Exodo 36 - Samarenyo Meaning-Based Bible (1984)

¹ “Kinahanglan himoon an ngatanan sumala han iginsugo han Ginoo kanda Bezalel, Aholiab ngan han ngatanan nga mga trabahador nga gintagan han Ginoo hin kabatiran ngan hibaro, nga maaram maghimo han ngatanan nga ginkikinahanglan hin pagtindog han baraan nga Tulda.”

Nagdara an mga Tawo hin Damo nga mga Regalo

² Gintawag ni Moises hira Bezalel, Aholiab, ngan an ngatanan nga batid hini nga mga buhat nga tinagan han Dyos hin hibaro, ngan naruyag hin pagbulig. Ginsiring hira ni Moises nga magtikang na hira han ira trabaho.

³ Kinarawat nira tikang kan Moises an ngatanan nga mga halad nga gindara han mga Israelita para hin pagtindog han baraan nga Tulda. Kundi nagpadayon an mga tawo han Israel hin pagdara ngadto kan Moises han ira mga halad ha kada aga;

⁴ sanglit kinmadto an mga tawo nga batid hini nga mga buruhaton,

⁵ ngan ginsiring nira hi Moises, “Sobra na han ginkikinahanglan an gindara han mga tawo para han buruhaton nga iginsugo han Ginoo.”

⁶ Nagsugo hi Moises ha bug-os nga kampo nga diri na magdara hin amot para han baraan nga Tulda. Sanglit waray na magdara an mga tawo.

⁷ Sobra na an iginhatag han mga tawo para han ginkikinahanglan han bug-os nga buruhaton.

Ginhimo an Tulda han Ginoo

⁸ Ginhimo an Tulda han Ginoo han mga labi ka batid hini nga buruhaton. Ginhimo nira ini hin napulo ka tinabas nga pino nga lino, nga hinablonan hin delana nga asul, granate ug pula, ngan binordahan hin mga dagway hin mga kerubin.

⁹ Papreho kadagko an kada tinabas nga 12 ka metros an kahilaba ngan duha ka metros an kahilapad.

¹⁰ Gintaragkip nira pagtahi an lima nga tinabas ngan sugad man an lain nga lima nga tinabas.

¹¹ Ginhimoan nira hin mga tarutalinga nga asul nga dugnit dida han sidsid ha gawas nga tinabas han kada usa nga tinakip.

¹² Ginbutangan nira hin 50 nga mga tarutalinga an syahan nga tinabas han syahan nga tinakip, ngan 50 nga mga tarutalinga nga katugbang hini dida han kataposan nga tinabas han ikaduha nga tinakip.

¹³ Ginhimo nira in 50 nga mga sab-itan nga bulawan nga gagamiton hin pagsumpay han duha nga mga tinakip basi mausa nala ka bug-os.

¹⁴ Niyan naghimo hira hin tahob para han Tulda tikang hin onse nga mga tinabas nga hinimo hin barahibo hin kanding.

¹⁵ Ginhimo ini nira hin papreho kadagko ngatanan, nga 13 ka metros an kahilaba ngan duha ka metros an kahilapad.

¹⁶ Gintaragkip nira an lima ka tinabas ngadto hin usa nga tinakip, ngan sugad man an iba nga unom ka tinabas.

¹⁷ Ginbutangan nira hin 50 nga mga tarutalinga dida han sidsid han kataposan nga tinabas han usa nga tinakip ngan 50 nga mga tarutalinga dida han sidsid han ikaduha nga tinakip.

¹⁸ Naghimo hira hin 50 nga mga sab-itan nga bronse hin pagsumpay han duha nga mga tinakip basi mahimo in usa la nga tahob.

¹⁹ Naghimo hira hin duha pa nga mga tahob, nga hinimo hin anit hin karnero nga lalaki nga tinina hin pula an usa, ngan anit nga kanding an ikaduha basi gamiton nga tahob ha gawas.

²⁰ Naghimo hira hin natindog nga mga balayan nga akasya para han Tulda.

²¹ An kada balayan upat ka metros an kahitaas ngan 66 ka sentimetros an kahilapad,

²² nga may duha nga mga tiiltiil nga magkatungod, basi magkatarugkop an mga balayan. May-ada hini nga mga tiiltiil an ngatanan nga mga balayan.

²³ Naghimo hira hin 20 nga mga balayan para ha timogan nga ligid,

²⁴ ngan hin 40 nga mga tungtongan nga salapi ha ubos han balayan, nga tag duha nga tungtongan ha ubos han kada balayan, hin pagsangga han duha nga mga tiiltiil hini.

²⁵ Naghimo hira hin 20 nga mga balayan para han amihanan nga ligid han Tulda,

²⁶ ngan hin 40 nga mga tungtongan nga salapi, nga tag duha ha ubos han kada balayan.

²⁷ Para han luyo han Tulda, didto ha katundan, naghimo hira hin unom nga mga balayan,

²⁸ ngan hin duha nga mga balayan para han mga kanto.

²⁹ Ginturugkop tikang ha ubos ngadto ha igbaw nga mga balayan. Ginhimo hin sugad hini an duha nga mga balayan han duha nga mga kanto.

³⁰ Sanglit may-ada walo nga mga balayan ngan 16 nga mga tungtongan nga salapi, nga tag duha ha ubos han kada balayan.

³¹ Naghimo hira hin 15 nga mga palhog nga akasya, lima para han mga balayan didto han usa nga ligid han Tulda,

³² lima para han mga balayan didto han ikaduha nga ligid, ngan lima para han mga balayan didto han katundan nga kataposan, ha luyo han Tulda.

³³ Nalahos tikang han usa nga kataposan han Tulda ngadto ha luyo an butnga nga palhog nga igintaod ha katungatunga han mga balayan.

³⁴ Ginputos nira hin bulawan an mga balayan, ngan ginsul-otan nira hin mga maglidong nga sulpotan nga bulawan nga magtutugkop han mga palhog nga pinutos liwat hin bulawan.

³⁵ Naghimo hira hin usa nga biray nga lino nga pino, nga ginhablonan hin asul, granate, ug pula nga delana, ngan ginbordahan ini hin mga dagway hin mga kerubin.

³⁶ Naghimo hira hin upat nga mga harigi nga akasya, nga pinutos hin bulawan ngan ginsul-otan nira hin mga sab-itan nga bulawan ha pagtukod han biray. Niyan naghimo hira hin upat nga mga tungtongan nga salapi nga magsasangga han mga harigi.

³⁷ Para han agian han Tulda naghimo hira hin usa nga biray nga lino nga pino, nga ginhablonan hin asul, granate, ug pula nga delana, ngan binordahan.

³⁸ Para hini nga biray naghimo hira hin lima nga mga harigi, nga sinul-otan hin mga sab-itan, ginputos hin bulawan an mga uloulo ngan an mga moldora hini, ngan naghimo hira hin lima nga mga tungtongan nga bronse para han mga harigi.