Exodo 25 - Samarenyo Meaning-Based Bible (1984)

Mga Halad para han Baraan nga Dapit

¹ Nagsiring kan Moises an Ginoo,

² “Sidnga an mga Israelita nga mag-andam hira hin halad para ha akon. Karawata an bisan ano nga mga halad nga karuyag nira ighatag ha akon.

³ Amo ini an imo kakarawaton nga mga halad: bulawan, salapi, ug bronse;

⁴ lino nga pino, delana nga asul, granate, ngan pula, dugnit nga hinimo hin barahibo hin kanding,

⁵ anit hin lalaki nga karnero nga tinina hin pula, anit hin kanding; kahoy nga akasya;

⁶ lana para han mga lampara, mga pahamot para han lana nga igdirihog ngan pahamot para han insyenso;

⁷ mga kornalina ngan iba pa nga mga alahas nga igburutang dida han baraan nga efod han Gilalabawi nga Padi ngan dida han iya tahob han dughan.

⁸ Kinahanglan ighimo ako han mga tawo hin usa nga baraan nga Tulda, basi makag-ukoy ako tampo ha ira.

⁹ Himoa an tulda ngan an ngatanan nga mga higamit hini sumala han surubdan nga ipakikita ko ha imo.

An Kahon han Ginsaaran

¹⁰ “Paghimo hin usa nga Kahon tikang han kahoy nga akasya, nga 110 ka sentimetros an kahilaba, 66 ka sentimetros an kahilapad, ngan 66 ka sentimetros an kahitaas.

¹¹ Haklapi ini hin puraw nga bulawan ha sulod ngan ha gawas, ngan paliboti ini hin borlas nga bulawan nga ribite.

¹² Himoi ini hin upat nga maglidong nga sulpotan nga bulawan ngan igtaod ini ngada han upat nga mga tiiltiil han Kahon, duha ka maglidong nga sulpotan ha kada ligid.

¹³ Paghimo hin mga parasgan nga kahoy nga akasya ngan putsa ini hin bulawan,

¹⁴ ngan igsulpot ini dida han mga maglidong nga sulpotan ha kada ligid han Kahon.

¹⁵ Ayaw pagtarutalsoa an mga parasgan dida han mga maglidong nga sulpotan.

¹⁶ Niyan igsulod ha Kahon an duha nga mga papan nga bato nga ighahatag ko ha imo nga sinuratan han akon mga sugo.

¹⁷ “Niyan paghimo hin takop nga puraw nga bulawan, nga 110 ka sentimetros an kahilaba ngan 66 ka sentimetros an kahilapad.

¹⁸ Paghimo ma duha nga kerubin tikang hin pinilpig nga bulawan,

¹⁹ nga tag usa para han kada kataposan han takop. Himoa ini nga unay gayod han takop.

²⁰ Mag-aatubang ha bawbaw han takop an mga kerubin nga buklad an ira mga pako nga makakapandong han takop.

²¹ Igsulod ha Kahon an duha nga mga papan nga bato ngan ibutang ha bawbaw an takop.

²² Didto makigkita ako ha imo. Tikang ha igbaw han takop, ha butnga han duha nga mga kerubin ighahatag ko ha imo an ngatanan ko nga mga balaod para han mga tawo han Israel.

An Lamesa para han Tinapay nga Iginhalad ha Dyos

²³ “Paghimo hin lamesa tikang hin kahoy nga akasya, nga 88 ka sentimetros an kahilaba, 44 ka sentimetros an kahilapad, ngan 66 ka sentimetros an kahitaas.

²⁴ Haklapi ini hin puraw nga bulawan ngan paliboti ini hin ribite nga bulawan.

²⁵ Paliboti ini hin moldora nga 7 1/2 ka sentimetros an kahilapad ngan paliboti hin bulawan nga ribite an moldora.

²⁶ Himoi ini hin upat nga maglidong nga sulpotan nga bulawan ngan igtaod ini dida han upat nga mga kanto diin aada an mga tiiltiil.

²⁷ Igbubutang ha hirani han moldora an mga maglidong nga sulpotan nga susuhotan han mga parasgan para hin pagdara han lamesa.

²⁸ Himoa an mga parasgan tikang hin kahoy nga akasya ngan putsa ini hin bulawan.

²⁹ Paghimo hin mga plato, mga tasa, mga tibodtibod, ngan mga makaong nga gagamiton para han mga halad nga irimnon. Hihimoon ini ngatanan tikang hin puraw nga bulawan.

³⁰ Igbubutang an lamesa dida ha atubangan han Kahon han Ginsaaran ngan dayuday aada ha bawbaw han lamesa an tinapay nga baraan nga iginhalad ha akon.

An Kandilero

³¹ “Paghimo hin usa nga kandilero nga puraw nga bulawan. Himoa an tungtongan ngan an lawas hini tikang hin pinilpig nga bulawan. An adorno nga mga bukad, upod an mga biyuos ngan mga petalo hini kinahanglan nga unay han lawas han kandilero.

³² Maulbo tikang ha kagiliran hini in unom nga mga sanga, tagtulo kada ligid.

³³ An kada usa han unom nga mga sanga magkakamay-ada tulo nga mga bukad hin almendres nga adorno upod in mga biyuos ngan mga petalo.

³⁴ An lawas han kandilero magkakamay-ada adorno nga upat nga mga bukad nga sugad hin mga bukad hin almendres upod an mga biyuos ngan mga petalo.

³⁵ Magkakamay-ada usa nga biyuos ha ubos han kada usa han tulo ka padis nga mga sanga.

³⁶ Magigin usa la ka bug-os hin pinilpig nga bulawan an mga biyuos, an mga sanga, ngan an kandilero.

³⁷ Paghimo hin pito nga mga lampara para han kandilero ngan igbutang ini basi makalamrag ngadto ha atubangan.

³⁸ Himoa tikang hin puraw nga bulawan an mga kimpit ngan mga sangga han lampara.

³⁹ Gamit hin 35 ka kilo nga puraw nga bulawan hin paghimo han kandilero ngan han ngatanan nga mga kasangkapan hini.

⁴⁰ Himoa gud ini sumala han surubdan nga iginpakita ko ha imo didto ha bukid.