Ezequiel 44 - Samarenyo Meaning-Based Bible (1984)

An Gamit han Sinirangan nga Ganghaan

¹ Gindara ako han tawo ngadto ha gawas nga ganghaan didto han sinirangan nga dapit han Templo. Ginsadhan an ganghaan,

² ngan nagsiring ha akon an Ginoo, “Magpapabilin nga sinadhan ini nga ganghaan ngan diri na gud pag-aabrehan. Waray tawo nga tutugotan hin paggamit hini, kay sinmulod ako nga Ginoo nga Dyos han Israel pinaagi hini nga ganghaan. Magpapabilin ini nga sinadhan.

³ Kundi makakahimo nga an mga nangungulo nga prinsipe makakadto hin pagkaon ha akon atubangan. Masulod ngan magawas hiya han ganghaan pinaagi han dako nga kwarto didto han sakob nga kataposan han aragian.”

An mga Surundon hin Pagsulod han Templo

⁴ Niyan gindara ako han tawo pinaagi han amihanan nga ganghaan ngadto ha atubangan han Templo. Han pagtan-aw ko, hinkit-an ko an Templo nga napuno han mabislaw nga kapawa han Ginoo. Hinmapa ako ha tuna,

⁵ ngan nagsiring ha akon an Ginoo, “Anak hin tawo, tigamni an ngatanan nga imo hikikit-an ngan hibabatian. Igsusumat ko ha imo an mga lagda ngan mga turumanon para han Templo. Tigamni hin maupay kon hin-o nga mga tawo an tinutugotan ngan an diri tinutugotan hin pagsulod ngan paggawas han Templo.

⁶ “Sidnga adton mga masinupilon nga mga tawo han Israel nga diri na gud ako nga Ginoo nga Dyos matugot han makapupungot nga mga butang nga ira ginbuhat.

⁷ Ginhugawan nira an akon Templo pinaagi hin pagtugot nira han diri tinori nga mga lumalangyaw, mga tawo nga diri nagsusugot ha akon nga sumulod han Templo ha takna nga iginhahalad ha akon an tambok ngan an dugo han mga halad nga tinubod. Sanglit ginsupak han akon mga tawo an akon ginsaaran pinaagi han ngatanan nga makapupungot nga mga butang nga ira ginbuhat.

⁸ Waray nira pagtahora an baraan nga mga seremonyas didto han akon Templo, kundi igintapod lugod ini nira ngadto hin mga lumalangyaw.

⁹ “Nagpapasabot ako nga Ginoo nga Dyos nga waray diri tinori nga lumalangyaw, waray masupakon ha akon, nga makakasulod han akon Templo, bisan lumalangyaw nga nag-uokoy tampo han mga tawo han Israel.”

Iginggawas tikang han Pagkapadi an mga Levita

¹⁰ Nagsiring ha akon an Ginoo, “Kinakastigo ko adton mga Levita nga, kaupod han iba nga mga tawo han Israel, nga binmulag ha akon ngan nagsingba hin mga diyosdiyos.

¹¹ Makakag-alagad hira ha akon didto han Templo pinaagi hin ka tinaporan han mga ganghaan ngan hin pagtuman han buruhaton han Templo. Makakag-ihaw hira han mga mananap nga iginhahalad han mga tawo para hin mga halad nga tinubod ngan iba nga mga halad, ngan hira an mag-aataman han mga tawo.

¹² Kundi tungod nga nagpangulo hira hin pagsingba hin mga diyosdiyos para han mga tawo han Israel, ngan ha sugad hini gindara nira an mga tawo ngadto hin pakasala, nagsusumpa ako nga Ginoo nga Dyos nga kinahanglan hira pagkastigohon.

¹³ Diri na hira mag-aalagad ha akon sugad nga mga padi, o diri na hira mahirani han bisan ano nga baraan nga butang, o masulod han Labi Kabaraan nga Dapit. Amo ini an kastigo tungod han makapupungot nga mga butang nga ira ginbuhat.

¹⁴ Akon ihinahatag ha ira an meno nga mga buruhaton nga ira pagtutumanon didto ha Templo.”

