Ester 8 - Samarenyo Meaning-Based Bible (1984)

Ginpaato an mga Judiyo

¹ Hito manta nga adlaw iginhatag ni Hadi Asuero kan Rayna Ester an ngatanan nga mga hiagi ni Aman nga kaaway han mga Judiyo. Ginsumatan ni Ester an hadi nga uropod niya ni Mardoqueo, ngan tikang hadto tinugotan na hi Mardoqueo hin pagsakob ngadto ha atubangan han hadi.

² Ginhulso han hadi an iya singsing nga ginagamit hin pagtimbre (nga iya ginbawi tikang kan Aman) ngan iginhatag ini ngadto kan Mardoqueo. Iginbutang ni Ester hi Mardoqueo nga tinaporan han mga hiagi ni Aman.

³ Niyan naghimangraw na liwat hi Ester ngadto han hadi, nga hinmapa hiya ha iya tiilan ngan nagtangis. Nakimalooy hiya han hadi nga pugngan an malingoon nga larang kontra han mga Judiyo nga ginhimo ni Aman nga tulin ni Agag.

⁴ Idinuhol han hadi an iya bulawan nga baston ngadto ha iya, sanglit tinmindog hiya ngan nagsiring,

⁵ “Kon maruruyag an Harangdon nga Hadi, ngan kon napaid ka man ha akon, ngan kon daw matadong ini ha imo, pagpagawas gad hin pasangyaw nga diri ipadayon an mga sugo ni Aman—adto nga mga sugo nga ginhatag han anak ni Hamedata nga tulin ni Agag para han pagpuo han ngatanan nga mga Judiyo dinhe han ginhadian.

⁶ Uunanhon ko hin pakailob hini kon umabot ini nga karat-an ngada han akon mga tawo, ngan pamatayon an akon kalugaringon nga kauropdan?”

⁷ Niyan nagsiring hi Hadi Asuero kanda Rayna Ester ug Mardoqueo nga Judiyo, “Tan-awa ginbitay ko na hi Aman tungod han iya malingoon nga larang kontra han mga Judiyo, ngan iginhatag ko na kan Ester an mga hiagi ni Aman.

⁸ Kundi diri mababakwi in usa nga pasangyaw nga iginpagawas na ha ngaran han hadi ngan gintimbrehan na han hadianon nga singsing. Kundi makakahimo ka hin pagsurat ngadto han mga Judiyo hin bisan ano nga imo karuyag; ngan makakagsurat ka hini ha akon ngaran ngan titimbrehan mo han hadianon nga singsing.”

⁹ Nahinabo ini dida han ika-23 nga adlaw han ikatulo nga bulan, an bulan han Siban. Gintawag ni Mardoqueo an mga paragsurat han hadi ngan iginpasurat in mga surat ngadto han mga Judiyo, ngan ngadto han mga gobernador, mga punoan, ngan mga opisyal han ngatanan nga 127 nga mga lalawigan tikang ha India ngadto ha Sudan. Ginsurat ini nga mga surat ngadto han kada lalawigan ha kalugaringon nga pinulongan ngan paagi hin pagsurat han tagsa nga lalawigan, ngan ngadto han mga Judiyo ha ira kalugaringon nga pinulongan ngan paagi hin pagsurat.

¹⁰ Iginpasurat ni Mardoqueo an mga surat ha ngaran ni Hadi Asuero ngan gintimbrehan ini han hadianon nga singsing. Iginpadara ini hin mga dikabayo ngan mensahero ngan mga maglaksi an ginamit nga mga kabayo kay tikang han mga kamalig hin kabayo han hadi.

¹¹ Iginsaysay hini nga mga surat nga an hadi matugot nga magtitirok an mga Judiyo ha tagsa nga syudad para hin pagpanalipod han ira kalugaringon. Kon sulongon an kalalaken-an nga mga Judiyo, an ira mga anak o an ira kababayen-an hin armado nga mga tawo hin bisan ano nga nasod didto hin bisan ano nga lalawigan, tinugotan an mga Judiyo hin pakig-away ngan hin pamatay han mga sumurulong; ngan makakahimo hira hin pagkuha han ira mga hiagi.

¹² Pagtutumanon ini nga sugo ha bug-os nga Ginhadian han Persia dida han adlaw nga igintalaan han panmatay han mga Judiyo, dida han ika-13 nga adlaw han Adar, an ika-12 nga bulan.

¹³ Igpapasangyaw ini nga usa nga balaod ngan igpapahibaro ha ngatanan nga mga tawo, didto han tagsa nga lalawigan, basi maandam an mga Judiyo hin pagbulos han ira kaaway kon umabot na ito nga adlaw.

¹⁴ An mga sinugo han hadi sinmakay hin mga malaksi nga kabayo han hadi. Iginpasangyaw liwat an sugo didto ha Susa nga kapital nga syudad.

¹⁵ Binmaya hi Mardoqueo han palasyo nga nakakabado hin hadianon nga asul ngan busag nga panapton, usa nga kurugpos nga pino nga granate nga lino, ngan hin maanyag nga bulawan nga korona. Niyan nagrugyaw an mga kakalsadahan han Susa hin mga pagkalipay ngan malipayon nga mga gogliat.

¹⁶ Para han mga Judiyo may pagrayhak ngan kahimyangan, kalipayan ngan pagbati hin pagdarag-an.

¹⁷ Didto han tagsa nga syudad ug lalawigan, bisan diin pagbasaha an kanan hadi pasangyaw, nagsaurog an mga Judiyo hin pyesta pinaagi hin pangaon ug kalipay. Ha kamatuoran, damo nga mga tawo in nahimo nga mga Judiyo kay nahadlok na man hira han mga Judiyo.