Ecclesiastes 3 - Samarenyo Meaning-Based Bible (1984)

May Panahon han Ngatanan

¹ An ngatanan dinhe ha kalibutan nahinanabo ha panahon nga gintalaan han Dyos.

² Igintatalaan niya an panahon hin katawo ngan an panahon hin kamatay, an panahon hin pagtanom ngan an panahon hin paggabot,

³ an panahon hin pagpatay ngan an panahon hin pagtambal, an panahon hin pagruba ngan an panahon hin pagtindog.

⁴ Igintatalaan niya an panahon hin pagbido ngan an panahon hin paglipay, an panahon hin pagkasubo ngan an panahon hin pagsayaw,

⁵ an panahon hin pakighilawas ngan an panahon hin diri pakighilawas, an panahon hin pagharok ngan an panahon hin diri pagharok.

⁶ Igintatalaan niya an panahon hin pamiling ngan an panahon hin pagwara, an panahon hin pagtipig ngan an panahon hin paglabog,

⁷ an panahon hin paggisi ngan an panahon hin pagtangkop, an panahon hin pagmingaw ngan an panahon hin pagyakan.

⁸ Igintatalaan niya an panahon hin paghigugma ngan an panahon hin pagdumot, an panahon hin araway ngan an panahon hin kalinaw.

⁹ Ano an aton naaangkon han ngatanan nga aton ginkabudlayan?

¹⁰ Maaram ako han magbug-at nga mga darad-on nga iginbutang ha aton han Dyos.

¹¹ Igintalaan niya an angay nga panahon han ngatanan nga mga butang. Gintagan kita niya hin ungara hin paghibaro han kabubwason, kundi diri gud niya ihinahatag ha aton an kalipay hin pakasayod gud han iya ginbubuhat.

¹² Sanglit hinsabtan ko nga an maupay la nga mabubuhat naton amo an pagkalipay ngan pagbuhat sugad han aton mahihimo samtang buhi pa kita.

¹³ Kinahanglan kumaon ngan uminom kita ngatanan ngan magpahimulos kita han aton ginkabudlayan, kay hatag ini han Dyos.

¹⁴ Maaram ako nga magpapadayon gud an ngatanan nga ginbubuhat han Dyos. Diri ka makakadugang o makakaiban hin bisan ano hini. Usa nga butang nga karuyag han Dyos amo nga tumahod kita ha iya.

¹⁵ An nahinanabo yana ngan mahinanabo pa, nahinabo na hadto. Ginliliwatliwat la han Dyos an amo ngahaw nga mga hinabo.

May Karat-an dinhe ha Kalibutan

¹⁶ Labot la hini, akon liwat hinsabotan nga dinhe ha kalibutan an kamaraogdaog aadto ha dapit nga angay unta hiagian an maupay ngan an matadong.

¹⁷ Nagsiring ako ha akon ngahaw, “Waray pinalabi an paghukom han Dyos han mga magtadong ngan han mga magraot, kay mahinanabo man ha igintalaan nga panahon an ngatanan nga butang ngan ngatanan nga buhat.”

¹⁸ Nakahunahuna ako nga ginsasarihan kita han Dyos ha pagpakita ha aton nga sugad la kita hin mga mananap.

¹⁹ Ngani, waray kalainan an kapalaran nga naghuhulat han tawo ngan han mananap. Napatay an tawo sugad han mananap, kay hira nga duha mga binuhat. Diri labaw han mananap an tawo, kay waray la kahulogan ha ira nga duha an kinabuhi.

²⁰ Amo ngahaw nga dapit an ira kakadtoan—an tapotapo. Tinmikang hira ha tapotapo, ngan amo gihapon mabalik hira ha tapotapo.

²¹ Uunanhon hin paghibaroi han tawo nga natipaigbaw an espiritu hin tawo ngan natipatuna an espiritu hin mananap?

²² Sanglit nakasabot ako nga an maupay nga sadang naton buhaton amo an pagpahimulos han aton ginkabudlayan. Waray na iba nga aton mabubuhat. Waray paagi para ha aton hin pakasabot kon ano an mahinanabo ha aton katapos ta kamatay.