Esdras 1 - Samarenyo Meaning-Based Bible (1984)

Nagsugo hi Hadi Ciro nga Manguli an mga Judiyo

¹ Dida han syahan nga tuig nga emperador han Persia hi Ciro, gintuman han Ginoo an iya ginsiring pinaagi kan Jeremias, an manaragna. Gin-aghat niya hi Ciro nga magpagawas hin usa nga sugo ngan isumat ini niya basi ipasangyaw ha ngatanan nga mga dapit han iya ginhadian:

² “Amo ini an sugo ni Ciro nga emperador han Persia: Ginhimo ako han Ginoo nga Dyos han Langit, nga pangulo han bug-os nga kalibutan ngan iginhatag ha akon an katungod hin pagtindog para ha iya hin templo ha Jerusalem, didto ha Juda.

³ Maada unta an Dyos ha iyo ngatanan nga mga tawo niya. Mapakadto kamo ha Jerusalem ngan iyo na liwat titindogon an Templo han Ginoo nga Dyos han Israel, an Dyos nga ginsisingba didto ha Jerusalem.

⁴ Kon may-ada han iya iginhalin nga mga tawo in magkinahanglan hin bulig basi hira makauli, an ira mga amyaw kinahanglan bumulig ha ira. Kinahanglan tagan hira hin salapi ug bulawan, mga garamiton ngan kargahan nga mga hayop, sugad man hin mga halad nga ira dadad-on ngadto han Templo han Dyos ha Jerusalem.”

⁵ Niyan nag-andam hin pagkadto ha Jerusalem ngan hin pagtindog na liwat han Templo han Ginoo an mga pangulo han mga banay han mga tribo nira Juda ug Benjamin, an kapadian ngan mga Levita, ngan an ngatanan kanay kasingkasing gin-aghat han Ginoo.

⁶ Binmulig ha ira an ngatanan nira nga mga amyaw hin paghatag ha ira hin damo nga mga butang: salapi nga mga garamiton, bulawan, mga kasangkapan, kargahan nga mga hayop, iba pa nga mga marahalon, ngan mga halad para ha Templo.

⁷ Igin-uli ha ira ni Emperador Ciro an mga makaong ngan mga kupa nga ginkuha ha Jerusalem ni Hadi Nabucodonosor ngan iginbutang ha templo han iya kadiyosan.

⁸ Iginhatag ini niya kan Mitridates nga tinaporan han hirimosan han manggad ngan naghatag hiya hin kasayoran ngadto kan Sesbasar nga gobernador han Juda,

^9-10 nga amo inin nasunod: bulawan nga mga makaong para hin mga halad 30 salapi nga mga makaong para hin mga halad 1,000 iba pa nga mga makaong 29 gudti nga bulawan nga mga makaong 30 gudti nga salapi nga mga makaong 410 iba pa nga mga garamiton 1,000

¹¹ May-ada 5,400 ngatanan nga bulawan ug salapi nga mga makaong ngan iba pa nga mga garamiton nga gindara ni Sesbasar han pag-uli na niya ngan an iba nga mga bihag tikang ha Babilonia ngadto ha Jerusalem.