Exodo 39 - Samarenyo Meaning-Based Bible (1984)

Ginhimo an mga Panapton han Kapadian

¹ Tikang hin delana nga asul, granate, ug pula ginhimo nira an mga biste nga magtahom nga igsusul-ot han kapadian kon mag-aalagad hira didto han Baraan nga Dapit. Ginhimo nira para han Aaron an padianon nga mga biste, sumala han iginsugo han Ginoo kan Moises.

² Ginhimo nira an efod hin lino nga pino, delana nga asul, granate, ug pula, ngan mga tingkal nga bulawan.

³ Nagpilpig hira hin mga magnipis nga bulawan ngan gintabastabas ini nira hin pino ngan iginhablon ngadto han lino nga pino, ngan ngadto han delana nga asul, granate, ug pula.

⁴ Naghimo hira hin duha nga mga hapin han sugbong para han efod ngan iginkab-it ini nira ngada han mga kagiliran hini, basi kataoran han efod.

⁵ Igintaod ngada han efod an paha nga pino an kahablon, nga hinimo han amo ngahaw nga mga materyal, basi mausa la ka pedaso an paha ngan han efod, sumala han iginsugo han Ginoo kan Moises.

⁶ Gin-andam nira an mga kornalina ngan iginpadukot ini dida hin mga tungtongan nga bulawan; iginuhit hin maupay dida hini an mga ngaran han 12 nga mga anak ni Jacob.

⁷ Igintaod ini ngada han mga hapin han sugbong han efod, nga natindog han 12 nga mga tribo han Israel, sumala han iginsugo han Ginoo kan Moises.

Ginhimo an Tahob han Dughan

⁸ Ginhimo nira an tahob han dughan han amo ngahaw nga mga materyal han efod ngan alid-agid an kaborda.

⁹ Kwadrado ini ngan pinilo hin doble nga 22 ka sentimetros an kahilaba ngan an kahilapad.

¹⁰ Ginpaduktan ini nira hin upat ka rungbay nga mga marahalon nga mga bato: an syahan nga rungbay; rubi, tupasyo, ug karbunkol;

¹¹ an ikaduha nga rungbay; esmeraldo, sapiro, ug dyamante;

¹² an ikatulo nga rungbay; hasinto, agata, ug amatista;

¹³ ngan an ikaupat nga rungbay; birilo, kornalina, ug haspe. Iginbawbaw ini dida hin mga tungtongan nga bulawan.

¹⁴ Igingguhit dida han kada usa han dose nga mga bato an ngaran hin usa han mga anak ni Jacob, basi magtindog ini han 12 nga mga tribo han Israel.

¹⁵ Para han tahob han dughan naghimo hira hin mga karukadena hin puraw nga bulawan, nga linubag sugad hin lubid.

¹⁶ Naghimo hira hin duha nga mga tungtongan nga bulawan ngan duha nga mga bahol nga singsing nga bulawan, ngan igintaod an duha nga bahol nga singsing ngadto han igbaw nga mga kanto han tahob han dughan.

¹⁷ Iginsab-it nira ngada han duha nga mga bahol nga singsing han duha nga mga lubid nga bulawan,

¹⁸ ngan iginsab-it ngada han duha nga mga tungtongan an lain nga duha nga kataposan han mga lubid, ngan ha amo nga paagi, isinab-it ini ngada han atubangan han mga hapin han sugbong han efod.

¹⁹ Naghimo hira hin duha nga mga bahol nga singsing nga bulawan ngan igintaod ini ngada han ubos nga mga kanto han tahob han dughan, ha sakob nga sidsid sunod han efod.

²⁰ Naghimo hira hin duha pa nga mga bahol nga singsing nga bulawan ngan igintaod ini ngada han uruubos nga bahin han atubangan han duha nga mga hapin han sugbong han efod, nga hirani han sinumpayan ngan igbaw han paha nga hinablon hin pino.

