Exodo 10 - Samarenyo Meaning-Based Bible (1984)

Mga Duron

¹ Niyan nagsiring kan Moises an Ginoo, “Kadto ngan pakigkita han hadi. Ginpatig-a ko an kasingkasing niya ngan han iya mga opisyal, basi pagbuhaton ko dida ha ira ini nga mga milagro,

² ngan basi makagsumat ka han imo mga anak ngan mga apo kon gin-unan-o ko hin pagluronga han mga Ehiptohanon han pagbuhata ko han mga milagro. Mahibabaro kamo ngatanan nga ako amo an Ginoo.”

³ Sanglit kinmadto han hadi hira Moises ug Aaron ngan nagsiring ha iya, “Nasiring an Ginoo nga Dyos han mga Hebreo, ‘Tubtob san-o an diri mo pagtubyan ha akon? Palakta an akon mga tawo, basi makagsingba hira ha akon.

⁴ Kon magpadayon ka hin pagdumiri, buwas gud igpapadara ko nganhi han imo nasod in mga duron.

⁵ Madadamo hin duro an mga duron ngan maluluob gud hini an tuna. Kakaonon hini an ngatanan nga waray mabungkag han mga bato nga yelo, bisan pa an nanhisalin nga kakahoyan.

⁶ Pupun-on hini an imo mga palasyo ngan an kabablayan han ngatanan mo nga mga opisyal ngan ngatanan mo nga mga tawo. Labaw pa ini kamaraot kay han bisan ano nga hinkit-an han iyo kaapoy-apoyan.’” Katapos tinmalikod dayon hi Moises ngan linmakat.

⁷ Ginsiring an hadi han iya mga opisyal, “Tubtob san-o an pakasamok ha aton hini nga tawo? Palakta an kalalaken-an nga mga Israelita basi makagsingba hira han Ginoo nga ira Dyos. Diri ka ba maaram nga nabubungkag na an Ehipto?”

⁸ Sanglit pinabalik ngadto han hadi hira Moises ug Aaron ngan ginsiring hira han hadi, “Makakalakat na kamo ngan makakagsingba han Ginoo nga iyo Dyos. Kundi hira hin-o gud an makadto?”

⁹ Binmaton hi Moises, “Kami gud ngatanan, lakip an amon kabataan ngan an amon kalagasan. Dadad-on namon an amon mga anak nga kalalaken-an ngan kababayen-an, amon mga karnero ngan mga kanding ngan an amon mga baka, kay kinahanglan magsaurog kami hin pyesta ha pagpasidungog han Ginoo.”

¹⁰ Nagsiring an hadi, “Nagsusumpa ako pinaagi han Ginoo nga diri ko gud kamo tutugotan hin pagdara han iyo kababayen-an ngan kabataan! Dayag ini nga karuyag niyo hin pagsupil ha akon.

¹¹ Diri! An kalalaken-an la an makadto hin pagsingba han Ginoo, kon amo ito an iyo karuyag.” Katapos hito, pinaiwas hira Moises ug Aaron tikang ha atubangan han hadi.

¹² Niyan nagsiring kan Moises an Ginoo, “Bayawa an imo kamot ha igbaw han tuna han Ehipto basi magkaabot an mga duron. Maabot ini ngan kakaonon an ngatanan nga naturok, ngan an ngatanan nga nahisalin han pag-uranos han mga bato nga yelo.”

¹³ Sanglit ginbayaw ni Moises an iya tungkod ngan ha bug-os hito nga adlaw ngan gab-i ginpahuyop han Ginoo ngada ha tuna in hangin nga kabunghan. Han pagkaaga na, gindara hini an mga duron.

¹⁴ Nagkaabot ini nga pinangon nga mga duron ngan hinmugdon ha bug-os nga nasod. Amo ini an gidadakoi nga mga pangon hin mga duron nga hinkit-an tikang ha tinikangan ngan diri na gud hikikit-an liwat.

¹⁵ Naluob hini an tuna tubtob nga nag-iritom na la ini hin duron; ginkaon hini an bisan ano nga nahisalin han pag-uranos han mga bato nga yelo, lakip an ngatanan nga mga bunga han kakahoyan. Waray gud lapyo nga dahon nga nahisalin dida hin bisan ano nga kahoy o tanom ha bug-os nga tuna han Ehipto.

¹⁶ Niyan ginpatawag hin kadagmitan han hadi hira Moises ug Aaron ngan ginsiring, “Nakasala ako han Ginoo nga iyo Dyos ngan ha iyo.

¹⁷ Yana pasayloa an akon sala hini yana nga takna ngan pag-ampo kamo han Ginoo nga iyo Dyos nga kuhaon tikang ha akon ini nga makamaratay nga kastigo.”

¹⁸ Binayaan ni Moises an hadi, ngan nag-ampo hiya han Ginoo.

¹⁹ Ngan ginpahuyop han Ginoo an hangin nga habagat, diri na an kabunghan, ngan napalid an mga duron ngadto han Dagat Suez. Waray bisan usa nga duron nga nahibilin ha bug-os nga Ehipto.

²⁰ Kundi ginpatig-a han Ginoo an kasingkasing han hadi ngan waray han hadi palakta an mga Israelita.

Kasisidman

²¹ Niyan nagsiring kan Moises an Ginoo, “Bayawa tipalangit an imo kamot ngan malulukop an tuna han Ehipto hin madakmol nga kasisidman.”

²² Ginbayaw ni Moises tipalangit an iya kamot ngan nagsirom ha bug-os nga Ehipto sulod hin tulo ka adlaw.

²³ Waray na gud maggigikitaay an mga Ehiptohanon ngan waray hira gumawas han balay sulod hito nga panahon. Kundi may-ada kapawa an mga Israelita didto han ira gin-uokyan.

²⁴ Gintawag han hadi hi Moises ngan ginsiring, “Makakalakat na kamo hin pagsingba han Ginoo; makakaupod ha iyo bisan an iyo kababayen-an ngan kabataan. Kundi kinahanglan magpabilin dinhe an iyo mga karnero, mga kanding, ngan mga baka.”

²⁵ Binmaton hi Moises, “Kon sugad, ikaw an mahatag ha amon hin mga mananap para hin mga halad nga tinubod nga ighahalad ngadto han Ginoo nga amon Dyos.

²⁶ Diri; dadad-on namon an amon kahayopan; waray igbibilin bisan mausa. Kinahanglan kami ngahaw an magpipili han kahayopan nga gagamiton namon hin pagsingba han Ginoo nga amon Dyos. Diri kami mahibabaro kon ano nga mga mananap an ighahalad ha iya tubtob han amon pag-abot didto.”

²⁷ Ginpatig-a han Ginoo an kasingkasing han hadi ngan waray gud hiya tumugot nga lumakat hira.

²⁸ Nagsiring kan Moises an hadi, “Iwas ha akon atubangan! Ayaw na gud ako pakitaa pa ha imo! Ha adlaw nga hikit-an ko ikaw, mapatay ka!”

²⁹ Binmaton hi Moises, “Sumala han imo siring, diri ka na gud makita ha akon.”