Ezequiel 6 - Samarenyo Meaning-Based Bible (1984)

Ginsirotan han Ginoo an Pagsingba hin mga Diyosdiyos

¹ Naghimangraw ha akon an Ginoo.

² Nagsiring hiya, “Anak hin tawo, tan-aw daw ngadto han kabukiran han Israel ngan ihatag ha ira an akon mensahe.

³ Sidnga an kabukiran han Israel nga mamati hira han pulong han Ginoo nga Dyos—nga mamati hira han iginsisiring ko, an Ginoo nga Dyos, ngadto han kabukiran, kapungtoran, kabakidlan, ngan kahamub-an; ipadadara in usa nga espada hin pagbungkag han mga dapit nga ginsisingbahan hin mga diyosdiyos han mga tawo.

⁴ Pamumungkagon an mga altar ngan panrurub-on an mga altar hin insyenso. Pamamatayon an ngatanan nga mga tawo didto ha atubangan han ira mga diyosdiyos.

⁵ Igpapasarang ko an mga patay nga lawas han mga tawo han Israel; igpapasarang ko an ira mga tul-an ha palibot han mga altar.

⁶ Pagbubungkagon an ngatanan nga mga syudad han Israel, basi magkarurumok an ngatanan nira nga mga altar ngan mga diyosdiyos, magkaruruba an ira mga altar hin insyenso, ngan mapara an ngatanan nga ira ginhimo.

⁷ Pamamatayon an mga tawo ha ngatanan nga dapit, ngan makilala adton mahibilin nga buhi nga amo ako an Ginoo.

⁸ “Tutugotan ko in pipira ha ira nga makalikay han pamatay ngan magsasarang hira dida han mga nasod,

⁹ diin mag-uokoy hira nga mga bihag. Didto mahinunumdom hira ha akon ngan mahibabaro nga ginkastigo ngan ginpakaalohan ko hira tungod nga ginbayaan ako han ira diri matinumanon nga mga kasingkasing ngan ginpaurog nira an mga diyosdiyos kay ha akon. Ngan mapupungot hira ha ira kalugaringon tungod han magraot ngan magngil-ad nga mga butang nga ira ginbuhat.

¹⁰ Mahibabaro hira nga amo ako an Ginoo ngan diri buwa nga mga panarhog an akon mga pahimatngon.”

¹¹ Nagsiring an Ginoo nga Dyos, “Ipukpok an imo mga kamot! Ibandok an imo mga tiil! Pagtangis ha kabido tungod han ngatanan nga magraot ngan makapupungot nga mga butang nga ginbuhat han mga Israelita. Magkakamatay hira ha pag-awayan, o hin gutom, o hin sakit.

¹² Magkakasakit ngan magkakamatay adton mga aadto ha hirayo; magkakamatay ha pag-awayan adton mga aanhi ha hirani; magkakamatay hin gutom adton mga mahibibilin nga buhi. Aabaton nira an bug-os nga kusog han akon kapungot.

¹³ Magsasarang in mga patay nga lawas tampo han mga diyosdiyos ngan ha palibot han mga altar, magsasarang dida han tagsa nga hitaas nga pungtod, didto ha bawbaw han tagsa nga bukid, ha ilarom han tagsa nga marampag nga kahoy ngan tagsa nga dako nga tuog nga kahoy, didto han tagsa nga dapit nga gintuboran nira hin mga halad ngadto han ira mga diyosdiyos. Niyan makilala an ngatanan nga amo ako an Ginoo.

¹⁴ Tinuod, uunaton ko an akon kamot ngan pagbubungkagon ko an ira nasod. Hihimoon ko ini nga waray gamit nga tuna tikang ha timogan nga kamingawan ngadto han syudad han Ribla didto ha amihanan, nga waray ko gud lalaktawan nga dapit nga inuokyan han mga Israelita. Niyan makilala an ngatanan nga amo ako an Ginoo.”