Exodo 13 - Samarenyo Meaning-Based Bible (1984)

Iginhalad an mga Suhag

¹ Nagsiring kan Moises an Ginoo,

² “Ighalad ha akon an ngatanan nga suhag nga kalalaken-an, kay akon an kada suhag nga lalake nga Israelita, ngan an kada suhag nga lalaki nga mananap.”

Ginsaurog an Pyesta han Tinapay nga Waray Patubo

³ Nagsiring hi Moises han mga tawo, “Hinumdomi ini nga adlaw—an adlaw han pagbaya niyo han Ehipto, an dapit diin mga oripon kamo. Amo ini an adlaw han pagpagawsa ha iyo han Ginoo pinaagi han iya dako nga gahom. Diri kamo makakaon han tinapay nga may-ada patubo.

⁴ Mabaya kamo han Ehipto dida hini nga adlaw han syahan nga bulan, an bulan han Abib.

⁵ Nagsaad han iyo kaapoy-apoyan an Ginoo hin paghatag ha iyo han tuna han mga Canaanhon, han mga Hiteohanon, han mga Amoreohanon, han mga Hibeohanon, ngan han mga Jebuseohanon. Kon pagdad-on na kamo niya ngadto hito nga hura ngan matambok nga tuna, kinahanglan pagsaurogon niyo ini nga pyesta dida han syahan nga bulan han kada tuig.

⁶ Sulod hin pito ka adlaw kinahanglan kumaon kamo hin tinapay nga waray patubo, ngan dida han ikapito nga adlaw magsasaurog kamo hin pagpasidungog han Ginoo.

⁷ Sulod hin pito ka adlaw kinahanglan diri kamo kumaon hin bisan ano nga tinapay nga may-ada patubo; kinahanglan waray patubo o waray tinapay nga may-ada patubo bisan diin nga dapit han iyo tuna.

⁸ Kon magtikang na an pyesta, sumati an iyo mga anak nga kalalaken-an nga ginbubuhat niyo ini ngatanan tungod han ginbuhat ha iyo han Ginoo han pagawas niyo han Ehipto.

⁹ Ini nga pagsaurog usa ini nga pahinumdom sugad hin ihinigot nga tigaman ha iyo kamot o ipinatik ha iyo agtang nga magpapahinumdom ini ha iyo basi magpadayon kamo hin pagsubay ngan pag-aram han Balaod han Ginoo tungod nga ginpagawas kamo han Ginoo tikang ha Ehipto pinaagi han iya dako nga gahom.

¹⁰ Pagsauroga niyo ini nga pyesta dida han igintalaan nga panahon ha kada tuig.

Iginhalad an mga Suhag ngadto han Ginoo

¹¹ “Kon dad-on kamo han Ginoo ngadto han tuna han mga Canaanhon nga iginsaad hin paghatag ha iyo ngan han iyo kaapoy-apoyan,

¹² kinahanglan ighalad niyo ha Ginoo an ngatanan nga mga suhag nga lalake. Kanan Ginoo an ngatanan nga mga suhag nga lalaki han iyo kamanampan,

¹³ kundi kinahanglan lukaton niyo ha iya an tagsa nga suhag nga asno nga lalaki pinaagi hin paghalad hin usa nga nati nga karnero. Kon diri niyo karuyag hin paglukat han asno, baria an liog hini. Kinahanglan lukaton niyo an kada suhag nga lalake nga iyo anak.

¹⁴ Ha tiarabot nga panahon, kon pakianhan kamo han iyo anak kon ano an kahulogan hini nga turumanon, iyo babatonon hiya, ‘Pinaagi hin dako nga gahom, ginpagawas kami han Ginoo tikang ha Ehipto, an dapit diin gin-oripon kami.

¹⁵ Han matig-a an kasingkasing han hadi han Ehipto ngan dinmiri hiya hin pagpalakat ha amon, ginpatay han Ginoo an ngatanan nga mga suhag nga kalalaken-an han tawo pati an lalaki han mananap didto han tuna han Ehipto. Amo ito nga iginhahalad namon han Ginoo an ngatanan nga mga suhag nga lalaki nga mananap, kundi linulukat namon an amon suhag nga kalalaken-an.

¹⁶ Ini nga pagsaurog usa ini nga pahinumdom sugad hin ihinigot nga tigaman ha amon mga kamot o ipinatik ha amon mga agtang nga magpapahinumdom ini ha amon nga ginpagawas kami han Ginoo tikang ha Ehipto pinaagi han iya dako nga gahom.’”

May Harigi nga Dampog ngan Harigi nga Kalayo

¹⁷ Han pagtugoti na han hadi han Ehipto nga an mga Israelita makakahimo na hin paglakat, waray hira dad-a han Dyos pinaagi han dalan nga nagliligid han baybayon tipakadto ha Filistia, bisan kon amo ini an laktod nga dalan. Naghunahuna an Dyos, “Diri ko karuyag nga mabalhin an hunahuna han mga tawo ngan bumalik hira ngadto ha Ehipto kon makasabot hira nga maasdang hira hin araway.”

¹⁸ Iya lugod iginlibot hira han kamingawan tipakadto han Dagat Pula. Sangkap hin pakig-away an mga Israelita.

¹⁹ Gindara ni Moises an mga tul-an ni Jose, sumala han pagpasumpaa ni Jose han mga Israelita nga tutumanon nira ini. Nagsiring hi Jose, “Kon pagtalwason na kamo han Dyos, kinahanglan pagdad-on niyo an akon mga tul-an tikang hini nga dapit.”

²⁰ Binayaan han mga Israelita an Sucot ngan nagkampo hira didto ha Etam, didto han ligid han kamingawan.

²¹ Nag-uuna ha ira an Ginoo pinaagi hin harigi nga dampog kon adlaw hin pagtutdo ha ira han dalan, ngan pinaagi hin harigi nga kalayo kon gab-i ha paghatag ha ira hin kapawa, basi makagpadayon hira hin paglakat adlaw gab-i.

²² Dayuday nag-una han mga tawo an harigi nga dampog kon adlaw ngan an harigi nga kalayo kon gab-i.