Ecclesiastes 2 - Samarenyo Meaning-Based Bible (1984)

¹ Naglarang ako hin pagpahalipay ha akon ngahaw ngan pag-usisa kon ano gud an kalipayan. Kundi hinbaroan ko nga waray la gihapon ini kapulsanan.

² Nasayoran ko nga kalurongan la an pagtawa, ngan diri nakakaupay ha imo an pagrayhak.

³ Dara han akon pag-ungara hin kinaadman, naglarang ako hin paglipay ha akon ngahaw pinaagi hin irimnon ngan pagliaw-libang. Naghunahuna ako nga bangin amo ini an gimamaupayi nga mabubuhat han mga tawo sulod han ira halipot nga kinabuhi ha tuna.

⁴ Nahimo ko in dagko nga mga buruhaton: Nagtindog ako hin kabablayan, ngan nagtanom ako hin mga urubasan.

⁵ May-ada ako mga tanaman ngan mga uma hin nabunga nga mga kakahoyan;

⁶ nag-ukab ako hin mga bobon basi katubigan an akon uma.

⁷ Namalit ako hin damo nga mga oripon, ngan may mga oripon nga nagkatatawo ha akon balay. Darudamo an akon kahayopan hin bisan hin-o nga nag-ukoy ha Jerusalem.

⁸ Nakatirok liwat ako hin salapi ug bulawan tikang han hadianon nga mga manggad han mga tuna nga akon nasakopan. Nagkanta ha pagliaw ha akon in mga kalalaken-an ug kababayen-an, ngan naangkon ko an ngatanan nga kababayen-an nga akon naruruyagan.

⁹ Tinuod nga dako ako, darudako pa bisan kan kanay nga nag-ukoy ha Jerusalem, ngan waray gud magkawang ha akon an akon kinaadman.

¹⁰ Naangkon ko an ngatanan nga akon kinaruyag. Waray ko pagdid-i hin kalipayan an akon kalugaringon. Nalipay ako han ngatanan nga akon ginkabudlayan, ngan amo ini ngatanan an akon balos.

¹¹ Niyan ginpainoino ko an ngatanan nga akon nabuhat ngan an kakurian nga akon inatubang hin pagbuhat hini, ngan hinsabotan ko nga waray la kapulsanan ini. Sugad la ini hin tawo nga nagdadakop han hangin—waray gudla kapulsanan.

¹² Ha katapostaposan, an mahihimo la hin hadi amo la an ginbuhat han una nga kahadian. Sanglit nagpainoino ako kon ano an kahulogan han kamaaram, han katuyaw, ngan han kalurong.

¹³ Maaram ako hini, “Mauruupay an kinaadman kay han kalurongan, sugad nga mauruupay an kapawa kay han kasisidman.

¹⁴ Nakakakita an mga mag-aram kon tikain hira, kundi diri an mga lurong.” Kundi maaram liwat ako nga amo la gihapon nga kapalaran an ginhuhulat naton ngatanan.

¹⁵ Naghunahuna ako, “Mahinanabo liwat ha akon an nahinanabo han mga lurong. Sanglit ano gud an akon nakuha han akon duro hin kamaaram?” “Waray gud,” binmaton ako.

¹⁶ Waray nahinunumdom han mga mag-aram, ngan waray liwat nahinunumdom han mga lurong. Ha tiarabot nga mga adlaw, hingangalimtan kita ngatanan. Mapatay kita ngatanan—an mag-aram sugad man an lurong.

¹⁷ Sanglit nawaray la hinungdan para ha akon an kinabuhi, kay waray man ini iginhatag ha akon, labot hin kasamokan. Waray gudla kapulsanan ini ngatanan; nagdinakop la ako han hangin.

¹⁸ Waray gudla hinungdan para ha akon an ngatanan nga akon ginkabudlayan ngan naangkon, kay akon hinbaroan nga ibibilin ko ini ha akon sumurunod;

¹⁹ ngan hin-o in maaram nga bangin maaram o lurong hiya? Kundi hiya an magtatag-iya han ngatanan nga akon ginkabudlayan ngan han ngatanan nga naangkon han akon kinaadman dinhe hini nga kalibutan. Waray gudla pulos ini ngatanan!

²⁰ Sanglit nagbasol ako nga nagpinangusog ako hin duro.

²¹ Nagkakabudlay ka hin butang ha bug-os mo nga kinaadman, hibaro, ug sarabutan, ngan katapos ibibilin mo ini ngatanan hin tawo nga waray gud pagkabudlay hini. Waray la ini pulos ngan diri gud angay buhaton!

²² Nagkakabudlay ngan nababaraka ka ha bug-os mo nga kinabuhi, ngan ano man an imo makukuha hini?

²³ Samtang buhi ka pa, kabaraka ug kasakit la ha kasingkasing an gindadara han ngatanan nga imo binubuhat. Bisan ha kagab-ihon diri nakakapahuway an imo hunahuna. Waray gudla kapulsanan ini ngatanan.

²⁴ An gimamaupayi nga mabubuhat hin tawo amo an pagkaon ngan pag-inom, ngan pagpahimulos han iya pinakabuhian. Kundi hinsabtan ko nga bisan pa ngani ini natikang ha Dyos.

²⁵ Uunanhon nimo pakakaon o pagmalipayon?

²⁶ Nahatag an Dyos hin kinaadman, hibaro, ug kalipayan hadton mga nakakalipay ha iya, kundi pinapagkabudlay niya an mga makasasala, hin pagpakabuhi ngan pagtirok, basi an ira hin-aagian ihatag hadton mga nakakalipay ha iya. Waray gud la kapulsanan ini ngatanan ngan sugad la ini hin nagdadakop han hangin.