Esdras 10 - Samarenyo Meaning-Based Bible (1984)

Naglarang hin Pagpabulag han Langyaw nga mga Asawa

¹ Samtang nayukbo hi Esdras hin pag-ampo ha atubangan han Templo, nga nagtatangis ngan nagkokompisal hini nga mga sala, ginlibotan hiya hin dako nga hugpo hin mga Israelita nga nagtitinangis—mga kalalaken-an, kababayen-an, ngan kabataan.

² Niyan nagsiring kan Esdras hi Secanias, anak ni Jehiel han banay ni Elam, “Binayaan namon an pagtoo han Dyos pinaagi hin pangasawa hin langyaw nga kababayen-an, kundi bisan pa ngani, may-ada pa gihapon paglaom an Israel.

³ Sanglit yana kinahanglan magsumpa kami ha amon Dyos nga amon paiiwason ini nga kababayen-an ngan an ira mga anak. Tutumanon namon an igsagdon nimo ngan han iba pa nga natahod han mga sugo han Dyos. Bubuhaton namon an kinahanglan ipapagtuman ha amon han Balaod han Dyos.

⁴ Buhata kay katungdanan mo ini. Mabulig kami ha imo, sanglit padayona ngan buhata ini.”

⁵ Sanglit pinapagsumpa ni Esdras an mga pangulo han kapadian, han mga Levita, ngan han iba nga mga tawo nga kinahanglan tumanon nira an ginlarang ni Secanias.

⁶ Niyan tikang ha atubangan han Templo nasingadto hi Esdras han dapit nga inookyan ni Johanan nga anak ni Eliasib, ngan didto hiya pagpalabay han gab-i nga mabidoon tungod han damo nga mga sala nga ginbuhat han mga nabihag. Waray hiya kumaon o uminom hin bisan ano.

^7-8 Nagsugo an mga pangulo han mga tawo nga ipadara in mensahe ngadto ha bug-os nga Jerusalem ug Juda, nga kinahanglan magtirok didto ha Jerusalem an ngatanan nga nahibalik na nga mga nabihag. Kon may-ada diri makatuman hini sulod hin tulo ka adlaw, babawion ha iya an ngatanan niya nga hiagi ngan mawawaray na hiya katungod hin pagkaapi hini nga katilingban.

⁹ Sanglit sakob han tulo ka adlaw, dida han ika-20 nga adlaw han ika-9 nga bulan, napakadto ha Jerusalem an ngatanan nga kalalaken-an nga nag-uokoy ha katunaan han Juda ug Benjamin ngan nagtitirok hira ha plasa han Templo. Binmunok ngan makusog an uran. Nangungurog an ngatanan nga mga tawo tungod han kahadlok ug tungod han kahagkot.

¹⁰ Tinmindog hi Esdras ngan naghimangraw ha ira. Nagsiring hiya, “Nakagtalapas kamo ngan gindugangan niyo an sala han Israel pinaagi hin pangasawa hin langyaw nga kababayen-an.

¹¹ Sanglit yana, ikompisal niyo an iyo mga sala ngadto han Ginoo nga Dyos han iyo kaapoy-apoyan, ngan buhata niyo an makakapahimuot ha iya. Bulag kamo han mga tawo nga taga-langyaw nga nag-uokoy ha aton tuna ngan paiwasa an iyo langyaw nga mga asawa.”

¹² Nangogliat pagbaton an mga tawo, “Bubuhaton namon an imo ginsiring!”

¹³ Nagpadayon hira, “Kundi damo hin duro ini nga mga tawo ngan makusog an uran. Diri kami mailob pagtinukdaw ngan pag-antos han katun-og kon waray namon kasirongan. Diri ini mahihimo hin usa o duha la ka adlaw, kay damo hin duro ha amon an nahiaapi hini nga sala.

