Exodo 6 - Samarenyo Meaning-Based Bible (1984)

¹ Niyan nagsiring kan Moises an Ginoo, “Yana hikikit-an mo an akon pagbubuhaton ngadto han hadi. Pagpipiriton ko hiya hin pagpalakat han akon mga tawo. Ngani pagpipiriton ko hiya hin pagpagawas ha ira tikang han iya tuna.”

Nagtawag kan Moises an Dyos

² Naghimangraw kan Moises an Dyos ngan nagsiring, “Ako amo an Ginoo.

³ Pinmakita ako nga Dyos nga Labi Kamakagarahum kan Abraham, kan Isaac, ngan kan Jacob kundi waray ako magpakilala ha ira pinaagi han akon baraan nga ngaran nga an Ginoo.

⁴ Ginhimo ko liwat ha ira an akon ginsaaran ngan akon ginsaad hin paghatag ha ira han tuna han Canaan, an tuna diin hira nag-ukoy sugad nga mga lumalangyaw.

⁵ Yana hinbatian ko an pag-araba han mga Israelita nga gin-oripon han mga Ehiptohanon, ngan nahinumdom ako han akon ginsaaran.

⁶ Sanglit sumati an mga Israelita nga nasiring ako ha ira, ‘Amo ako an Ginoo; tatalwason ko kamo ngan igagawas ko kamo tikang han iyo pagkaoripon han mga Ehiptohanon. Babayawon ko an akon gamhanan nga butkon hin makalilisang nga pagkastigo ha ira, ngan tatalwason ko kamo.

⁷ Hihimoon ko kamo nga akon kalugaringon nga mga tawo, ngan magigin Dyos ako niyo. Mahibabaroan niyo nga ako amo an Ginoo nga iyo Dyos, kon talwason ko na kamo tikang han pagkaoripon didto ha Ehipto.

⁸ Dadad-on ko kamo ngadto han tuna nga akon iginsumpa hin paghatag kanda Abraham, Isaac, ug Jacob; ngan ighahatag ko ini ha iyo nga iyo kalugaringon nga malon. Amo ako an Ginoo.’”

⁹ Ginsumatan hini ni Moises an mga Israelita, kundi waray gud hira mamati ha iya, kay nagturaw na hira tungod han ira mapait nga pagkaoripon.

¹⁰ Niyan nagsiring kan Moises an Ginoo,

¹¹ “Kadto ngan sumati an hadi han Ehipto nga kinahanglan pagawson niya han iya tuna an mga Israelita.”

¹² Kundi binmaton hi Moises, “Diri ngani namamati ha akon an mga Israelita, asay pa ba an hadi? Maluya gud ako nga magyanakan.”

¹³ Ginsugo han Ginoo hira Moises ug Aaron, “Sumati an mga Israelita ngan an hadi han Ehipto nga nagsugo ako ha iyo pagdumara han mga Israelita hin paggawas ha Ehipto.”

Amo ini an Lista han Panimalay nira Moises ug Aaron

¹⁴ May upat nga mga anak nga kalalaken-an hi Ruben nga suhag ni Jacob: hira Hanoc, Falu, Hesron, ug Carmi; amo hira an kaapoy-apoyan han mga banay nga isinangay han ira mga ngaran.

¹⁵ May unom nga mga anak nga kalalaken-an hi Simeon: hira Jemuel, Jamin, Ohad, Jaquin, Zohar, ug Saul nga anak hin Canaanhon nga babaye; amo hira an kaapoy-apoyan han mga banay nga isinangay han ira mga ngaran.

¹⁶ May tulo nga mga anak nga kalalaken-an hi Levi: hira Gerson, Coat, ug Merari; amo hira an kaapoy-apoyan han mga banay nga isinangay han ira mga ngaran. Inmabot hin 137 an panuigon ni Levi.

¹⁷ May duha nga anak nga kalalaken-an hi Gerson: hira Libni ug Simei, ngan nagkamay-ada nira damo nga mga tulin.

¹⁸ May upat nga mga anak nga kalalaken-an hi Coat: hira Amram, Isar, Hebron, ug Uziel. Inmabot hin 133 an panuigon ni Coat.

¹⁹ May duha nga mga anak nga kalalaken-an hi Merari: hira Mali ug Musi. Amo ini an mga banay ni Levi upod an ira mga tulin.

²⁰ Pinangasawa ni Amram hi Jocabed, an babaye nga bugto han iya amay ngan nag-anak hira kanda Aaron ug Moises. Inmabot hin 137 an panuigon ni Amram.

²¹ May tulo nga anak nga kalalaken-an hi Isar: hira Core, Nefeg, ug Zicri.

²² May tulo liwat nga mga anak nga kalalaken-an hi Uziel: hira Misael, Elzafan, ug Sitri.

²³ Pinangasawa ni Aaron hi Elisabet nga anak ni Aminadab ngan bugto ni Naason; nag-anak hira kanda Nadab, Abiu, Eleazar, ug Itamar.

²⁴ May tulo nga mga anak nga kalalaken-an hi Core: hira Asir, Elcana, ug Abiasaf; amo hira an kaapoy-apoyan han mga hugpo han banay ni Core.

²⁵ Pinangasawa ni Eleazar nga anak ni Aaron, in usa han mga anak ni Futiel, ngan nag-anak hira kan Pinehas. Amo hira an mga puno han mga panimalay ngan han mga banay han tribo ni Levi.

²⁶ Amo ini hira Aaron ug Moises an ginsiring han Ginoo, “Kamo an magdudumara han mga tribo han Israel hin paggawas han Ehipto.”

²⁷ Amo ini hira Moises ug Aaron an nakighimangraw han hadi han Ehipto nga pagawson na an mga Israelita.

Nagsugo an Ginoo kanda Moises ug Aaron

²⁸ Han paghimangraw han Ginoo kan Moises didto han tuna han Ehipto,

²⁹ nagsiring hiya, “Ako amo an Ginoo. Sumati an hadi han Ehipto han ngatanan nga akon igsisiring ko ha imo.”

³⁰ Kundi binmaton hi Moises, “Maaram ka nga maluya gud ako nga magyarakan; kay ano nga mamamati ha akon an hadi?”