Ester 3 - Samarenyo Meaning-Based Bible (1984)

Naglarang hi Aman hin Pagpuo han mga Judiyo

¹ Inmagi in panahon ngan ginpahitaas ni Hadi Asuero in usa ka tawo nga ginngaranan kan Aman ngadto han katungdanan hin pagka gilalabawi nga opisyal han iya ginhadian. Anak hi Aman ni Hamedata nga tulin ni Agag.

² Ginsugo han hadi an ngatanan nga mga opisyal nga nag-aalagad ha iya hin pagpakita han ira pagtahod kan Aman pinaagi hin pagluhod ngan pagyukbo ha iya atubangan. Ginbuhat ini nira ngatanan labot kan Mardoqueo.

³ Ginpakianhan hiya han iba nga mga opisyal nga nag-aalagad han hadi kay ano nga nasupak hiya han sugo han hadi;

⁴ gin-aghat hiya nira adlaw-adlaw hin pagsugot, kundi waray gud hiya mamati ha ira. Nagsiring hiya, “Judiyo ako ngan diri ako makakayukbo ha atubangan ni Aman.” Sanglit ginsumatan nira hi Aman mahitungod hini. Nahiburong hiya kon pasasagdan ba la niya hi Mardoqueo.

⁵ Napungot hin duro hi Aman han iya pakasabot nga diri maluhod ngan mayukbo ha iya atubangan hi Mardoqueo,

⁶ ngan han paghibaroi niya nga Judiyo hi Mardoqueo, naglarang hiya hin pagkastigo diri la kan Mardoqueo, kundi nakahunahuna hiya hin pagpatay han ngatanan nga mga Judiyo ha bug-os nga ginhadian han Persia.

⁷ Dida han ika-12 ka tuig nga pagkahadi ni Hadi Asuero, dida han syahan nga bulan an bulan han Nisan, nagsugo hi Aman hin pagripa (gintawag ini nga “purim”) basi hibaroan an igo nga adlaw ug bulan hin pagtuman han iya plano. Nasabtan dida han ripa an ika-13 nga adlaw han ika-12 nga bulan han Adar.

⁸ Sanglit ginsumatan ni Aman an hadi, “May hugpo hin mga tawo nga nagsasarang ha bug-os mo nga ginhadian ngan aadto ha bisan diin nga dapit han tagsa nga lalawigan. Lain an ira mga pamatasan kay hadton iba nga mga tawo. Labot pa, diri hira nasugot han mga balaod han ginhadian, sanglit diri ini para han imo kaupayan kon pasagdan mo la hira.

⁹ Kon maupay ini para ha imo, Harangdon nga Hadi, pagpagawas hin sugo nga kinahanglan pamatayon hira. Kon pagbuhaton mo ini, nagpapasarig ako nga makakabutang ako hin 375,000 ka kilo nga salapi ngadto han hadianon nga hirimosan hin manggad para han pagpalakat han ginhadian.”

¹⁰ Ginhuslo han hadi an iya singsing nga ginagamit hin pagtimbre han mga pasangyaw ngan paghimo hini nga opisyal, ngan iginhatag ini kan Aman nga kaaway han mga Judiyo, nga anak ni Hamedata nga tulin ni Agag.

¹¹ Ginsiring hiya han hadi, “Ikaw an labi nga maaram han mga tawo ngan han ira kwarta; buhata ha ira sumala han imo karuyag.”

¹² Sanglit dida han ika-13 nga adlaw han syahan nga bulan, gintawag ni Aman an mga paragsurat han hadi ngan iginpasurat ha ira in usa nga pasangyaw nga paghuhubaron ngadto han tagsa nga pinulongan ngan tagsa nga paagi hin pagsurat han mga lalawigan nga sakop han ginhadian ngan ipapadara ini ngadto han ngatanan nga mga punoan, mga gobernador, ngan mga opisyal. Ginpagawas ini ha ngaran ni Hadi Asuero ngan gintimbrehan han iya singsing.

¹³ Gindara ini nga pasangyaw hin mga mensahero ngadto han tagsa nga lalawigan han ginhadian. Nagsugo ini nga sulod hin usa ka adlaw, an ika-13 nga adlaw han bulan han Adar, pamamatayon an ngatanan nga mga Judiyo—batan-on ngan tigurang, kababayen-an ngan kabataan. Pamamatayon hira hin waray kalooy ngan panimikasan hira han ira mga hiagi.

¹⁴ Ipapasabot ha atubangan han mga tawo an sulod hini nga pasangyaw didto han tagsa nga lalawigan, basi maandam an ngatanan kon umabot na ito nga adlaw.

¹⁵ Ha pagsugo han hadi, iginpasabot ha atubangan han mga tawo an sugo didto ha Susa, an kapital nga syudad, ngan gindara an sumat hin mga mensahero ngadto han mga lalawigan. Linmingkod an hadi ngan hi Aman ngan nag-inom hira samtang naririgumok an syudad han Susa.