Ezequiel 21 - Samarenyo Meaning-Based Bible (1984)

Igintagna an Espada han Ginoo

¹ Naghimangraw ha akon an Ginoo.

² Nagsiring hiya, “Anak hin tawo, isumbong an Jerusalem. Isumbong an mga dapit nga ginsisingbahan han mga tawo. Pasabota an tuna han Israel,

³ nga nasiring ako nga Ginoo: Kaaway ako niyo. Huhulboton ko an akon espada ngan pamamatayon ko kamo ngatanan, an mga mag-upay sugad man an mga magraot.

⁴ Gagamiton ko an akon espada kontra han ngatanan tikang ha amihanan ngadto ha timogan.

⁵ Hibabaroan han ngatanan nga hinmulbot ako nga Ginoo han akon espada ngan diri ko na ini itatakob.

⁶ “Anak hin tawo, pagharoy nga daw sugad hin mabug-on an imo kasingkasing tungod hin pagturaw. Pagharoy nga mabidoon diin hikikit-an ka han ngatanan.

⁷ Kon pakianhan ka nira, kon ano nga naghaharoy ka man, sidnga hira nga tungod ini han sumat nga tiarabot. Kon umabot na ini, mapupuno hin kahadlok an ira mga kasingkasing, manluluya an ira kamot, mangungurog an ira mga tuhod, ngan mahiraraptay hira. Inmabot na an panahon, aanhi na ini.” An Ginoo nga Dyos an nagyakan.

⁸ Nagsiring ha akon an Ginoo,

⁹ “Anak hin tawo, pagtagna. Sumati an mga tawo han igyayakan ko nga Ginoo: Babairon in usa nga espada, paiinggaton in usa nga espada.

¹⁰ Patatadmon ini basi gamiton hin pamatay, ginpapainggat basi umidlap sugad hin kikidlat. Mawawaray na pagkalipay, kay nagpakabungol la an akon mga tawo han ngatanan nga mga pahimatngon ug kastigo.

¹¹ Paiinggaton an espada, basi maandam ini para hin paggamit. Ginbabaid ngan ginpapainggat ini, basi ibutang ha kamot hin usa nga parapamatay.

¹² Pagnguyngoy nga mabidoon, anak hin tawo; para han akon mga tawo ini nga espada, ngan para han ngatanan nga mga pangulo han Israel. Panmamatayon hira kaupod han iba nga akon mga tawo. Pukpoka an imo dughan tungod hin pagturaw!

¹³ Sinasarihan ko an akon mga tawo, ngan kon dumiri hira hin pagbasol, mahinanabo ha ira ini ngatanan.

¹⁴ “Sanglit pagtagna, anak hin tawo. Pagpakpak ngan gamita an espada hin panigbas. Usa ini nga espada nga makakamatay, usa nga espada nga kinahahadlokan ngan ginagamit hin pamatay!

¹⁵ Pinaagi han espada nagtatalaw ngan napapakdol an akon mga tawo. Gintatarhog ko an ira syudad pinaagi hin usa nga espada nga nag-iidlap sugad hin kikidlat ngan andam hin panmatay.

¹⁶ Panigbas wala tuo, ikaw nga matarom nga espada! Panigbas bisan ngain ka birik.

¹⁷ Mapakpak liwat ako ngan mahugpoy an akon kasina. Ako nga Ginoo an nagyakan.”

Igintagna an Espada han Hadi han Babilonia

¹⁸ Naghimangraw ha akon an Ginoo.

¹⁹ Nagsiring hiya, “Anak hin tawo, pagtigaman hin duha nga dalan nga kaaagian han hadi han Babilonia kon makanhi dara an iya espada. Matikang ini nga duha nga dalan didto han amo ngahaw nga nasod. Butangi hin tigaman dida han ginsasang-an han mga dalan.

²⁰ An usa magtututdo han hadi han agian ngadto han Amonitanhon nga syudad han Raba, ngan an ikaduha, han agian ngadto ha Juda, ngadto han pinarig-on nga syudad han Jerusalem.

²¹ Natukdaw an hadi han Babilonia dida ha ligid han tigaman didto han ginsasang-an han mga dalan. Basi hisabtan niya an iya aagian, binabay-og niya in mga pana; pinapakianhan niya an iya mga diyosdiyos; ngan gin-uusisa niya an atay hin usa nga iginhalad nga mananap.

²² Yana kinakaptan na niya han iya tuo nga kamot an pana nga may tigaman, ‘Jerusalem’! Nagsusumat ini ha iya nga kinahanglan mapakadto hiya hin pagtindog hin mga iburungkag, paggoliat han singgit hin pakig-away, pagbutang han mga iburungkag nga tugbang han mga ganghaan, pagbutang hin mga tinambak nga tuna, ngan pag-ukab hin mga salipdanan.

²³ Diri magmamatuod hini an mga tawo ha Jerusalem, tungod han mga pakigsabot nga ira ginhimo. Kundi ini nga panagna amo an magpapahinumdom ha ira han ira mga sala, ngan magpapahimatngon ha ira nga mabibihag hira.

²⁴ Sanglit amo ini an igyayakan ko, an Ginoo nga Dyos: Nahidadayag na an iyo mga sala. Maaram an ngatanan han iyo pagkasalaan. Iginpapakita niyo an iyo mga sala dida han iyo tagsa nga ginawian. Sinirotan na kamo ngan itutubyan ko kamo ngadto han iyo mga kaaway.

²⁵ “Ikaw nga maraot ngan mahugaw nga punoan han Israel, tiarabot na an imo adlaw, an adlaw han kataposan nga kastigo ha imo.

²⁶ Ako nga Ginoo nga Dyos an nagyakan. Hukasa an imo korona ngan an imo pudong. Waray gud magpapabilin nga amo la gihapon. Tagi hin gahom an mga kablas! Pukana adton aada ha kagamhanan!

²⁷ Kabungkagan, kabungkagan! Bisan diin makikita an pagkabungkag han syudad! Tinuod, gugun-obon ko an syudad. Kundi diri ini mahinanabo tubtob nga umabot hiya nga akon ginpili hin pagkastigo han syudad. Ihahatag ko ini ngadto ha iya.

Igintagna an Espada han mga Amonitanhon

²⁸ “Anak hin tawo, panagna. Ipahibaro an igyayakan ko, an Ginoo nga Dyos, ngadto han mga Amonitanhon nga nagyuyubit han Israel. Sidnga hira: ‘Andam na in usa nga espada hin pagbungkag; pinapainggat ini hin panmatay, hin pag-idlap sugad hin kikidlat.

²⁹ Diri matuod an mga panan-awon nga iyo nakikita ngan mga buwa an mga panagna nga iyo ginhimo. Magraot ngan mga yawan-on kamo, ngan tiarabot an iyo adlaw, an adlaw han kataposan nga pagkastigo ha iyo. Mahuhulog an espada ngada han iyo mga liog.

³⁰ “‘Itakob an espada! Paghuhukman ko kamo didto han dapit nga gintuhaan ha iyo, didto han tuna nga iyo natawhan.

³¹ Aabaton niyo an akon kapungot kon buhian ko ini ngada ha iyo sugad hin naglalahinggab nga kalayo. Ngan igtutubyan ko kamo ngadto hin magbangis nga mga tawo nga mga batid hin pagbungkag.

³² Pagpupuohon kamo pinaagi hin kalayo. Paaawason an iyo dugo didto han iyo kalugaringon nga tuna, ngan waray na gud mahinunumdom ha iyo.’” An Ginoo an nagyakan.