Exodo 31 - Samarenyo Meaning-Based Bible (1984)

Iginhatag an Kabatiran hin Pagtrabaho

¹ Nagsiring kan Moises an Ginoo,

² “Ginpili ko hi Bezalel nga anak ni Uri ngan apo ni Hur, nga sakop han tribo ni Juda,

³ ngan ginpuno ko hiya han akon gahom. Gintagan ko hiya hin sarabutan, kabatiran, ngan hibaro para hin bisan ano nga de arte nga buhat—

⁴ hiya an maghimo hin mga matahom nga debuho ngan magamit hiya hin bulawan, salapi, ug bronse;

⁵ hiya an magtatabas hin mga mahal nga bato; an magguguhit hin kahoy; ngan han iba nga mga de arte nga buhat.

⁶ Ginpili ko liwat hi Aholiab nga anak ni Ahisamac, nga sakop han tribo ni Dan hin pagbulig ha iya. Gintagan ko liwat hin hitaas nga hibaro an ngatanan nga batid nga mga trabahador, basi makahimo hira han ngatanan nga akon iginpapahimo ha ira:

⁷ an akon Tulda, an Kahon han Ginsaaran upod an takop hini, an ngatanan nga mga kasangkapan han Tulda,

⁸ an lamesa ngan an kasangkapan hini, an kandilero nga puraw nga bulawan ngan an ngatanan nga kasangkapan hini, an altar nga turuboran hin insyenso,

⁹ an altar nga para han mga halad nga tutuboron ngan an ngatanan nga sangkapan hini, an palanggana nga hurunawan ngan an tungtongan hini,

¹⁰ an magtahom nga padianon nga mga biste nira Aaron ngan han iya mga anak nga kalalaken-an, nga gagamiton nira ha ira pagkapadi kon mag-aalagad hira ha akon,

¹¹ an lana nga igdirihog, ngan an insyenso nga mahamot nga para han Baraan nga Dapit. Ha paghimo hini ngatanan nga mga butang, kinahanglan pagbuhaton nira ini sumala han akon iginsugo ha imo.”

An Adlaw nga Igparahuway

¹² Nagsugo kan Moises an Ginoo

¹³ nga sidngon an mga tawo han Israel, “Tumana niyo an akon Adlaw nga Igparahuway, kay tigaman ini ha iyo ngan ha akon para han ngatanan nga panahon nga tiarabot, ha pagpakita nga ako nga Ginoo amo an naghimo ha iyo nga akon kalugaringon nga mga tawo.

¹⁴ Kinahanglan pagtumanon niyo an Adlaw hin Igparahuway kay sagrado ini nga adlaw. Kinahanglan patayon an bisan hin-o nga diri magtuman hini, kundi magbuhat hito nga adlaw.

¹⁵ May-ada niyo unom ka adlaw hin pagtuman han iyo buruhaton, kundi an ikapito nga adlaw baraan ini nga adlaw hin pagpahuway nga iginhalad ha akon. Papatayon gud an bisan hin-o nga magbuhat hin bisan ano hito nga adlaw.

¹⁶ Kinahanglan pagtumanon han mga tawo han Israel ini nga adlaw nga usa nga tigaman han ginsaaran.

¹⁷ Ha kadayonan ini nga tigaman para han mga tawo han Israel ngan para ha akon, kay ako nga Ginoo naghimo han langit ngan han tuna sulod hin unom ka adlaw, ngan inmukoy ako hin pagbuhat ngan pinmahuway dida han ikapito ka adlaw.”

¹⁸ Han kahuman han Dyos paghimangraw kan Moises didto ha Bukid Sinai, iya iginhatag kan Moises an duha nga mga papan nga bato nga sinuratan han Dyos ngahaw han iya mga sugo.