Exodo 27 - Samarenyo Meaning-Based Bible (1984)

An Altar

¹ “Paghimo hin usa nga altar tikang hin akasya nga kahoy. Kinahanglan kwadrado ini nga 2.2 ka metros an kahilaba, 2.2 ka metros an kahilapad, ngan 1.3 ka metros an kahitaas.

² Himoi ini hin mga sungaysungay ha bawbaw han upat nga mga kanto. Himoa ini nga unay han altar, ngan putsa hin bronse ini ngatanan.

³ Paghimo hin mga surudlan hin mga agbon, mga sokwat, mga palanggana, mga iturugsok, ngan mga sangga hin mga baga hin kalayo. Kinahanglan mga bronse ini ngatanan nga mga garamiton.

⁴ Paghimo hin rehas nga hinukot nga bronse ngan butangi ini hin upat nga mga maglidong nga sulpotan nga bronse dida han mga kanto hini.

⁵ Igbutang an rehas ha ubos han moldora han altar, basi makaabot ini ha katunga han kahitaas han altar.

⁶ Paghimo hin mga parasgan nga kahoy nga akasya, ngan putsa ini hin bronse,

⁷ ngan isuhot ini dida han mga maglidong nga sulpotan ha kada ligid han altar, kon pagpasgon na ini.

⁸ Himoa nga lungag an ubos han altar, ngan himoa an altar tikang hin mga tabla, sumala han surubdan nga igpapakita ko ha imo didto han bukid.”

Ginpahimo an Alad para han Tulda han Ginoo

⁹ “Para han Tulda han Ginoo leboti ini hin alad nga mga biray nga lino nga pino. Didto han timogan nga ligid kinahanglan 44 ka metros an kahilaba han mga biray,

¹⁰ nga tinukod hin 20 nga mga harigi nga bronse nga hinawiran hin 20 nga mga tungtongan nga bronse upod in mga sab-itan ngan mga tuko nga salapi.

¹¹ Amo ngahaw an buhata didto han amihanan nga ligid han alad.

¹² Didto han katundan nga ligid, magkakamay-ada mga biray nga 22 ka metros an kahiglaba, upod in napulo nga mga harigi ngan napulo nga mga tungtongan.

¹³ Didto han sinirangan nga ligid, diin aadto an porta magigin 22 ka metros liwat an kahiluag han alad.

^14-15 Dida han kada ligid han aragian magkakamay-ada 66 ka metros nga mga biray, upod in tulo nga mga harigi ngan tulo nga mga tungtongan.

¹⁶ Para han porta ngahaw magkakamay-ada usa nga biray nga 9 ka metros an kahilaba, nga hinimo tikang hin lino nga pino nga hinablonan hin asul, granate, ngan pula nga delana, ngan binordahan. Tutukoron ini hin upat nga mga harigi dida hin upat nga mga tungtongan.

¹⁷ Dudurugtongon pina hin mga kable nga salapi an ngatanan nga mga harigi palibot han alad, ngan salapi an ira mga sab-itan, ngan bronse an ira tungtongan.

¹⁸ Magigin 44 ka metros an kahilaba han alad, 22 ka metros an kahiluag, ngan 2.2 ka metros an kahitaas. Kinahanglan paghimoon an mga biray hin lino nga pino ngan an mga tungtongan hin bronse.

¹⁹ Kinahanglan bronse an ngatanan nga garamiton nga ginagamit didto han Tulda, ngan an ngatanan nga mga usok para han Tulda ngan para han alad.

Pagmamangnoan an Lampara

²⁰ “Sugoa an mga tawo han Israel nga dad-on ngada ha imo an gimamaupayi nga lana hin olibo para han lampara basi madagkotan ini kada gab-i.

²¹ Igbubutang ni Aaron ngan han iya mga anak nga kalalaken-an an lampara didto ha Tulda han Ginoo ha gawas han biray nga aada ha atubangan han Kahon han Ginsaaran. Kinahanglan mag-aga an paglaga hini ha akon atubangan. Kinahanglan pagtumanon han mga Israelita ngan han ira mga tulin ini nga sugo ha kadayonan.