An Bubuhaton han Kapadian

¹⁵ Nagsiring an Ginoo nga Dyos, “Kundi nagpadayon adton kapadian nga mga sakop han tribo ni Levi hin pag-alagad nga matinumanon ha akon didto ha Templo han pagbaya ha akon han iba han mga tawo han Israel. Sanglit yana, amo hira an mag-aalagad ha akon ngan ha akon atubangan maghahalad hira ha akon han tambok ug han dugo han tutuboron nga mga halad.

¹⁶ Hira la an masulod han akon Templo, mag-aalagad dida han akon altar, ngan magpapangulo han pagsingba ha Templo.

¹⁷ Kon masulod hira han ganghaan ngadto han sulod nga bungsaran han Templo, igsusul-ot nira in lino nga panapton. Diri hira magsusul-ot hin bisan ano nga hinimo hin delana kon nag-aalagad hira didto han sulod nga bungsaran o didto han Templo.

¹⁸ Basi diri hira pagbalhason, magsusul-ot hira hin lino nga mga pudong ngan lino nga mga saruwal, kundi waray bakos.

¹⁹ Ha diri pa hira makadto han gawas nga bungsaran diin aadto an mga tawo, lulubason anay nira an mga panapton nga ira ginsul-ot ha pag-alagad didto han Templo, ngan igbibilin ini didto han baraan nga mga kwarto. Magsusul-ot hira hin iba nga panapton, basi diri makadarahig han mga tawo an kabaraan han ira mga panapton.

²⁰ “Kinahanglan diri magpakiskis han ira ulo o magpahilaba han ira buhok an kapadian. Aarotan nira ini hin igo la nga kahilaba.

²¹ Kinahanglan diri uminom hin bino an kapadian ha diri pa hira mapakadto ha sakob han bungsaran.

²² Waray padi nga mangangasawa hin binulagan nga babaye; mangangasawa la hiya hin uray nga Israelita o han balo hin iba nga padi.

²³ “Pagtututdoan han kapadian an akon mga tawo han kalainan han baraan ngan han diri baraan ngan han malinis sumala han seremonyas ngan han diri.

²⁴ Kon may umabot nga kalipongan, pagtutuhayon ini han kapadian sumala han akon mga balaod. Pagtutumanon nira an mga pagsalin-urog han mga pyesta sumala han akon mga lagda ngan mga turumanon, ngan pagtumanon nira an pagbaraan han Adlaw nga Iparahuway.

²⁵ “Diri paghuhugawan hin usa nga padi an iya kalugaringon sumala han seremonyas pinaagi hin pagkamkam hin minatay, labot kon usa ini han iya mga kag-anak, usa han iya mga anak, o bugto nga lalake o daraga nga bugto.

²⁶ Katapos hin kalinisi ha iya, kinahanglan maghulat hiya hin pito ka adlaw,

²⁷ ngan unina masulod hiya ngadto han sakob nga bungsaran han Templo ngan maghahalad hiya hin usa nga halad nga tinubod para han paglinis ha iya, basi makag-alagad na liwat hiya didto ha Templo. Ako nga Ginoo nga Dyos an nagyakan.

²⁸ “An pagkapadi amo an bahin han kapadian han akon iginhatag ha Israel ngan ipapasunod ini tikang han usa ngadto han nasunod nga katulinan. Diri hira mag-aangkon hin hiagi didto ha Israel; ako gudla an ira malon.

²⁹ An mga halad nga pagkaon, an mga halad para hin sala, ngan an mga halad para hin paglukat, amo ini an pagkaon han kapadian, ngan kakarawaton nira an ngatanan didto ha Israel nga iginggahin para ha akon.

³⁰ Ihahatag ha kapadian an gimamag-upayi han ngatanan nga syahan nga mga abot ngan an iba pa nga iginhahalad ha akon. Ha kada paghihimo hin tinapay han mga tawo, tatagan nira an kapadian han syahan nga tinapay sugad hin usa nga halad, ngan magpapabilin ha ira mga panimalay an akon bendisyon.

³¹ Kinahanglan diri kumaon an kapadian hin bisan ano nga tamsi o mananap nga namamatay hin natural nga kamatayon o ginpatay hin iba nga mananap.”