragman, ngan dako kaupay an balos nga ihahatag ko ha imo.”

² Kundi binmaton hi Abram, “O Ginoo nga Dyos, ano man nga kaupayan an akon makukuha han imo balos, kay waray ko man mga anak? Amo la hi Eliezer nga taga-Damasco an akon manurunod.

³ Waray mo ako tagi hin mga anak, ngan usa han akon mga oripon an manununod han akon hiagi.”

⁴ Niyan hinbatian na liwat niya an Ginoo, “Diri manununod han imo mga hiagi ini hi Eliezer nga oripon; an imo kalugaringon nga anak nga lalake amo an imo magigin manurunod.”

⁵ Gindara hiya han Ginoo ngadto ha gawas ngan ginsiring, “Tan-awa daw an langit ngan ihapa an mga bitoon; magkakamay-ada ka sugad hito ka damo nga mga tulin.”

⁶ Tinmapod hi Abram han Ginoo ngan tungod hini nalipay ha iya an Ginoo ngan ginkarawat hiya.

⁷ Niyan nagsiring ha iya an Ginoo, “Amo ako an Ginoo nga nagdara ha imo tikang ha Ur didto ha Babilonia, ngan ihahatag ko ha imo ini nga tuna sugad nga imo na kalugaringon.”

⁸ Kundi pinmakiana hi Abram, “Ginoo nga Dyos, uunanhon ko hin paghibaro nga ako an magtatag-iya hini?”

⁹ Binmaton hiya, “Dad-i ako hin usa nga baka, usa nga kanding, ngan hin usa nga lalaki nga karnero, nga tulo ka tuig an panuigon han kada usa, ngan hin usa nga sarapati ngan hin usa nga tukmo.”

¹⁰ Gindara ni Abram an mga mananap ngadto ha Dyos, ginpamikas ini, ngan ginturutugbang an mga pinikas ha duha ka rumbay; kundi waray niya pagpikasa an mga tamsi.

¹¹ Kon nahugdon an mga manaol ngada han mga patay nga lawas, gintatabog ini ni Abram.

¹² Han tikaturunod na an adlaw, nangaturog ngan nahimuok hi Abram. Inalpan hiya hin dako nga kahadlok nga nalisang hiya.

¹³ Nagsiring ha iya an Ginoo, “An imo mga tulin mahihimo nga mga lumalangyaw didto hin lain nga tuna; maooripon hira didto ngan pagtatalumpigoson hira sulod hin 400 ka tuig.

¹⁴ Kundi pagkakastigohon ko an nasod nga mag-ooripon ha ira, ngan kon bumaya na hira hito nga nag-oripon ha ira nga tuna, magdadara hira hin damo nga mga manggad.

¹⁵ Ha imo nga bahin malalagas ka hin duro, mapatay ka nga murayaw, ngan iglulubong ka.

¹⁶ Maagi anay in upat nga mga katulinan san-o bumalik nganhi an imo mga tulin, kay diri ko paiiwason an mga Amoreohanon tubtob nga magmaraot na gud hira hin duro nga kinahanglan na pagkastigohon ko hira.”

¹⁷ Han katunod na han adlaw ngan masirom na, tigda la nga pinmakita in usa nga nag-aaraso nga daba ngan hin usa nga naglalahinggab nga sulo ngan linmabay ini ha butnga han mga pinikas nga mga mananap.

¹⁸ Ngan dida ngahaw naghimo an Ginoo hin ginsaaran kan Abram. Nagsiring hiya, “Nagsasaad ako hin paghatag ha imo mga tulin hini ngatanan nga tuna tikang ha pag-ultan han Ehipto ngadto ha Salog han Eufrates,

¹⁹ lakip an katunaan han mga Kinitanhon, mga Kinizitanhon, mga Kadmonitanhon,

²⁰ mga Hiteohanon, mga Periseohanon, mga Refaim,

²¹ mga Amoreohanon, mga Canaanhon, mga Girgaseohanon, ngan han mga Jebuseohanon.”