Exodo 30 - Samarenyo Meaning-Based Bible (1984)

An Altar nga Pagtutuboran hin Insyenso

¹ “Paghimo hin usa nga altar nga akasya nga para hin pagtubod hin insyenso.

² Kinahanglan kwadrado ini nga 45 ka sentimetros an kahilaba ngan 45 ka sentimetros an kahilapad, ngan 90 ka sentimetros an kahitaas. Kinahanglan nga unay han altar an mga sungay-sungay hini dida han upat nga mga kanto.

³ Putsa hin puraw nga bulawan an bawbaw hini, an upat nga kagiliran, ngan an mga sungaysungay, ngan paliboti ini hin ribite nga bulawan.

⁴ Himoi ini hin duha nga bulawan nga mga maglidong nga sulpotan nga susuhotan han mga parasgan kon pagpasgon ini ngan igtaod ini ha ubos han sidsid han duha nga kagiliran.

⁵ Paghimo hin mga parasgan nga akasya ngan putsa ini hin bulawan.

⁶ Igbutang ini nga altar ha gawas han biray nga ibinutang ha atubangan han Kahon han Ginsaaran. Amo ito an dapit diin makikigkita ako ha imo.

⁷ Ha kada aga kinahanglan magtubod dida hini nga altar hin mahamot nga insyenso dida hini kon maabot hi Aaron hin pag-andam han mga lampara.

⁸ Kinahanglan amo ngahaw an iya pagbuhaton ha kada gab-i kon magdadagkot hiya han mga lampara. Kinahanglan ipadayon ini nga paghalad hin insyenso ha ngatanan nga panahon nga tiarabot.

⁹ Ayaw paghalad dida hini nga altar hin bisan ano nga igindidiri nga insyenso, o bisan ano nga halad nga mananap, o bisan ano nga halad nga pagkaon, ngan ayaw pag-ipisi ini hin bisan ano nga halad nga irimnon.

¹⁰ Kinahanglan pagbubuhaton ni Aaron hin makausa ha kada tuig an seremonyas hin paglinis han altar pinaagi hin pagbutang han dugo han hayop nga iginhalad para hin sala dida han upat nga mga sungaysungay han altar. Kinahanglan pagbuhaton ini ha kada tuig ha ngatanan nga panahon nga tiarabot. Kinahanglan baraan gud ini nga altar nga iginhalad ha akon nga Ginoo.”

An Buhis para han Tulda han Ginoo

¹¹ Nagsiring kan Moises an Ginoo,

¹² “Kon mag-ihap ka han mga tawo han Israel, kinahanglan magbayad ha akon an kada tawo hin lukat han iya kinabuhi, basi waray karat-an nga umabot ha iya samtang iniihap an mga tawo.

¹³ An ngatanan nga nahiupod han pag-ihap, kinahanglan magbayad han ginkikinahanglan nga kwarta nga tinimbang sumala han timbangan nga opisyal. Kinahanglan an tagsatagsa magbayad hini nga usa nga halad ha akon.

¹⁴ Kinahanglan magbayad ha akon hini nga kantidad an tagsatagsa nga nahiuupod han pag-ihap, ha aton pa, an tagsa ka tawo nga 20 o sobra an panuigon.

¹⁵ Diri mabayad hin sobra an riko, o hin kulang, an pobre, kon bumayad hira hini nga kantidad nga lukat han ira mga kinabuhi.

¹⁶ Sukta ini nga kwarta tikang han mga tawo han Israel ngan gamita ini para han pag-alagad dida han Tulda han Ginoo. Ini nga buhis amo an lukat han ira kinabuhi, ngan mahinunumdom ako hin pagpanalipod ha ira.”

An Palanggana nga Bronse

¹⁷ Nagsiring kan Moises an Ginoo,

¹⁸ “Paghimo hin palanggana nga bronse, nga may tungtongan nga bronse. Igbutnga ini han Tulda ngan han altar, ngan sudli ini hin tubig.

