Exodo 19 - Samarenyo Meaning-Based Bible (1984)

Nagkaabot ha Bukid Sinai an mga Israelita

^1-2 Binmaya han Refidim an mga tawo han Israel ngan inmabot hira ngadto ha kamingawan han Sinai dida han syahan nga adlaw han ikatulo nga bulan katapos nira bumaya han Ehipto. Didto nagkampo hira ha ubos han Bukid Sinai,

³ ngan sinmagka han bukid hi Moises hin pakigkita han Dyos. Nagtawag an Ginoo kan Moises tikang han bukid ngan pinapaghimangraw hiya ha mga Israelita nga mga tulin ni Jacob hin pagsiring:

⁴ “Hinkit-an niyo an ginbuhat ko nga Ginoo ha mga Ehiptohanon ngan an pagdara ko ha iyo nga sugad hin pagdara hin agila han iya mga piso ha bawbaw han iya mga pako, ngan gindara ko kamo nganhi ha akon.

⁵ Yana, kon pagsugton ako niyo, ngan kon pagtumanon niyo an akon ginsaaran, magigin akon kamo kalugaringon nga mga tawo. Akon an bug-os nga tuna, kundi magigin akon kamo pinili nga mga tawo,

⁶ mga tawo nga iginhalad ha akon gud la, ngan mag-aalagad kamo nga kapadian ha akon.”

⁷ Sanglit linmugsong hi Moises ngan gintirok niya an mga pangulo han mga tawo ngan ginsumatan hira han ngatanan nga iginsugo ha iya han Ginoo.

⁸ Niyan binmaton hin durungan an ngatanan nga mga tawo, “Pagbubuhaton namon an ngatanan nga iginsiring han Ginoo,” ngan ginsumatan hini ni Moises an Ginoo.

⁹ Nagsiring kan Moises an Ginoo, “Mapakada ako ha imo dida hin madakmol nga dampog, basi makabati an mga tawo nga nakikighimangraw ako ha imo ngan basi tumoo na hira ha imo.” Ginsumatan ni Moises an Ginoo han iginbaton han mga tawo,

¹⁰ ngan nagsiring ha iya an Ginoo, “Kadtoa an mga tawo ngan papaglinisa hira han ira kalugaringon yana ngan buwas para hin pagsingba. Kinahanglan pagbunakan nira an ira mga panapton,

¹¹ ngan maandam hira para sangbuwas nga adlaw. Dida hito nga adlaw malusad ako ngada ha Bukid Sinai diin hikikit-an ako han ngatanan nga mga tawo.

¹² Pagtigaman hin pag-ultan palibot han bukid. Kinahanglan diri magpasipara hin paglakad hini an mga tawo, ngan sidnga hira nga diri sumagka han bukid o bisan hin paghirani han bukid. An bisan hin-o nga makatamak ngan makalakad han pag-ultan, kinahanglan patayon hiya;

¹³ kinahanglan pagbatohon o pagpanaon hiya, hin waray tawo nga maglalabot ha iya. Bubuhaton ini para han magpasipara nga mga tawo ngan mga mananap; kinahanglan patayon hira. Kundi kon patunggon na an trompeta, kinahanglan sumagka ngadto han bukid an mga tawo.”

¹⁴ Niyan linmugsong han bukid hi Moises ngan ginsumatan an mga tawo nga mag-andam hira hin pagsingba. Sanglit ginbunakan nira an ira mga panapton,

¹⁵ ngan ginsiring hira ni Moises, “kinahanglan maandam kamo dida han ikatulo ka adlaw ngan ayaw la anay kamo pakighilawas.”

¹⁶ Dida han pagkaaga na han ikatulo ka adlaw nagdalugdog ngan nagkikidlat, pinmakita in usa nga madakmol nga dampog ha bawbaw han bukid, ngan hinbatian in makusog hin duro nga tunog hin trompeta. Nangurog hin kahadlok an ngatanan nga mga tawo didto han kampo.

¹⁷ Gin-unhan hira ni Moises paggawas han kampo hin pakigkita han Dyos, ngan tinmindog hira didto han ubos han bukid.

¹⁸ Naputos hin aso an bug-os nga Bukid Sinai, kay linmusad an Ginoo dida hin kalayo. Inmusbok an aso sugad hin tikang hin usa nga hudno, ngan nangurog hin duro an ngatanan nga mga tawo.

¹⁹ Nagtikadako an tunog han trompeta. Nagyakan hi Moises ngan ginbaton hiya han Dyos pinaagi hin dalugdog.

²⁰ Linmusad an Ginoo ngadto han bawbaw han Bukid Sinai ngan ginpakadto hi Moises ha bawbaw han bukid. Sinmagka hi Moises

²¹ ngan nagsiring ha iya an Ginoo, “Lusad ngan tugona an mga tawo nga diri hira lumakad han pag-ultan hin pagkadi ngan pagtan-aw ha akon; kon magtalapas hira hini, damo ha ira in magkakamatay.

²² Kinahanglan maglinis ha ira ngahaw bisan an kapadian nga mahirani ha akon, kay kon diri, pagkakastigohon ko hira.”

²³ Nagsiring hi Moises han Ginoo, “Diri makakasagka an mga tawo, kay ginsugo mo kami nga pag-isipon namon nga baraan an bukid ngan amon paglibotan hin pag-ultan.”

²⁴ Binmaton an Ginoo, “Lusad ngan paupda ha imo hi Aaron kon bumalik ka. Kundi kinahanglan diri tumabok han pag-ultan an kapadian ngan an mga tawo hin pagkadi ha akon, kay kon tumabok hira, kakastigohon ko hira.”

²⁵ Sanglit linmugsong hi Moises ngadto han mga tawo ngan ginsumatan hira han iginsiring han Ginoo.