Exodo 12 - Samarenyo Meaning-Based Bible (1984)

An Paglabay

¹ Naghimangraw an Ginoo kanda Moises ug Aaron didto ha Ehipto:

² “Amo ini an syahan nga bulan han tuig para ha iyo.

³ Ighatag ini nga mga tugon ngadto han bug-os nga bungto han Israel: Dida han ikanapulo nga adlaw hini nga bulan kinahanglan magpili an kada tawo hin usa nga nati nga karnero o nati nga kanding para han iya panimalay.

⁴ Kon diri damo an sakop han iya panimalay nga diri makakaubos hin bug-os nga nati nga karnero, mahihimo nga in usa nga karnero pagsaroan niya ngan han iya sapit nga amyaw, sumala han kadamo han mga tawo ngan sumala han kadamo nga makakaon han kada tawo.

⁵ Makakagpili kamo hin karnero o kanding, kundi kinahanglan lalaki ini, usa ka tuig an panuigon, ngan waray gud mga karat-an.

⁶ Laminga ini tubtob han ika-14 nga adlaw han bulan, diin dida hiton gab-i pag-iihawon han bug-os nga bungto han Israel an hayop.

⁷ Makuha hira han dugo ngan igpapahid ini dida han mga harigi han porta ngan han baybayon nga igbaw han porta han kabalayan diin kakaonon an mga hayop.

⁸ Hito nga gab-i pag-aaslon an inihaw, ngan kakaonon ini upod hin magpait nga mga panakot ngan hin tinapay nga waray patubo.

⁹ Ayaw kamo pagkaon hin bisan ano nga bahin han gin-ihaw nga hilaw o linaga, kundi kaona ini nga gin-asal hin bug-os, lakip an ulo, an mga tiil, ngan an mga sulod han ginhawa.

¹⁰ Kinahanglan diri kamo magsalin hin bisan ano hini ngada han pagkaaga; kon may mahisalin, kinahanglan pagsunogon ini.

¹¹ Kinahanglan kaonon ini niyo hin kadagmitan, nga nakabado na kamo nga daan, andam para hin paglakat, nga may sandalyas na an iyo mga tiil ngan tungkod ha iyo kamot. Amo ini an Paglabay nga pagbubuhaton niyo hin pagpasidungog ha akon nga Ginoo.

¹² “Dida hito nga gab-i maglalatas ako han tuna han Ehipto ngan papatayon ko an ngatanan nga suhag nga lalake, ma tawo ug ma mananap, ngan kakastigohon ko an ngatanan nga kadiyosan han Ehipto. Ako amo an Ginoo.

¹³ Mahihimo nga tigaman han kabablayan nga iyo inuokyan an dugo dida ha mga harigi han porta. Kon hikit-an ko an dugo, lalabyan ko la kamo, ngan diri ko kamo paglalabtan kon kastigohon ko na an mga Ehiptohanon.

¹⁴ Kinahanglan pagsaurogon niyo ini nga adlaw nga usa nga pyesta para han Ginoo hin pagpahinumdom ha iyo han ginbuhat nakon nga Ginoo. Pagsauroga niyo ini ha ngatanan nga tiarabot nga panahon.”

Ginsaurog an Tinapay nga Waray Patubo

¹⁵ Nagsiring an Ginoo, “Sulod hin pito ka adlaw, kinahanglan diri kamo kumaon hin tinapay nga may-ada patubo—kaona la niyo an tinapay nga waray patubo. Dida han syahan nga adlaw iggawas niyo ha iyo mga balay an ngatanan nga patubo hin tinapay, kay kon may kumaon hin tinapay nga may-ada patubo sulod hito nga pito ka adlaw, diri na hiya pag-iisipon nga sakop han akon mga tawo.

¹⁶ Dida han syahan ngan dida liwat han ikapito nga adlaw kinahanglan magtitirok kamo hin pagsingba. Mapahuway kamo dida hito nga mga adlaw, kundi makakahimo kamo pag-andam hin pagkaon.

