Ecclesiastes 9 - Samarenyo Meaning-Based Bible (1984)

¹ Ginpainoino ko gud hin maiha ini ngatanan, ngan hinkit-an ko nga an Dyos amo an nagbubuot han mga panggawi han mga may kinaadman ngan mga magtadong, bisan an ira paghigugma ngan an ira pagdumot. Waray bisan usa nga maaram han iya kabubwason.

² Waray ini kalainan. Amo ngahaw nga kapalaran an naabot ha mga magtadong ngan ha mga magraogdaog, ha mga mag-upay ngan ha mga magraot, ha mga mainampoon ngan ha mga diri mainampoon, ha mga naghahalad hin mga unong nga tutuboron ngan ha mga diri naghahalad. An maupay sugad la hiya han makasasala; an nagsusumpa sugad la hiya han diri nagsusumpa.

³ Usa an kapalaran para han ngatanan, ngan ini sugad hin kasayop han bisan ano nga nahinanabo dinhe ha kalibutan. Samtang buhi pa an tawo, puno hin karat-an ug tinuyaw an iya hunahuna, ngan namamatay hiya dayon.

⁴ Kundi an bisan hin-o nga buhi pa dinhe ha kalibutan han mga buhi may-ada paglaom. An buhi nga ayam mauruupay kay han patay nga liyon.

⁵ Maaram an mga buhi nga mapatay hira, kundi an mga patay waray gud hinbabaroan. Waray na maabot nga balos; hinngalimtan na la hira.

⁶ Inmupod han ira kamatayon an ira mga paghigugma, an ira mga pagdumot, ngan an ira mga pagbati. Waray na gud nira labot han bisan ano nga nahinanabo dinhe ha kalibutan.

⁷ Pagpadayon la—pagpatakas hin pagkaon ngan pagkalipay; inom han imo bino ngan pagrayhak. Diri manginginlabot an Dyos.

⁸ Dayuday pagpakita nga malipayon ngan mahiyomhiyom ka.

⁹ Pahimulosi an kinabuhi upod han babaye nga imo hinigugma samtang nga buhi ka pa hin waray la pulos nga imo kinabuhi nga iginhatag ha imo han Dyos dinhe ha kalibutan. Pahimulosi ini nga mga waray pulos nga adlaw han imo kinabuhi, kay amo la an maaangkon mo nga balos han ngatanan mo nga kakurian.

¹⁰ Panigurohi an bisan ano nga imo pagbubuhaton, kay didto ha kalibutan han mga patay nga imo kakadtoan waray na buhat, waray na hunahuna, waray na hibaro, ngan waray na kinaadman.

¹¹ Hinsabtan ko in lain pa nga butang dinhe ha kalibutan. Diri kanunay nagdadaog han mga pagrumba an mga maglaksi dumalagan, ngan diri kanunay nagdadaog han mga araway an mga mag-isog. Diri dayuday maupay an panginabuhi han mga mag-aram; diri kanunay nagririko an mga may-ada hibaro, ngan diri kanunay nahingangadto ha higtaas nga mga katungdanan an takos nga mga tawo. Nahinanabo ha ngatanan an kadimalas.

¹² Diri mo gud hinbabaroan kon san-o aabot an imo panahon. Sugad hin mga tamsi nga tigda la nga nabibitik o sugad hin mga isda nga nadadakop ha pukot, nabibitik man kita ha usa nga maraot nga takna nga diri gud naton ginpapaabot.

Nagpainoino Mahitungod han Kinaadman ug Katuyawan

¹³ May-ada pa ako hinkit-an nga maupay nga susgaranan kon gin-uunan-o naton hin pagtagad han kinaadman dinhe ha kalibutan.

¹⁴ May-ada hadto gutiay nga bungto nga diri damo an mga umurokoy. Ginsulong ini hin gamhanan nga hadi. Ginpalibotan niya ini ngan nag-andam hin pagruba han mga pader.

¹⁵ Nag-ukoy didto in tawo nga pobre kundi listo gud nga makakatalwas unta hiya han bungto. Kundi waray gud may nahinumdom ha iya.

¹⁶ Dayuday nagsiring ako nga an kinaadman mauruupay kay han kusog, kundi waray gud naghuhunahuna nga in pobre nga tawo may-ada kinaadman, o nga pamatian an iya mga pulong.

¹⁷ Mauruupay pa an pagpamati han manamit nga mga pulong hin tawo nga may kinaadman kay han mga goliat hin punoan dida ha katirok hin mga lurong.

¹⁸ Darudamo an nahihimo nga kaupayan han kinaadman kay han mga hinganiban, kundi damo nga kaupayan an nadadaot hin usa nga makasasala.