Ezequiel 7 - Samarenyo Meaning-Based Bible (1984)

Hiraniay na an Kataposan para han Israel

¹ Naghimangraw ha akon an Ginoo.

² Nagsiring hiya, “Anak hin tawo, amo ini an igyayakan ko, an Ginoo nga Dyos, ngadto han tuna han Israel: Amo na ini an kataposan para han bug-os nga tuna!

³ “Israel, inmabot na an kataposan. Aabaton mo an akon kapungot, kay paghuhukman ko ikaw tungod han imo ginbuhat. Bubulson ko ikaw tungod han ngatanan mo nga makapupungot nga binuhatan.

⁴ Diri ko gud ikaw palilikayon ha akon o kalolooyan. Pagkakastigohon ko ikaw tungod han makapupungot nga mga butang nga imo nabuhat, basi kumilala ka nga amo ako an Ginoo.”

⁵ Amo ini an igyayakan han Ginoo nga Dyos: “Maabot ha imo in sunodsunod nga karat-an.

⁶ Tapos na an ngatanan. Amo ini an kataposan. Kataposan mo na.

⁷ Maabot an kataposan para ha iyo nga nag-uokoy dinhe han tuna. Hiraniay na an panahon nga mawawaray na mga pagsaurog didto han mga siringbahan nga bukid, kundi kasamokan nala.

⁸ “Diri na gud maiha nga aabaton mo an bug-os nga kusog han akon kapungot. Ginhuhukman ko ikaw tungod han imo ginbuhat, ngan bubulson ko ikaw tungod han ngatanan mo nga makapupungot nga binuhatan.

⁹ Diri ko ikaw palilikayon ha akon o kalolooyan. Pagkakastigohon ko ikaw tungod han imo makapupungot nga mga butang nga nabuhat, basi kumilala ka nga amo ako an Ginoo, ngan nga ako amo an nagkakastigo ha imo.”

¹⁰ Maabot na an adlaw han karat-an. Naglalarab na an panlupig. Duro na gud an pagkamapinahitas-on.

¹¹ Nabunga an panlupig hin darudamo nga mga pagkamaraot. Waray gud mahisasalin han ira mga hiagi, han ira karikohan, ira kaanyag, o ira pagkaharangdon.

¹² Maabot na an panahon. Hiraniay na an adlaw, nga mawawaray na kapulsanan an pagpalit ngan pagbaligya, kay maabot an kastigo han Dyos ngada han ngatanan.

¹³ Waray magparatigayon nga mabubuhi hin maiha hin pagbawi han iya napirde, kay aada han ngatanan an kasina han Dyos. Diri mabubuhi adton mga magraot.

¹⁴ Natunog an trompeta ngan nag-aandam an ngatanan. Kundi waray napakadto han pag-awayan, kay mahingangada han ngatanan an kasina han Dyos.

Kakastigohon an Israel tungod han Iya mga Sala

¹⁵ May araway didto han kakalsadahan, ngan sakit ug gutom didto han kabablayan. Mamamatay didto han araway an bisan hin-o nga aadto han kaumhan, ngan mamamatay hin sakit ug gutom an bisan hin-o nga aadto han syudad.

¹⁶ Mapalagiw in pipira ngadto han kabukiran sugad hin kinalasan nga mga sarapati tikang han mga kahamub-an. Mag-haharoy hira ngatanan tungod han ira mga sala.

¹⁷ Manluluya an mga kamot han ngatanan, ngan mangungurog an ira mga tuhod.

¹⁸ Magbabado hira hin sako ngan mangungurog an bug-os nira nga kalawasan. Pagkikiskisan an ira mga ulo ngan maaalohan hira ngatanan.

¹⁹ Ilalabog nira an ira bulawan ug salapi ngadto han kakalsadahan sugad hin sighot, kay diri man makakatalwas ha ira an salapi o bulawan kon ihuwad na han Ginoo an iya kapungot. Diri na hira makakagamit hini hin pagtuman han ira mga ungara o pagbusog han ira mga tiyan. Nakaaghat ha ira an bulawan ug salapi ngadto hin pagpakasala.

²⁰ Ipinaparayaw nira hadto anay an ira maghusay nga mga alahas, kundi ginggamit nira ini hin paghimo hin makapupungot nga mga diyosdiyos. Sanglit ginhimo han Ginoo nga mangil-ad para ha ira an ira mga manggad.

²¹ “Tutugotan ko an mga lumalangyaw hin pagtikas ha ira,” nasiring an Ginoo, “ngan kukuhaon hin mga masinupakon an ngatanan nira nga mga manggad ngan paghuhugawan ini.

²² Diri ako manginginlabot kon paghugawan an akon Templo, kon pagsudlon ngan paghugawan ini hin mga tikasan.

²³ “Masasamok an ngatanan—puno hin mga panmatay an tuna, ngan puno hin mga panlupig an mga syudad.

²⁴ Pagdadad-on ko nganhi an giraraoti nga mga nasod ngan paaangkonon ko hira han iyo kabablayan. Mawawad-an hin pagsarig an gikukusogi niyo nga kalalaken-an kon tugotan ko an mga nasod hin paghugaw han mga dapit nga iyo ginsisingbahan.

²⁵ Maabot na an pagkahulop. Mangingita kamo hin kalinaw, kundi diri gud kamo makakaagi hini.

²⁶ Magsusunodsunod an karat-an ngan mag-aabot-abot in magraot nga mga sumat. Paghahangyoon niyo an mga manaragna hin pagpadayag han ira hinkikit-an dida hin mga panan-awon. Mawawaray na an kapadian iturutdo han mga tawo, ngan mawawaray na isaragdon an mga tigurang.

²⁷ Magmamabidoon an hadi, magtuturaw an prinsipe, ngan mangungurog hin kahadlok an mga tawo. Pagkakastigohon ko kamo tungod han ngatanan nga ginbuhat niyo, ngan paghuhukman ko kamo sugad han iyo paghukom han iba. Magpapakita ini ha iyo nga ako amo an Ginoo.”