¹⁷ Sauroga niyo ini kay dida hini nga adlaw ginpagawas ko tikang ha Ehipto an iyo mga tribo. Sanglit kinahanglan pagsaurogon niyo nga pyesta ini nga adlaw ha ngatanan nga panahon nga tiarabot.

¹⁸ Kinahanglan diri kamo kumaon hin bisan ano nga tinapay nga may-ada patubo tikang han gab-i han ika-14 nga adlaw han syahan nga bulan ngadto han gab-i han ika-21 nga adlaw.

^19-20 Sulod hin pito ka adlaw kinahanglan waray patubo hin tinapay nga hiagian didto han iyo mga balay, kay diri na pag-iisipon nga sakop han akon mga tawo an bisan hin-o nga kumaon hin tinapay nga may-ada patubo, ma tuminungnong hiya o lumalangyaw.”

Ginsaurog an Syahan nga Paglabay

²¹ Gintawag ni Moises an ngatanan nga mga pangulo han Israel, ngan ginsiring hira, “Magpili an tagsa ha iyo hin usa nga nati nga karnero o nati nga kanding ngan ihawa ini, basi makagsaurog han Paglabay an iyo mga panimalay.

²² Kuha kamo hin sanga hin isopo, igtunlob ini ha dugo han hayop dida han makaong nga ginsudlan ngan igpahid an dugo dida han mga harigi han porta ngan han baybayan nga igbaw han porta han iyo balay. Waray usa ha iyo nga gumawas han balay ngada han pagkaaga.

²³ Kon maglatas na han Ehipto an Ginoo hin panmatay han mga Ehiptohanon, hikikit-an niya an dugo dida han mga baybayan ngan han mga harigi han porta, ngan diri niya tutugotan an Anghel han Kamatayon hin pagsulod han iyo mga balay ngan pagpatay ha iyo.

²⁴ Kinahanglan pagtumanon niyo ngan han iyo mga anak ha kadayonan ini nga mga turumanon.

²⁵ Kon sumulod na kamo han tuna nga iginsaad han Ginoo hin paghatag ha iyo, kinahanglan pagbuhaton niyo ini nga seremonyas.

²⁶ Kon magpakiana ha iyo an iyo mga anak, ‘Ano an kahulogan hini nga seremonyas?’

²⁷ mabaton kamo, ‘Amo ini an halad han Paglabay hin pagpasidungog han Ginoo, kay ginlabyan la niya an kabablayan han mga Israelita didto ha Ehipto. Pinanmatay niya an mga Ehiptohanon, kundi gintalwas kami!’” Nanluhod ngan nagsingba an mga Israelita.

²⁸ Katapos linmakat hira ngan ginbuhat nira an iginsugo han Ginoo kanda Moises ug Aaron.

Nagkamatay an mga Suhag

²⁹ Dida han katutnga na han kagab-ihon pinanmatay han Ginoo an ngatanan nga mga suhag nga kalalaken-an didto ha Ehipto, tikang han anak han hadi nga manurunod han trono, ngadto han anak han mga bihag didto ha prisohan; pinanmatay liwat an ngatanan nga mga suhag nga kamanampan.

³⁰ Hito nga gab-i nagmata an hadi, an iya mga opisyal, ngan an ngatanan nga mga Ehiptohanon. May-ada makusog nga panangis ha bug-os nga Ehipto, kay waray usa nga panimalay didto nga waray patay nga anak nga lalake.

³¹ Hito ngahaw nga gab-i ginpatawag han hadi hira Moises ug Aaron ngan ginsiring, “Iwas, kamo ngan an mga Israelita! Bayai niyo an akon nasod; kadto ngan pagsingba kamo han Ginoo, sumala han iyo ginhangyo ha akon.

³² Dad-a an iyo mga karnero, mga kanding, ngan mga baka, ngan pagkalakat na kamo. Ig-ampo man liwat ako nga bendisyonan ako.”

