Genesis 10 - Samarenyo Meaning-Based Bible (1984)

May mga Tulin an kan Noe mga Anak nga Kalalaken-an

¹ Amo ini an mga tulin han mga anak nga kalalaken-an ni Noe, nga hira Sem, Ham, ug Jafet. Katapos han lunop nagkamay-ada mga anak nga kalalaken-an ini nga tulo nga mga anak.

² An mga anak nga kalalaken-an ni Jafet: hira Gomer, Magog, Madai, Javan, Tubal, Mesec, ug Tiras, amo an ginikanan han mga tawo nga nagdadara han ira mga ngaran.

³ An mga anak ni Gomer amo hira Askenaz, Rifat, ug Togarma.

⁴ An mga anak ni Javan amo hira Elisa, Tarsis, Kitim, ug Dodanim;

⁵ amo hira an mga ginikanan han mga tawo nga nag-uokoy ha baybayon ngan didto han mga puro ha dagat. Amo ini an mga tulin ni Jafet, nga nag-uokoy didto han magkalainlain nira nga mga tribo ngan mga nasod, nga nagyayakan an tagsa nga hugpo han kalugaringon nga iya pinulongan.

⁶ An mga anak nga kalalaken-an ni Ham: hira Cus, Ehipto, Libya, ug Canaan—amo an mga ginikanan han mga tawo nga nagdadara han ira mga ngaran.

⁷ An mga anak ni Cus amo hira Saba, Habila, Sabata, Raama, ug Sabteca. An mga anak ni Raama amo hira Saba ug Dedan.

⁸ May-ada hi Cus anak nga lalake nga ginngaranan nga Nimrod nga nagin syahan nga gamhanan han kalibutan.

⁹ Tungod han bulig han Ginoo usa hiya nga dako nga parapanganop, ngan sanglit nasiring an mga tawo, “Himoon ka unta han Ginoo nga sugad kan Nimrod nga maupay nga parapanganop.”

¹⁰ Ha tinikangan sakop niya an ginhadian han Babilon, Erec, ug Accad; sakop ini nga tulo han Babilonia.

¹¹ Tikang didto hito nga tuna kinmadto hi Nimrod ha Asiria ngan gintindog an mga syudad han Ninive, Rehobot-ir, Cala,

¹² ug Resen nga nabubutnga han Ninive ngan han dako nga syudad han Cala.

¹³ An mga tulin ni Ehipto amo an mga tawo han Lydia, Anam, Lehab, Naftu,

¹⁴ Patrus, Caslu, ngan han Creta, diin tinmikang an mga Filisteohanon.

¹⁵ An mga anak nga kalalaken-an ni Canaan: hira Sidon, nga suhag, ug Het, amo an mga ginikanan han mga tawo nga nagdadara han ira mga ngaran.

¹⁶ Ginikanan liwat hi Canaan han mga Jebuseohanon, mga Amoreohanon, mga Girgaseohanon,

¹⁷ mga Hibeohanon, mga Arkeohanon, mga Sineohanon,

¹⁸ mga Arbadeohanon, mga Semareohanon, ngan mga Hamateohanon. Nagsarang an magkalainlain nga mga tribo han mga Canaanhon,

¹⁹ tubtob nga inmabot ha mga pag-ultan nga Canaanhon tikang ha Sidon tipatimogan ngadto ha Gerar nga hirani han Gaza, ngan tipasinirangan ngadto ha Sodoma, Gomora, Adma, ug Seboiim nga hirani ha Lasa.

²⁰ Amo ini an mga tulin ni Ham, nga nag-ukoy didto han magkalainlain nira nga mga tribo ngan mga nasod nga nagyayakan an tagsa nga hugpo han kalugaringon niya nga pinulongan.

²¹ Hi Sem nga magurang nga bugto nga lalake ni Jafet amo an ginikanan han ngatanan nga mga Hebreohanon.

²² An mga anak nga kalalaken-an ni Sem: hira Elam, Asur, Arfacsad, Lud, ug Aram, amo an mga ginikanan han mga tawo nga nagdadara han ira mga ngaran.

²³ An mga tulin ni Aram amo an mga tawo han Hus, Hul, Geter, ug Mosec.

²⁴ Hi Arfacsad amo an amay ni Sela nga amay ni Eber.

²⁵ May-ada duha nga mga anak nga lalake ni Eber: ginngaranan an usa nga Peleg, kay nagkabahinbahin an mga tawo han kalibutan sulod han iya panahon; ngan ginngaranan an ikaduha nga Joctan.

²⁶ An mga tulin ni Joctan amo an mga tawo han Almodad, Selef, Asarmot, Jera,

²⁷ Adoram, Usal, Dicla,

²⁸ Hebal, Abimael, Saba,

²⁹ Ofir, Habila, ug Jobab. Tinmikang kan Joctan hira ngatanan.

³⁰ An tuna nga ira gin-ukyan inmabot tikang ha Mesa ngadto ha Sefar didto han sinirangan nga sagkahon nga katunaan.

³¹ Amo ini an mga tulin ni Sem, nga nag-uokoy didto han magkalainlain nira nga mga tribo ngan mga nasod nga nagyayakan an tagsa nga hugpo han kalugaringon niya nga pinulongan.

³² Ini ngatanan nga mga tawo amo an mga tulin ni Noe, sumala han magkalainlain nira nga mga tulin dida han kada nasod. Katapos han lunop, mga tulin na han mga anak nga kalalaken-an ni Noe an ngatanan nga kanasoran han tuna.