Ezequiel 9 - Samarenyo Meaning-Based Bible (1984)

Ginkastigo an Jerusalem

¹ Niyan hinbatian ko nga ginmoliat an Dyos, “Kadi, kamo nga mga tawo nga magkakastigo han syudad. Dad-a niyo an iyo mga hinganiban.”

² Inmabot dayon in unom ka tawo tikang ha gawas han amihanan nga ganghaan han Templo, nga nakakadara hin hinganiban an kada usa. Upod ha ira in usa ka tawo nga nakakabado hin lino, nga nakakadara hin susuratan. Sinmulod hira ngatanan ngan tinmindog ha ligid han altar nga bronse.

³ Niyan nagtipaigbaw tikang han pakoan nga mga binuhat an mabislaw nga kapawa han himaya han Dyos han Israel, ngan binmalhin ngadto han aragian han Templo. Ginsiring han Ginoo an tawo nga nakakabado hin lino,

⁴ “Sudoya an bug-os nga syudad han Jerusalem ngan tigamni ha agtang an tagsa-tagsa nga naguguol ngan nasasamok tungod han ngatanan nga makangaralas nga mga butang nga binubuhat dinhe han syudad.”

⁵ Ngan hinbatian ko nga nasiring an Dyos ngadto han iba nga mga tawo, “Sunda hiya niyo dinhe han syudad ngan panmatay kamo. Ayaw niyo laktawi ngan kalooyi an bisan hin-o.

⁶ Pamataya niyo an kalagasan nga kalalaken-an, an batan-on nga kalalaken-an, an batan-on nga kababayen-an, an mga iroy, ngan an kabataan. Kundi ayaw niyo paglabti an bisan hin-o nga may-ada tigaman ha iya agtang. Tikangi niyo dinhe han akon Templo.” Sanglit gintikangan nira panmatay an mga pangulo nga nagkakatukdaw didto han Templo.

⁷ Nagsiring ha ira an Dyos, “Paghugawi niyo an Templo. Pun-a an mga bungsaran hini hin mga patay nga lawas. Tumana niyo ini!” Sanglit gintikangan nira hin panmatay an mga tawo didto han syudad.

⁸ Nag-uusaan la ako didto, samtang nagpapadayon an panmatay. Hinmapa ako ngan ginmoliat, “Ginoo nga Dyos, napupungot ka ba hin duro han Jerusalem nga imo pamamatayon an ngatanan nga nahibilin dinhe ha Israel?”

⁹ Binmaton an Dyos, “Salaan an mga tawo han Israel ug Juda hin makalilisang nga mga sala. Nakasala hira hin panmatay ha bug-os nga tuna ngan ginpuno nira hin pagtalapas an Jerusalem. Nasiring hira nga ginpabay-an ko, an Ginoo, an ira nasod ngan diri ako nakita ha ira. Kundi diri ako malolooy ha ira.

¹⁰ Pagbubuhaton ko ha ira an ira ginbuhat ngadto han iba.”

¹¹ Niyan binmalik an tawo nga nakakabado hin lino ngan nagsumat han Ginoo, “Gintuman ko na an imo mga sugo.”