Esdras 7 - Samarenyo Meaning-Based Bible (1984)

Inmabot ha Jerusalem hi Esdras

¹ Paglabay hin damo nga mga tuig, han hadi hi Artajerjes han Persia, may usa ka tawo nga ginngaranan kan Esdras nga inmabot ha Jerusalem tikang ha Babilonia. Tulin hiya ni Aaron, an Labaw nga Padi, kay anak hiya ni Seraias, nga anak ni Azarias nga anak ni Hilkias

² nga anak ni Salum nga anak ni Sadoc nga anak ni Ahitub

³ nga anak ni Amarias nga anak ni Azarias nga anak ni Merayot,

⁴ nga anak ni Sarahias nga anak ni Usi nga anak ni Boki

⁵ nga anak ni Abisua nga anak ni Pinehas nga anak ni Eleazar nga anak ni Aaron.

^6-7 Magturutdo han Balaod hi Esdras nga may-ada hitaas nga hibaro han Balaod nga iginhatag kan Moises han Ginoo nga Dyos han Israel. Iginhatag han hadi kan Esdras an ngatanan nga iya pinangaro kay kinalooyan man han Dyos hi Esdras. Dida ini han ikapito nga tuig nga hadi hi Artajerjes nga inmoli hi Esdras ngadto ha Jerusalem upod in hugpo hin mga Israelita nga mga kapadian, mga Levita, mga musikero han Templo, mga gwardya han Templo, ngan mga magtratrabaho.

^8-9 Linmakat hira ha Babilonia ha syahan nga adlaw han syahan nga bulan, ngan binuligan han Dyos, inmabot hira ha Jerusalem dida han syahan nga adlaw han ikalima nga bulan.

¹⁰ Iginhalad ni Esdras an iya kinabuhi hin pag-aram han Balaod han Ginoo, hin pagtuman hini, ngan hin pagtutdo han mga tawo han Israel han ngatanan nga mga sugo ngan mga turumanon han Balaod.

May Dokumento nga Ginhatag ni Emperador Artajerjes kan Esdras

¹¹ Ginhatag ni Emperador Artajerjes inin masunod nga dokumento kan Esdras nga padi ngan magturutdo han balaod, ngan hitaas an hibaro bahin han mga balaod ngan mga sugo nga iginhatag ha Israel han Ginoo.

¹² “Tikang kan Emperador Artajerjes, ngadto kan Padi Esdras, an magturutdo han Balaod han Dyos han Langit.

¹³ “Nagsusugo ako nga ha bug-os ko nga ginhadian, tugotan hin pag-upod ha imo ngadto ha Jerusalem an ngatanan nga mga Israelita nga karuyag umupod ha imo.

¹⁴ Nagsusugo ako, lakip an akon pito nga mga magsaragdon, nga usisahon mo an kahimtang ha Jerusalem ug Juda, pagkita kon ginsusugot ba hin maupay an Balaod han imo Dyos, nga igintapod ha imo.

¹⁵ Magdadara ka han mga halad nga bulawan ug salapi nga karuyag ko ngan han akon mga magsaragdon ighatag han Dyos han Israel, kanay Templo aadto ha Jerusalem.

¹⁶ Dadad-on liwat nimo an ngatanan nga salapi ug bulawan nga imo natirok ha bug-os nga lalawigan han Babilonia ngan an mga halad nga ihatag han mga Israelita ngan han ira kapadian para han Templo han ira Dyos ha Jerusalem.

¹⁷ “Upaya an paggawi hini nga kwarta ngan palit hin tudo nga mga baka, mga karnero nga lalaki, mga nati nga karnero, mga inani nga pugas ug bino, ngan ihalad ini ngatanan ha altar han Templo ha Jerusalem.

¹⁸ Mahimo nga gamiton nimo an sobra nga salapi ug bulawan hin bisan ano nga karuyag mo ngan han imo mga igkasi Israelita, sumala han kaburot-on han iyo Dyos.

¹⁹ Dad-a ngadto sa Dyos ha Jerusalem an ngatanan nga mga garamiton nga iginhatag ha imo hin paggamit para ha mga buruhaton ha Templo.

²⁰ Ngan kon ano pa an imo kinahanglan para han Templo, makakahimo ka pagkuha hin kwarta didto han hirimosan han manggad han hadi.

²¹ “Nagsusugo ako han ngatanan nga mga tesorero ha Katundan han Eufrates nga Lalawigan hin paghatag dayon kan Esdras nga padi ngan magturutdo han Balaod han Dyos han Langit, han ngatanan nga iya pangangaroon ha iyo,

²² tubtob hin 7,500 ka libra nga salapi, 500 ka bakid nga trigo, 550 ka galon nga bino, 550 ka galon nga lana hin olibo, ngan sumala han kadamo nga ginkikinahanglan nga asin.

²³ Kinahanglan ihatag gud niyo an ngatanan nga ginkikinahanglan han Dyos han Langit para han iya Templo, ngan siguroha niyo nga diri gud an ira Dyos masina ha akon ngan hadton masunod ha akon nga mga kahadian.

²⁴ Gindidid-an ko kamo hin pagsukot hin mga buhis han kapadian, han mga Levita, mga musikero, mga gwardya, mga magtratrabaho, o iba pa nga may labot hini nga Templo.

²⁵ “Ikaw, Esdras, ha paggamit nimo han kinaadman nga iginhatag ha imo han Dyos, magtutudlok ka hin mga magburuot ngan mga maghurukom nga magpapangulo han ngatanan nga mga tawo ha Katundan han Eufrates nga nag-uokoy dida hin pagkilala ha Balaod han imo Dyos. Kinahanglan itutdo mo ito nga Balaod hin bisan hin-o nga diri pa maaram.

²⁶ Kon may magtalapas han mga balaod han imo Dyos o han mga balaod han ginhadian, kinahanglan kastigohon hiya dayon: pinaagi hin pagpatay, o hin pagpaiwas ha nasod, o hin pag-agawi han iya mga hiagi, o hin pagkapreso.”

Nagdayaw han Dyos hi Esdras

²⁷ Nagsiring hi Esdras, “Dayawon an Ginoo nga Dyos han akon kaapoy-apoyan! Ginhimo niya nga an emperador maruyag hin pagpasidungog han Templo han Ginoo ha Jerusalem hini nga paagi!

²⁸ Tungod han kalooy han Dyos nalipay ha akon an emperador, an iya mga magsaragdon, ngan an ngatanan niya nga gamhanan nga mga opisyal. Gintagan ako han Ginoo hin kaisog, ngan nakabig ko in damo nga mga puno hin mga banay han Israel hin pag-uli upod ha akon.”