¹⁴ Paokya didto ha Jerusalem an aton mga opisyal ngan hira an manginano hini nga butang. Niyan pakanhia ha igintalaan nga panahon an tagsatagsa nga may langyaw nga asawa ha aton mga syudad, upod an mga pangulo ngan mga maghurukom han iya syudad. Dida hini mapopoypoy an kasina han Dyos hini nga kahimtang.”

¹⁵ Waray rinmiwa hini nga larang labot kan Jonatan nga anak ni Asahel, ngan kan Jaaseia nga anak ni Tekoa, nga inugopan nira Mesulam ug ni Sabetai, usa nga Levita.

¹⁶ Gintuman ini han mga nahibalik nga mga nabihag, sanglit gintudlok ni Esdras nga padi hin mga tawo tikang han mga puno han mga banay ngan ginsurat an ira mga ngaran. Dida han syahan nga adlaw han ika-10 nga bulan nagtikang hira hin pag-usisa,

¹⁷ ngan sulod han masunod nga tulo ka bulan ira naihap an ngatanan nga kalalaken-an nga may-ada mga langyaw nga asawa.

Ini an Kalalaken-an nga may-ada Langyaw nga mga Asawa

¹⁸ Amo ini an lista han kalalaken-an nga may-ada langyaw nga mga asawa: Kapadian, nga ginlista pinaagi hin mga banay: Banay ni Josue ngan han iya kabugtoan nga kalalaken-an nga mga anak ni Jozadac: hira Maasias, Eliezer, Jarib, ug Gedalias.

¹⁹ Nagsaad hira hin pakigbulag han ira mga asawa, ngan naghalad hira hin lalaki nga karnero nga unong nga tutuboron para han ira mga sala.

²⁰ Banay ni Emer: hira Hanani ug Sebadias

²¹ Banay ni Harim: hira Maaseias, Elias, Semaias, Jehiel, ug Uzias

²² Banay ni Pasur: hira Elioenai, Maaseias, Ismael, Natanael, Jozabad, ug Elasa

²³ Mga Levita: Hira Jozabad, Simei, Kelaias (tinatawag liwat nga Kelita), Fetaias, Juda, ug Eliezer

²⁴ Mga Musikero: Eliasib Mga Magbarantay han Templo: Hira Salum, Telem, ug Uri

²⁵ Iba pa: Banay ni Faros: hira Remeya, Jezias, Malquias, Miamin, Eleazar, Hasabias, ug Benaias

²⁶ Banay ni Elam: hira Matanias, Zacarias, Jehiel, Abdi, Jeremot, ug Elias

²⁷ Banay ni Zatu: hira Elioenai, Eliasib, Matanias, Jeremot, Sabad, ug Asisa

²⁸ Banay ni Bebai: hira Jehoanan, Ananias, Sabai, ug Atalai

²⁹ Banay ni Bani: hira Mesolam, Maluc, Adaias, Jasub, Saal, ug Jeremot

³⁰ Banay ni Fahatmoab: hira Edna, Calal, Benaias, Maaseias, Matanias, Besalel, Benui, ug Manases

^31-32 Banay ni Harim: hira Elieser, Isiha, Melquias, Semaias, Simeon, Benjamin, Maloc, ug Semarias

³³ Banay ni Hasum: hira Matenai, Matata, Sabad, Elifelet, Jeremai, Manases, ug Simei

^34-37 Banay ni Bani: hira Maadai, Amram, Vel, Benaias, Bedias, Keluhi, Banias, Merimot, Eliasib, Matanias, Matenai, ug Jaaso

^38-42 Banay ni Binui: hira Simei, Selemias, Natan, Adaias, Macnadebai, Sasai, Sarai, Asarel, Selemias, Semarias, Salum, Amarias, ug Jose

⁴³ Banay ni Nebo: hira Jehiel, Matatias, Sabad, Sebina, Jadai, Joel, ug Benaias

⁴⁴ Ini ngatanan nga kalalaken-an may-ada mga langyaw nga asawa. Nakigbulag hira han ira mga asawa, ngan ira ini ginpaiwas upod an ira mga anak.