Exodo 40 - Samarenyo Meaning-Based Bible (1984)

Gintindog ngan Iginhalad an Tulda han Ginoo

¹ Nagsiring an Ginoo kan Moises,

² “Dida han syahan nga adlaw han syahan nga bulan tindoga an Tulda han Ginoo.

³ Igsulod ngadto hini an Kahon han Ginsaaran nga sinusudlan han Napulo nga mga sugo ngan igtaod an biray ha atubangan han Kahon.

⁴ Igsulod an lamesa ngan igbawbaw han lamesa an mga kasangkapan. Igsulod liwat an kandilero ngan igbutang dida hini an mga lampara.

⁵ Igbutang ha atubangan han Kahon han Ginsaaran an altar nga bulawan nga pagtutuboran hin insyenso ngan igtaod an biray dida han agian han Tulda.

⁶ Igbutang ha atubangan han Tulda an altar nga pagtutuboran hin mga halad.

⁷ Igbutang ha butnga han Tulda ngan han altar an palanggana nga hurunawan, ngan sudli ini hin tubig.

⁸ Paliboti hin alad an Tulda ngan butangi hin biray didto han agian han alad.

⁹ “Niyan ighalad an Tulda ngan an ngatanan nga kasangkapan hini pinaagi hin pagdihog han Tulda han lana nga baraan, ngan mababaraan ini.

¹⁰ Igsunod paghalad an altar ngan an ngatanan nga kasangkapan hini pinaagi hin pagdihog han altar ngan mababaraan gud ini.

¹¹ Ighalad liwat ha amo ngahaw nga paagi an palanggana nga hurunawan ngan an tungtongan ini.

¹² “Dad-a hi Aaron ngan an iya mga anak nga kalalaken-an ngadto han agian han Tulda ngan pakarigoa hira.

¹³ Badoi hi Aaron han mga biste nga padianon, dihogi hiya, ngan ighalad hiya hin sugad nga paagi, basi makag-alagad hiya sugad nga padi.

¹⁴ Dad-a an iya mga anak nga kalalaken-an ngan badoi hira.

¹⁵ Niyan dihogi hira sugad han pagdihog mo han ira amay, basi mag-alagad hira nga akon kapadian. Maghihimo ha ira nga kapadian ha kadayonan ini nga pagdihog.”

¹⁶ Ginbuhat ni Moises an ngatanan sumala han iginsugo han Ginoo.

¹⁷ Sanglit natindog an Tulda han Ginoo dida han syahan nga adlaw han syahan nga bulan han ikaduha nga tuig katapos nira bumaya han Ehipto.

¹⁸ Iginpahimutang ni Moises an mga tungtongan hini, gintindog an mga balayan, iginsul-ot an mga palhog, ngan gintindog an mga usok hini.

¹⁹ Ginbuklad niya an tahob ha bawbaw han Tulda ngan ginbawbawan ini niya han tahob ha gawas, sumala han iginsugo han Ginoo.

²⁰ Niyan kinuha niya an duha nga mga papan nga bato ngan iginsulod ini dida han Kahon han Ginsaaran. Iginsul-ot niya an mga parasgan dida han mga maglidong nga sulpotan han Kahon ngan gintakpan ini.

²¹ Niyan iginsulod niya an Kahon ngadto han Tulda ngan igintaod an biray nga salipod. Dida hini nga paagi iya ginsalipdan an Kahon han Ginsaaran sumala han iginsugo han Ginoo.

²² Iginsulod niya an lamesa ngadto han Tulda, didto han amihanan nga ligid ha gawas han biray,

²³ ngan iginbutang dida hini an tinapay nga iginhalad ngadto han Ginoo, sumala han iginsugo han Ginoo.

²⁴ Iginsulod niya ngadto han Tulda an kandilero tugbang han lamesa didto han timogan nga ligid,

²⁵ ngan gindagkotan niya an mga lampara didto ha atubangan han Ginoo, sumala han iginsugo han Ginoo.

²⁶ Iginsulod niya ngadto han Tulda an altar nga bulawan ha atubangan han biray,

²⁷ ngan gintubod an insyenso nga mahamot, sumala han iginsugo han Ginoo.

²⁸ Igintaod niya an biray didto han agian han Tulda,

²⁹ ngan iginbutang niya atubangan han biray an altar nga pagtutuboran han mga halad. Iginhalad niya dida hini an halad nga tinubod ngan an halad nga pagkaon, sumala han iginsugo han Ginoo.

³⁰ Iginbutang niya ha butnga han Tulda ngan han altar an palanggana nga hurunawan, ngan ginsudlan ini hin tubig.

³¹ Nanhuhunaw ngan nanhihimsaw dida hini hi Moises, hi Aaron, ngan an iya mga anak nga kalalaken-an,

³² kon nasulod hira han Tulda o napakadto han altar, sumala han iginsugo han Ginoo.

³³ Gintindog ni Moises an alad palibot han Tulda ngan han altar, ngan igintaod an biray didto ha agian han alad. Sanglit nahuman niya an ngatanan nga buruhaton.

Hinmugdon an Dampog ha Bawbaw han Tulda han Ginoo

³⁴ Niyan gintahoban han dampog an Tulda ngan napuno ini han himaya han Ginoo.

³⁵ Tungod hini waray makasulod hi Moises ngadto han Tulda.

³⁶ Ginbabalhin han mga Israelita an ira kampo ngadto hin lain nga dapit dida la kon napaigbaw an dampog tikang han Tulda.

³⁷ Diri nira ginbabalhin an ira kampo samtang nagpapabilin didto an dampog.

³⁸ Sulod han ngatanan nira nga mga paglakaton nasabot nira nga aada han Tulda an Ginoo kon hinkikit-an nira an dampog han Ginoo ha igbaw han Tulda kon aldaw, ngan naglalaga nga kalayo kon gab-i.