Ecclesiastes 5 - Samarenyo Meaning-Based Bible (1984)

Ayaw Pagdalidali hin Pagsaad

¹ Paghinay kon makadto ka ha Templo. Mauruupay pa in pagkadto hin pag-aram kay hin paghalad hin mga unong, sugad hin lurong nga mga tawo nga diri maaram kon ano an matadong ngan an sayop.

² Panhunahuna anay san-o ka magyakan, ngan ayaw pagdalidali hin pagsaad sa Dyos. Aadto hiya ha langit ngan aanhi ka ha tuna, sanglit ayaw pagyakan labaw han angay mo igyakan.

³ Kon dako an imo kabaraka madagmit ka makag-inop hin maraot, ngan kon magpasagad ka ha imo pagyakan, madagmit ka makayakan hin tinuyaw.

⁴ Sanglit kon magsasaad ka sa Dyos, tumana ini dayon. Waray niya pagkinahanglan hin lurong, sanglit tumana an imo ginsaad.

⁵ Gabay ka pa diri magsaad, kay hin magsaad ka ngan diri nimo tumanon.

⁶ Ayaw itugot nga an imo mga pulong makapasala ha imo, basi sidngon mo an padi han Dyos nga diri mo tinuyo. Kay ano nga imo man tinagan hin higayon nga an Dyos masina ha imo? Kay ano nga ipabungkag mo ha iya an imo ginkabudlayan?

⁷ Kinahanglan tumahod ka gihapon han Dyos, bisan pa kon damo an imo mga inop, damo an imo mga buhat nga waray pulos, ngan damo an imo mga yakan.

Waray Kapulsanan an Kinabuhi

⁸ Ayaw hipausa kon kinikita mo nga gintatalumpigos han kagamhanan an mga kablas, ngan iginlilirong ha ira an katadongan ngan an ira mga katungod. Pinananalipdan han labaw ha iya an tagsa nga opisyal, ngan pinananalipdan liwat hira han larulabaw ha ira nga mga opisyal.

⁹ Bisan ngani hadi nasarig han aranihon.

¹⁰ Kon nahigugma ka hin kwarta diri ka gud matunga; kon karuyag mo nga magriko, diri ka gud makakaangkon han ngatanan nga imo kinaruruyag. Waray la ini kapulsanan.

¹¹ Kon riko ka, darudamo man an imo pakakaonon. An imo la maaangkon amo an imo paghibaro nga riko ka.

¹² An tawo nga paragtrabaho bangin waray igo nga pagkaon, kundi maupay an iya pagkaturog ha gab-i. Kundi makuri mahingaturog in riko kay damo an iya nababarak-an.

¹³ Iini in makalilisang nga butang nga akon hinkit-an dinhe ha kalibutan: may mga tawo nga nagtitirok han ira kwarta para hin panahon nga magkinahanglan hira hini,

¹⁴ kundi ha maraot nga pagpatigayon nauubos ini ngan waray na ngani nabibilin para han ira mga anak.

¹⁵ Nabaya kita hini nga kalibutan sugad gud han aton pagkatawo dinhe nga waray gud naton dara. Bisan pa han ngatanan naton nga pagkabudlay, waray gud naton bisan ano nga madadara.

¹⁶ Diri gud ini an angay buhaton! Malakat kita sugad gud han aton pag-abot. Nagkikinabudlay kita ngan nagtitinguha kita hin pagdakop han hangin, ngan ano man an aton naaangkon?

¹⁷ Nag-uokoy kita hin kinabuhi ha kasisidman ug kabidoan, dida hin kabaraka, kasina, ngan kasakit.

¹⁸ Iini in akon hinbaroan: an angay buhaton han tawo amo an pagkaon ngan pag-inom, ngan pagpahimulos han iya ginkabudlayan sulod han halipot nga kinabuhi nga iginhatag ha iya han Dyos; amo ini an kapalaran han tawo.

¹⁹ Kon tagan han Dyos hin manggad ug hiagi in tawo, ngan pagpahimulosan ini niya, kinahanglan magpasalamat hiya ngan magpahimulos han iya ginkabudlayan, kay hatag ini han Dyos.

²⁰ Tungod nga tinmugot an Dyos nga magmalipayon hiya, diri hiya mababaraka hin duro han kahalipot la han kinabuhi.