Exodo 26 - Samarenyo Meaning-Based Bible (1984)

An Tulda han Ginoo

¹ “Paghimo kamo han akon Tulda. Para han sakob han akon Tulda, gamit kamo hin 10 ka tinabas nga lino nga pino nga ginhablonan hin asul, granate, ngan pula nga dilana. Bordahi ini hin mga dagway hin mga kerubin.

² Himoa an kada tinabas nga 12 ka metros an kahilaba ngan duha ka metros an kahilapad. Kinahanglan pareho kadagko an kada tinabas.

³ Takiptakipa hin pagtahi an lima ka tinabas, ngan sugad man an lain nga lima nga tinabas.

⁴ Himoi hin mga tarutalinga nga asul nga dugnit dida han sidsid han gawas nga tinabas han kada usa nga tinakip.

⁵ Butangi hin 50 nga mga tarutalinga an syahan nga tinabas han syahan nga tinakip ngan 50 nga mga tarutalinga nga katugbang hini dida han kataposan nga tinabas han ikaduha nga tinakip.

⁶ Paghimo hin 50 nga mga sab-itan nga bulawan nga gagamiton hin pagsumpay han duha nga tinakip basi mausa nala ka bug-os.

⁷ “Paghimo hin tahob para han Tulda tikang hin onse ka pedaso nga mga dugnit nga hinimo hin barahibo hin kanding.

⁸ Paprehoa kadagko ini ngatanan, nga 13 ka metros an kahilaba ngan duha ka metros an kahilapad.

⁹ Taragkipa hin pagtahi an lima hini ngadto hin usa nga tinakip, ngan sugad man an lain nga unom ngadto hin lain nga tinakip. Piloa hin doble an ikaunom nga tinabas ngadto ha atubangan han Tulda.

¹⁰ Butangi hin 50 nga mga tarutalinga dida han sidsid han kataposan nga tinabas han usa nga tinakip, ngan 50 nga mga tarutalinga dida han sidsid han ikaduha nga tinakip.

¹¹ Paghimo hin 50 nga bronse nga mga sab-itan ngan igbutang ini dida han mga tarutalinga hin pagsumpay han duha nga mga tinakip basi mausa nala nga tahob.

¹² Patuntuna ngadto ha luyo han Tulda an sobra nga katunga nga tinabas.

¹³ An sobra nga 50 ka sentimetros ha kada ligid han kahilab-an han mga tinakip kinahanglan tumunton ngadto han mga ligid han Tulda basi ini makatabon.

¹⁴ “Paghimo hin duha pa nga mga tahob, nga hinimo hin tinina nga pula nga anit hin karnero nga lalaki, ngan anit hin kanding an ikaduha.

¹⁵ “Paghimo hin natindog nga mga balayan para han Tulda tikang hin kahoy nga akasya,

¹⁶ nga upat ka metros an kahilaba ngan 66 ka sentimetros an kahilapad an kada usa,

¹⁷ nga may duha nga mga tiiltiil nga magkatungod basi magkaturugkop an mga balayan. Kinahanglan may-ada hini nga mga tiiltiil an ngatanan nga mga balayan.

¹⁸ Paghimo hin 20 nga mga balayan para han timogan nga ligid

¹⁹ ngan hin 40 nga mga tungtongan nga salapi ha ubos balayan nga tagduha nga tungtongan ha ubos han kada usa nga balayan hin paghawid han duha nga mga tiiltiil hini.

²⁰ Paghimo hin 20 nga mga balayan para han amihanan nga ligid han Tulda,

²¹ ngan 40 nga mga tungtongan nga salapi, nga tagduha ha ubos han kada balayan.

²² Para han luyo han Tulda didto ha katundan, paghimo hin unom nga mga balayan,

²³ ngan duha nga mga balayan para han mga kanto.

²⁴ Tutugkopon tikang ha ubos ngadto ha igbaw ini nga mga balayan ha kanto. Susugaron hini an paghimo han duha nga mga balayan nga nagpoporma han duha nga mga kanto.

²⁵ Sanglit magkakamay-ada walo nga mga balayan nga may 16 nga mga tungtongan nga salapi, tagduha ha ubos han kada usa nga balayan.

²⁶ “Paghimo hin 15 nga mga palhog nga kahoy nga akasya, lima para han mga balayan dida han usa nga ligid han Tulda,

²⁷ lima para han mga balayan dida han ikaduha nga ligid, ngan lima para han mga balayan dida han katundan nga kataposan ha luyo han Tulda.

²⁸ Malahos an butnga nga palhog nga aada ha katunga han mga balayan matikang ha usa nga kataposan han Tulda ngadto ha luyo.

²⁹ Putsa hin bulawan an mga balayan ngan sigoha ini hin maupay pinaagi hin pagbutang hin mga sulpotan nga bulawan nga magtutugkop han mga palhog nga puputson liwat hin bulawan.

³⁰ Tindoga an Tulda sumala han surubdan nga iginpakita ko ha imo didto han bukid.

³¹ “Paghimo hin usa nga biray nga lino nga pino nga hinablonan hin asul, granate, ngan pula nga delana. Bordahi ini hin mga dagway hin mga kerubin.

³² Bitaya ini nga biray dida hin upat nga mga harigi nga kahoy nga akasya nga pinutos hin bulawan, nga binutangan hin mga sab-itan, ngan ipinadapat dida hin upat nga mga tungtongan nga salapi.

³³ Igbutang an biray ha ubos han rungbay han mga sab-itan didto han atop han Tulda, ngan igbutang ha luyo han biray an Kahon han Ginsaaran nga sinusudlan han duha nga mga papan nga bato. An biray amo an magbubulag han Baraan nga Dapit tikang han Labi Kabaraan nga Dapit.

³⁴ Takpi an Kahon han Ginsaaran.

³⁵ Ha gawas han Labi Kabaraan nga Dapit igbutang an lamesa hirani han amihanan nga dapit han Tulda ngan an kandilero hirani han timogan nga dapit atbang han lamesa.

³⁶ “Para han porta han Tulda paghimo hin biray nga lino nga pino nga hinablonan hin asul, granate, ngan pula nga delana ngan binordahan.

³⁷ Para hini nga biray paghimo hin lima nga mga harigi nga kahoy nga akasya, nga pinutos hin bulawan, ngan binutangan hin mga sab-itan nga bulawan; paghimo hin lima nga bronse nga mga tungtongan para hini nga mga harigi.