³³ Gin-agda han mga Ehiptohanon an mga tawo nga magdagmit hira hin pagbaya han nasod. Nagsiring hira, “Magkakamatay kami ngatanan kon diri kamo umiwas.”

³⁴ Sanglit ginpuno han mga tawo hin ira minasa nga waray patubo an ira mga hormaan hin tinapay, ginputos nira hin mga dugnit, ngan ginpas-an ini nira.

³⁵ Gintuman han mga Israelita an iginsiring ni Moises, ngan nangaro hira han mga Ehiptohanon hin bulawan ug salapi nga mga alahas ngan hin mga panapton.

³⁶ Ginlarang han Ginoo nga pagtahoron han mga Ehiptohanon an mga Israelita ngan gintagan hira han ira pinangaro. Dida hini nga paagi, gindara han mga Israelita an mga manggad han mga Ehiptohanon.

Binmaya han Ehipto an mga Israelita

³⁷ Nagbaktas an mga Israelita tikang ha Rameses ngadto ha Sucot. May-ada mga 600,000 an kalalaken-an, labot han kababayen-an ngan kabataan.

³⁸ Inmupod liwat ha ira in damo nga iba nga mga tawo ngan damo nga mga karnero, mga kanding ngan mga baka.

³⁹ Naghudno hira hin tinapay nga waray patubo tikang han dara nira nga daan minasa tikang ha Ehipto, kay tigda la an pagpaiwasa ha ira nga waray na nira panahon hin pag-andam han ira pagkaon o hin minasa nga may-ada patubo.

⁴⁰ Nag-ukoy an mga Israelita didto ha Ehipto sulod hin 430 ka tuig.

⁴¹ Dida han adlaw han katapos na han 430 ka tuig, binmaya han Ehipto an ngatanan nga mga tribo han mga tawo han Ginoo.

⁴² Gab-i adto nga nag-agma an Ginoo hin pagpagawas ha ira tikang ha Ehipto; ighahalad ini ngahaw nga gab-i ngadto han Ginoo para ha ngatanan nga panahon nga tiarabot sugad nga gab-i nga kinahanglan mag-agma an mga Israelita.

Iginhatag an mga Turumanon hiunong han Paglabay

⁴³ Nagsiring kanda Moises ug Aaron an Ginoo, “Amo ini an mga turumanon han Paglabay: Waray lumalangyaw nga makaon han ginhalad han Paglabay,

⁴⁴ kundi makakakaon hini in bisan hin-o nga oripon nga iyo pinalit, kon pagtorion hiya anay.

⁴⁵ Diri makakakaon hini adton lumalabay la nga umorukoy o sinuholan la nga paratrabaho.

⁴⁶ Kinahanglan kaonon ini ngatanan nga gin-andam ha sakob han balay nga gin-andaman; kinahanglan diri ini pagdad-on ha gawas. Ngan ayaw pagbaria in bisan usa nga tul-an han hayop.

⁴⁷ Kinahanglan pagsaurogon han bug-os nga bungto han Israel ini nga pyesta.

⁴⁸ Kundi waray makakakaon hini nga diri tinori nga lalake. Kon nag-ukoy dida ha iyo in usa nga lumalangyaw ngan karuyag hiya magsaurog han Paglabay hin pagpasidungog han Ginoo, kinahanglan iyo pagtorion anay an ngatanan nga kalalaken-an han iya panimalay. Niyan kinahanglan isipon na hiya nga sugad hin tunay nga natawo nga Israelita, ngan makakatampo na hiya han pyesta.

⁴⁹ Waray kalainan an mga turumanon han tunay nga natawo nga mga Israelita ngan han mga lumalangyaw nga nag-uokoy tampo ha iyo.”

⁵⁰ Sinmugot an ngatanan nga mga Israelita ngan gintuman nira an iginsugo han Ginoo kanda Moises ug Aaron.

⁵¹ Dida hito manla nga adlaw ginpagawas han Ginoo an mga tribo nga Israelita tikang ha Ehipto.