Ezequiel 4 - Samarenyo Meaning-Based Bible (1984)

Ginpakita ni Ezequiel an Pagkapukan han Jerusalem

¹ Nagsiring an Dyos, “Anak hin tawo, kuha hin baldosa, ibutang ini ha imo atubangan, ngan pagbagisbagisi ini hin pagpakita nga syudad ini han Jerusalem.

² Niyan, ha pagpakita hin usa nga pagsulong han syudad, paliboti ini hin mga trentsera, mga kuta, mga kampo, ngan mga iburungkag hin pader.

³ Kuha hin hilapad nga puthaw ngan patindoga ini sugad hin pader ha butnga nimo ngan han syudad. Atubanga an syudad. Ginsusulong an syudad, ngan ikaw an nasulong hini. Magigin usa ini nga tigaman para han nasod han Israel.

⁴ “Niyan takilid hin paghigda ha imo wala nga kagiliran, ngan idadat-og ko dida ha imo an sirot han nasod han Israel.

⁵ Sulod hin 390 ka adlaw magpapabilin ka dida ngan mag-aantos ka tungod han ira kasal-anan. Ginsirotan ko ikaw hin tag-usa ka adlaw para han kada tuig nga kastigo ha ira.

⁶ Kon mahuman mo ito, malimbag ka ha imo tuo ngan mag-aantos ka sulod hin 40 ka adlaw tungod han kasal-anan han Juda—tag-usa ka adlaw para han kada tuig nga kastigo ha ira.

⁷ “Itutok an imo mga mata ngada han pagsulonga han Jerusalem. Ipakita ha syudad an imo kamauo, ngan pagtagna kontra hini.

⁸ Gagaposon ko ikaw basi diri ka na makalimbag ngada han kahuman han pagsulong han syudad.

⁹ “Niyan kuha hin trigo, sebada, munggos, hantak, bataw, ug dawa. Pagsalakota ini ngatanan ngan paghimo hin tinapay. Amo ito an imo kakaonon sulod han 390 ka adlaw nga natakilid ka ha imo wala.

¹⁰ Itutugot ha imo in 200 ka gramos nga tinapay kada adlaw, ngan kinahanglan umabot ini ngada han sunod nga adlaw.

¹¹ Pag-iigoan ka liwat hin irimnon nga tubig, duha la ka kopa kada adlaw.

¹² Maghaharing ka tikang hin uga nga tai hin tawo, ihuhudno mo an tinapay dida han mga baga hini, ngan kakaonon mo ini dida hin dapit nga dayag ha ngatanan.”

¹³ Nagsiring an Ginoo, “Nagpapakita ini han paagi hin pagkaon han mga Israelita han tinapay nga mahugaw ngan igindidiri han Balaod, kon igpasarang ko na hira ngadto han langyaw nga mga nasod.”

¹⁴ Kundi binmaton ako, “Ayaw gad, Ginoo nga Dyos! Waray pa gud ako maghugaw ha akon ngahaw. Tikang han akon kabata waray pa gud ako kumaon hin karne hin bisan ano nga mananap nga namatay hin natural nga kamatayon o pinatay hin magpintas nga mga mananap. Waray pa gud ako kumaon hin pagkaon nga gin-iisip nga mahugaw.”

¹⁵ Sanglit nagsiring an Dyos, “Maupay man. Tai lugod hin baka an ipagagamit ko ha imo hin paghudno han imo tinapay.”

¹⁶ Ngan nagpadayon hiya hin pagsiring, “Anak hin tawo, pag-iigoan ko an ihinahatag nga tinapay para ha Jerusalem. Mahuhulop ngan mababaraka an mga tawo didto, samtang tinatakos na nira an ira pagkaon ngan an tubig nga ira iniinom.

¹⁷ Mauubosan hira hin tinapay ug tubig; magtuturaw ngan manggagasa hira tungod han ira mga sala.”