Ecclesiastes 4 - Samarenyo Meaning-Based Bible (1984)

¹ Niyan akon liwat ginpainoino an mga karat-an nga nagpapadayon dinhe ha kalibutan. Nagtatangis an mga gintatalumpigos, ngan waray gud nabulig ha ira. Waray nabulig ha ira kay gamhanan man an mga nagtatalumpigos ha ira.

² Naawa ako hadton mga nagkamatay ngan binmaya na; mauruupay pa hira hadton mga buhi pa.

³ Kundi mauruupay pa gud ha ira nga duha adton waray magkatatawo, nga waray pa makakita han mga karat-an nga nagpapadayon dinhe ha kalibutan.

⁴ Akon liwat hinbaroan an duro nga pagpanangusog han mga tawo basi hira magmainuswagon: kay naawa hira han mga butang han ira mga amyaw. Kundi waray la ini pulos. Sugad la ini hin pagdinakop han hangin.

⁵ Nasiring hira nga lurong in tawo nga nakugos han iya mga kamot ngan mamatay hin gutom.

⁶ Bangin la, kundi mauruupay pa nga may-ada bisan gutiay la, ngan murayaw an hunahuna, kay hin pagkinabudlay ha ngatanan nga panahon han duha niya nga mga kamot, hin paniguro hin pagdinadakopan la han hangin.

⁷ Hinsabotan ko pa ha kinabuhi in lain liwat nga waray kapulsanan.

⁸ Iini in tawo nga nag-uusaan la. Waray niya anak, waray bugto, kundi dayuday hiya nagkikinabudlay, nga diri gud natunga han iya manggad. Para kanay an iya ginkikinabudlayan hin duro, nga diri na ngani hiya nakakagpahimulos hin mga kalipayan? Waray liwat ini kapulsanan ngan makalolooy la nga paagi hin pag-ukoy dinhe ha kalibutan.

⁹ An duduha mauruupay han uusa la, kay makakagtrabaho hin maupay hira nga duha.

¹⁰ Kon matumba an usa ha ira makakabulig hin pagbangon ha iya an ikaduha. Kundi kon nag-uusaan la in tawo ngan matumba hiya, makuri ini kay waray man mabulig ha iya.

¹¹ Kon mahagkot an panahon, nakakagdirig an duduha ngan papasoan hira, kundi uunanhon mo pagpapaso kon uusa ka la?

¹² An duha ka tawo makakaato hin pagsulong nga makakapirde hin usa la ka tawo. An pisi nga tinulotulo makuri mautod.

^13-14 Mahimo umuswag in tawo tikang ha kakablasan ngadto hin pagkahadi han iya nasod, o tikang ha prisohan ngadto hin trono, kundi kon ha iya pagkalagas, diri na hiya mamati hin sagdon, mauruupay pa ha iya in kablas nga batan-on kundi may-ada hibaro.

¹⁵ Ginpainoino ko an ngatanan nga mga tawo nga nag-uokoy hini nga kalibutan, ngan nasabtan ko nga dida ha ira, may batan-on nga lalake nga masaliwan han hadi.

¹⁶ Bangin waray katubtoban an kadamo han mga tawo nga ginhahadian hin usa nga hadi, kundi kon patay na hiya, waray manunumdom han iya nabuhat. Waray la ini kapulsanan. Sugad la ini hin pagdinakop han hangin.