²¹ Sumala han iginsugo han Ginoo kan Moises, iginhigot nira hin asul nga lubid an mga bahol nga singsing han tahob han dughan ngadto han mga bahol nga singsing han efod, basi mahimutang hin maupay ha bawbaw han paha ngan diri humukal an tahob han dughan.

Ginhimo an Iba nga mga Padianon nga Panapton

²² Ginhimo nira an kapa nga ibarawbaw han Efod tikang hin lubos nga delana nga asul.

²³ Ginparig-on an kwelyo ha ulo pinaagi hin pagtahii hin ribite nga hinablon basi diri ini magisi.

^24-26 Ginpalibotan nira hin borda nga mga granada nga lino nga pino ngan hin delana nga asul, granate, ug pula an sidsid ha ubos, ngan ginbitayan hin mga kampanilya nga lubos nga bulawan ha kada butnga han mga granada, sumala han iginsugo han Ginoo kan Moises.

²⁷ Ginhimo nira para kan Aaron ngan han iya mga anak nga kalalaken-an an mga bado,

²⁸ ngan an mga pudong, an mga kalo, an halipot nga mga saruwal nga lino,

²⁹ ngan an mga paha nga lino nga pino ngan delana nga asul, granate, ug pula, nga binordahan, sumala han iginsugo han Ginoo kan Moises.

³⁰ Ginhimo nira hin puraw nga bulawan an adorno nga baraan nga tigaman hin paghalad, ngan iginuhit nira ini nga mga pulong, “Iginhalad ngadto han Ginoo.”

³¹ Iginhigot nira ini hin asul nga lubid ngada ha atubangan han pudong, sumala han iginsugo han Ginoo kan Moises.

Nahuman an Buruhaton

³² Nahuman an ngatanan nga buruhaton bahin han Tulda han Ginoo. Ginhimo han mga Israelita an ngatanan sumala han iginsugo han Ginoo kan Moises.

³³ Gindara nira ngadto kan Moises an Tulda, ngan an ngatanan nga kasangkapan hini: an mga sab-itan, an mga balayan, an mga palhog, an mga harigi ngan an mga tungtongan hini;

³⁴ an tahob nga anit hin karnero nga lalaki nga tinina hin pula; an tahob nga anit hin kanding, an salipod nga biray;

³⁵ an Kahon han Ginsaaran nga sinusudlan han mga papan nga bato, an mga parasgan ngan an takop hini;

³⁶ an lamesa ngan an ngatanan nga kasangkapan hini, an tinapay nga iharalad ngadto ha Dyos:

³⁷ an kandilero nga puraw nga bulawan, an mga lampara ngan an ngatanan nga kasangkapan hini, ngan an lana para han mga lampara;

³⁸ an altar nga bulawan; an lana nga igdirihog; an insyenso nga mahamot; an biray para han agian han Tulda;

³⁹ an altar nga bronse upod an rehas hini, an mga parasgan, ngan an ngatanan nga kasangkapan hini; an palanggana nga hurunawan ngan an mga tungtongan hini;

⁴⁰ an mga biray para han alad ngan an mga harigi ngan an mga tungtongan hini, an biray para han agian han alad ngan an mga pisi hini; an mga usok han Tulda; an ngatanan nga kasangkapan nga gagamiton didto han Tulda;

⁴¹ ngan an magtahom nga mga biste nga igbarado han kapadian didto han Baraan nga Dapit—an baraan nga mga biste para kan Aaron nga padi ngan para han iya mga anak nga kalalaken-an.

⁴² Ginbuhat han mga Israelita an ngatanan nga buruhaton sumala han iginsugo han Ginoo kan Moises.

⁴³ Gin-usisa ni Moises an ngatanan nga mga butang ngan hinkit-an niya nga ginhimo nira ini ngatanan sumala han iginsugo han Ginoo. Sanglit ginbendisyonan hira ni Moises.