¹⁹ Gagamiton an tubig ni Aaron ngan han iya mga anak nga kalalaken-an hin panhunaw ngan panhimsaw

²⁰ samtang nga diri pa hira masulod han Tulda o mahirani han altar hin paghalad han pagkaon, ngan diri hira papatayon.

²¹ Kinahanglan manhunaw ngan manhimsaw hira, basi diri hira mamatay. Turumanon ini nga kinahanglan pagsundan ha kadayonan nira ngan han ira mga tulin.”

An Lana nga Igdirihog

²² Nagsiring kan Moises an Ginoo,

²³ “Kuha han gimamaupayi nga mga pahamot—unom ka kilo nga tunaw nga mirra, tulo ka kilo nga kanila nga mahamot, tulo ka kilo nga kanya nga mahamot,

²⁴ ngan unom ka kilo nga kasya (tinimbang ngatanan sumala han timbangan nga opisyal). Dugangi hin usa ka galon nga lana hin olibo,

²⁵ ngan himoa in sagrado nga lana nga igdirihog, sinaktan hin pahamot.

²⁶ Gamita ini hin pagdihog han Tulda han Ginoo, han Kahon han Ginsaaran,

²⁷ han lamesa ngan han ngatanan nga mga garamiton hini, han kandilero ngan han mga garamiton hini, han altar nga pagtutuboran hin insyenso,

²⁸ han altar nga pagtutuboran han mga halad lakip an ngatanan nga mga garamiton hini, ngan han palanggana nga hurunawan lakip an tungtongan hini.

²⁹ Sugara hini nga paagi an paghalad hini nga mga butang ngan mababaraan gud ini ngatanan, ngan madadaot an bisan hin-o o bisan ano nga magpasipara hin pagkapot hini tungod han gahom han ira pagkabaraan.

³⁰ Niyan dihogi hi Aaron ngan an iya mga anak nga kalalaken-an, ngan ordinahi hira hin ka padi ha pag-alagad ha akon.

³¹ Sidnga an mga tawo han Israel, ‘Kinahanglan gamiton hin pag-alagad ha akon ha ngatanan nga panahon nga tiarabot ini nga baraan nga lana nga igdirihog.

³² Kinahanglan diri ibubo ini ngada hin ordinaryo la nga mga tawo, ngan kinahanglan diri kamo gumamit han amo ngahaw nga pagkasakot hin paghimo hin bisan ano nga igdirihog sugad hini. Baraan ini, sanglit kinahanglan diri kamo magpasipara hin paggamit hini.

³³ Diri na gud pag-iisipon nga kausa han akon katawhan an bisan hin-o nga maghimo hin sugad hini o maggamit hini ngada hin bisan hin-o nga diri padi.’”

An Insyenso

³⁴ Nagsiring kan Moises an Ginoo, “Kuha hin papreho ka damo ha kada usa han nasunod nga mga pahamot—estakte, onika galbano, ngan puraw nga insyenso.

³⁵ Gamita ini paghimo hin igharatad nga insyenso nga ginsakot sugad han ginbubuhat han parahimo hin pahamot. Asini ini basi mapuraw ngan mabaraan.

³⁶ Ligsa nga mapulbos in usa ka bahin hini, dad-a ini ngadto han akon Tulda, ngan igsaborak ini ha atubangan han Kahon han Ginsaaran. Isipa nga baraan gud ini nga insyenso.

³⁷ Ayaw paghimo hin lain nga insyenso nga magamit hin sugad nga pagkasakot han paghimoa hini nga insyenso para hin imo paggamit. Isipa ini nga baraan nga butang nga iginhalad ha akon.

³⁸ Diri na gud pag-iisipon nga kausa han akon mga tawo an bisan hin-o nga maghimo hin sugad hini basi gamiton nga pahamot.”